قۇرىلىس كومپانيالارىنا كەپىلدىك الۋ تالاپتارى جەڭىلدەيدى - زاڭ جوباسى

استانا. KAZINFORM - قۇرىلىس كومپانيالارىن قاراجاتتى زاڭدى جولمەن تارتۋعا ىنتالاندىرۋ ماقساتىندا جاڭا زاڭ جوباسىندا ءبىرىڭعاي وپەراتوردىڭ كەپىلدىگىن الۋ ءتاسىلى بويىنشا باستاپقى تالاپتاردى جەڭىلدەتۋ قاراستىرىلعان.

بۇل تۋرالى ونەركاسىپ جانە قۇرىلىس مينيسترلىگى قالا قۇرىلىسى جانە تۇرعىن ءۇي-كوممۋنالدىق ساياسات دەپارتامەنتىنىڭ قۇرىلىس سالاسىن دامىتۋ باسقارماسىنىڭ باسشىسى ەرلان كۇلىشيەۆ ايتىپ بەردى.

- قۇرىلىس كومپانيالارى ءبىرىڭعاي وپەراتوردىڭ كەپىلدىگى، ەكىنشى دەڭگەيدەگى بانكتەردىڭ جوبالارعا قاتىسۋى جانە كوپ پاتەرلى تۇرعىن ءۇيدىڭ قاڭقاسى تۇرعىزىلعاننان كەيىن قاراجات تارتۋ. ءبىرىڭعاي وپەراتوردىڭ كەپىلى بويىنشا 255 كەپىلدىك بەرىلگەن، بۇل نارىقتىڭ %25,5- ىن قۇرايدى. سونىڭ ىشىندە 221 جوبا اياقتالدى، 34 جوبا سالىنىپ جاتىر. ەكىنشى دەڭگەيلى بانكتەردىڭ قاتىسۋى ارقىلى 588 نىسانعا ۇلەسكەرلەردىڭ قاراجاتىن تارتۋعا رۇقسات بەرىلگەن، بۇل نارىقتىڭ %58,9- ىن قۇرايدى. ونىڭ ىشىندە 455 جوبا اياقتالىپ، 133 نىساندا قۇرىلىس جۇمىستارى جالعاسۋدا، - دەدى ەرلان كۇلىشيەۆ «اتامەكەن» ۇ ك پ الاڭىندا وتكەن جيىندا.

ونىڭ ايتۋىنشا، كوپپاتەرلى تۇرعىن ءۇيدىڭ قاڭقاسىن تۇرعىزعاننان كەيىن قارجى تارتۋ ءتاسىلى بويىنشا جەرگىلىكتى اتقارۋشى ورگاندار تاراپىنان 156 نىسانعا رۇقسات بەرىلدى. بۇل نارىقتىڭ %15,6- ىن قۇرايدى. ونىڭ ىشىندە 124 جوبا اياقتالىپ، 32-ءسى سالىنىپ جاتىر.

سونداي-اق قۇرىلىس كومپانيالارىن قاراجاتتى زاڭدى جولمەن تارتۋعا ىنتالاندىرۋ ماقساتىندا زاڭ جوباسىندا ءبىرىڭعاي وپەراتوردىڭ كەپىلدىگىن الۋ ءتاسىلى بويىنشا باستاپقى تالاپتاردى جەڭىلدەتۋ قاراستىرىلعان.

- اتاپ ايتقاندا، تالاپ 3 جىلدان 2 جىلعا، قۇرىلىس كولەمى رەسپۋبليكالىق ماڭىزى بار قالالار مەن ەلوردادا 18 مىڭ شارشى مەتردەن 10 مىڭ شارشى مەترگە دەيىن، ال وڭىرلەردە 9 مىڭنان 5 مىڭ شارشى مەترگە دەيىن تومەندەتىلەدى. سونىمەن قاتار، قۇرىلىس سالۋشى نەمەسە ۋاكىلەتتى كومپانيانىڭ اكتيۆتەرى قىسقا جانە ۇزاق مەرزىمدى مىندەتتەمەسىن شەگەