قۇسبەگىلىكتى الەمدىك دەڭگەيدەگى سپورت رەتىندە كورگىم كەلەدى - اياجان دانيار قىزى
الماتى. KAZINFORM — قازىرگى تاڭدا وقۋ مەن سپورتتى قاتار الىپ ءجۇرىپ قانا قويماي، ۇلتتىق سپورتتىڭ دامۋىنا دا ۇلەس قوسىپ جۇرگەن جاستار جەتەرلىك.
سولاردىڭ ءبىرى - اياجان دانيار قىزى. ول ۇلتتىق سپورتتىڭ ىشىندە «قۇسبەگىلىك» ونەرىمەن اينالىسىپ جۇرگەنىنە 2 جىلداي ۋاقىت بولعان. قىران، بۇركىتتى ۇستاپ، ونى باپتاۋعا جانى قۇمار قىزدى اڭگىمەگە تارتقان ەدىك.
- الدىمەن ءوزىڭدى وقىرماندارعا تانىستىرىپ وتسەڭ.. .
- اتى-ءجونىم اياجان دانيار قىزى، 20 جاستامىن. الماتى قالاسىنىڭ تۋماسىمىن. قازىرگى ۋاقىتتا ق. ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ 3-كۋرس ستۋدەنتىمىن. ماماندىعىم كومپيۋتەرلىك عىلىمدار، جاي تىلمەن ايتقاندا بولاشاقتا «IT مامانى» بولامىن.
- قۇسبەگىلىك ونەرمەن اينالىسىپ جۇرگەنىڭە قانشا ۋاقىت بولدى؟ ول سەنى نەسىمەن قىزىقتىردى؟
— قۇسبەگىلىك ونەرمەن اينالىسىپ جۇرگەنىمە 2 جىلداي ۋاقىت بولىپ قالدى. جالپى قۇسبەگىلىك ونەرىنە مەن كەنەتتەن كەلدىم دەسەم بولادى. سەبەبى، باسىندا سۇلتانسەرى ەتنو-ونەر ورتالىعىنىڭ الەۋمەتتىك جەلىلەردە جاريالاعان «ساداقشى قىزدار» كاستينگىنە بارعان ەدىم. وسىلايشا 456 قىزدىڭ اراسىنان كاستينگتەن ءوتىپ، العاشقى 6 اي كولەمىندە كاسىبي تۇردە ساداق اتۋمەن اينالىستىم. ۋاقىت وتە ۇستازىم سۇلتانسەرى بەكەت ۇلىنىڭ قۇسبەگىلىكپەن اينالىسىپ جۇرگەنىن بايقاپ، باسىندا وعان قولعابىس بولىپ، كەيىن وسى جولدى دا قاتار الىپ جۇرە باستادىم.
جالپى، قۇسبەگىلىك ونەر اتادان قالعان قاسيەتتى مۇرا دەسەم ارتىق بولماس. سەبەبى، ەجەلگى زاماننان سال-سەرىلىكتىڭ ايقىن بەلگىسىنە اينالعان ۇلتتىق ونەرىمىزدىڭ قازىرگى تاڭدا سپورت رەتىندە دامىپ جاتقانى قۋانتادى. بۇل مەنىڭشە، جاس ۇرپاقتىڭ تەك شەتەلدىك سپورت تۇرلەرىنە عانا ەمەس، سونداي-اق ءوزىمىزدىڭ دە ۇلتتىق سپورتىمىزعا كوڭىلدەرىن اۋدارتاتىن بولادى.
— قۇسبەگىلىكتىڭ ادامعا قانداي پايدالى تۇستارى بار دەپ ويلايسىڭ؟
— بۇل ىستەن ءار ادام وزىنە كوپ پايدالى زات تۇيەدى. ەڭ الدىمەن بۇركىت ادامعا سابىرلى بولۋدى ۇيرەتەدى، ونى باپتاۋ كەز كەلگەن ادامنىڭ قولىنان كەلە بەرمەيدى. بۇركىتتى باپتاي وتىرىپ ادام ءوزىن دە سابىرعا كەلتىرەدى. وعان قوسا، تازا اۋادا كوپ جۇرۋگە تۋرا كەلەدى، مەنىڭ ويىمشا بۇل دا قازىرگى زامان دەرتى -سمارتفونداردان اۋلاق بولۋعا ءبىر سەبەپ. جالپى، دەرەكتەرگە سۇيەنەر بولساق، قۇسبەگىلىك ونەرىمەن اينالىسقان ادامدار كوپ ءومىر سۇرەدى ەكەن. سەبەبى، ۋاقىت كەلە ەگدە جاستاعى ادامداردىڭ ءومىرىنىڭ بولشەگى بولا وتىرا، دەنساۋلىعىن دا نىعايتادى.
— ساعان وقۋ مەن قۇسبەگىلىكتى قاتار الىپ ءجۇرۋ قيىن ەمەس پە؟ ەكەۋىنە قالاي ۋاقىت تاباسىڭ؟
— قۇسبەگىلىكپەن اينالىسۋ وسى ۋاقىتقا دەيىن مەنىڭ وقۋىما ەشقانداي كەدەرگى كەلتىرگەن ەمەس. ۋنيۆەرسيتەتتە ساباقتارىم كوبىنەسە تۇسكە دەيىن بولادى، ال جاتتىعۋلارىمدى سوعان ىڭعايلاپ تۇستەن كەيىنگى ۋاقىتقا قويامىن. وسىلايشا، بارلىعىنا ۋاقىت تابامىن.
— قازىر قۇسبەگىلىكپەن قاي جەردە اينالىسىپ ءجۇرسىڭ؟ وندا قۇسبەگىلىكپەن اينالىسۋعا تولىق جاعداي جاسالعان با؟
— قۇسبەگىلىكپەن الماتى قالاسىندا «سۇلتانسەرى ەتنو- ونەر ورتالىعىندا» اينالىسامىن. بۇل ىسپەن شۇعىلدانۋ ءۇشىن ماعان جانە بۇركىتتەرىمە بارلىق جاعداي جاسالعان.
— بۇركىت قۇسى جايىندا نە ايتار ەدىڭ، سەن بايقاعان ەرەكشە قاسيەتتەرى بار ما؟
— بۇل كيەلى قۇستىڭ مەن بايقاعان ەرەكشەلىكتەرى جەتەرلىك. ەڭ نەگىزگىلەرىن ايتار بولسام، بۇركىت ۇيرەنۋگە بەيىم كەلەدى، ونى «درەسسيروۆكا» دەپ جاتامىز. سونىمەن قاتار بارلىعى بىلەتىندەي بۇركىتتەر كۇن ساۋلەسىنە تىكە قاراي الاتىن جالعىز قۇس. وعان قوسا قاسيەتتى تۋىمىزدا دا بەينەلەنگەنىنە قاراپ وتىرىپ، حالقىمىزدىڭ بۇل ەرەكشە قۇستى قانشالىقتى قادىرلەيتىنى تۇسىنىكتى دەپ ويلايمىن. بۇركىتتى مەن مەن كيەلى قۇس دەپ ايتار ەدىم. ولار دا تىرشىلىك يەسى عوي، ولاردىڭ بۇگىنگى الەمدەگى كوپتەگەن قاۋىپ- قاتەردەن امان بولۋىن قالايمىن.
— جەكە بۇركىتىڭ بار ما؟ جالپى بۇركىتتەردى قالاي باپتايسىڭ؟
— قازىرگى ۋاقىتقا دەيىن باپتاپ ۇلگەرگەن ەكى قىرانىم بار. بىرەۋى قازىر تۇلەكتە وتىر، ەكىنشىسى جارىسقا تولىقتاي دايىن.
ەڭ الدىمەن بۇركىتتى قولعا العان ۋاقىتتان باستاپ ونى ادامدارعا باۋىر باستىرامىز. كەيىن شۋعا ۇيرەتكەن ابزال، سول كەزدە بۇركىت كوپ ادام بار جەردە، ماسەلەن، جارىس، تۋرنيرلەردە جاتىرقاپ قالمايدى. كەيىننەن ولاردى قولدان تويدىرىپ، ەت بەرەمىز، ۋاقىت وتە كەلە جاتتىعۋلاردى باستايمىز.
ەڭ ءبىرىنشى بىرنەشە مەتر جەردەن باستاپ، قولدان قولعا شاقىرىپ ۇيرەتەمىز، كەيىن بۇل ارا- قاشىقتىقتى ءبىر شاقىرىمعا دەيىن ۇزارتامىز.
بۇركىتتى دۇرىس باپتاۋ ءۇشىن ادامعا مەنتالدى تۇرعىدا وتە مىقتى بولۋ كەرەك. بۇركىت دۇرىس باپتاۋعا قاتىستى بارلىق ەرەكشەلىگىمەن تانىسقان ءجون. مەنىڭ ويىمشا، بۇركىتتىڭ دۇرىس باپتالۋى ەڭ الدىمەن ۇستازعا بايلانىستى، بۇل تۇرعىدا مەن لوتورەيا جەڭىپ الدىم دەسەم بولادى. مەنىڭ ۇستازىم سۇلتانسەرى بەكەت ۇلى اتىشۋلى بەكەت ەسەنتايەۆ اتامىزدىڭ ۇلى، اكەسىنىڭ سەرىلىك ونەرىن جالعاستىرۋشى رەتىندە وسى ونەردىڭ دامۋىنا كوپ كۇشىن سالۋدا.
— بۇركىتتى قالاي دۇرىس تاماقتاندىرۋ كەرەك؟
— كۇنىنە بۇل قۇستار شامامەن 500 گرام تازا ەت جەيدى. بۇل مولشەر جىل مەزگىلىنە، قۇستىڭ كۇيىنە قاراي وزگەرۋى مۇمكىن. نەگىزگى قولداعى بۇركىتتەردىڭ قورەگى رەتىندە تازالانعان، مايسىز ءۇي قويان ەتى، سيىر ەتى، جىلقى ەتىن قولدانامىز.
— بۇگىنگە دەيىن قانشا بۇركىتشىلەر سايىسىنا قاتىستىڭ؟ جۇلدەلەر بار ما؟
— 2023 -جىلى وتكەن بارلىق دەرلىك تۋرنيرلەر مەن جارىستارعا قاتىستىم. ەڭ العاش رەت كوكشەتاۋ قالاسىندا وتكەن جارىستا فينالعا شىقتىم. سول كەزدە بۇركىتىمنىڭ ۇشقىرلىعى ەكى سەكۋندقا قالىپ قويدى. دەگەنمەن، وسى جارىستان سوڭ باعىم جاندى دەسەم بولادى. سەبەبى، كەيىنگى بارلىق دەرلىك جارىستا اقتىق مارەگە دەيىن ءوتىپ ءجۇردىم.
— الدا قانداي جوسپار بار؟ ۇلتتىق سپورتتىڭ وسى ءتۇرىن ارى قاراي دامىتۋ جوسپاردا بار ما؟
— ايتۋ كەرەك، قازىرگى تاڭدا ۇلتتىق سپورتقا ەرەكشە قولداۋ كورسەتىلىپ جاتىر. ۇلتتىق سپورتتىڭ قاي ءتۇرى بولماسىن كەيىنگى بىرنەشە جىلدا جاقسى دامىدى. بولاشاقتا ۇلتتىق سپورتتىڭ وسى ءتۇرىن، ياعني، قۇسبەگىلىكتى تەك قانا ەلىمىزدە عانا ەمەس، الەمدىك دەڭگەيدەگى سپورت تۇرىنە اينالدىرسام دەگەن ارمانىم بار. سونىمەن بىرگە، جانىمدا قۇسبەگىلىكتى دامىتۋعا ۇلەسىن قوسقىسى كەلەتىن قىزداردى كوپتەپ كورگىم كەلەدى. سەبەبى، الەۋمەتتىك جەلىلەردەن دە بايقاعان بولارسىز، حالىقتىڭ نازارى ەڭ الدىمەن قىزعا تۇسەدى. ەگەر ۇلتتىق سپورتتىڭ دامۋىندا وڭ ناتيجە كورسەتىپ جاتسا، ۇلتتىق سپورتىمىزدى ارى قاراي وسىلايشا ناسيحاتتاي بەرۋ كەرەك دەپ سانايمىن.
— اياجان، سۇحباتىڭا راحمەت. اڭساعان ارمانىڭنىڭ ورىندالۋىنا تىلەكتەسپىز.
اۆتور
دۋمان ارعىنگەلدى
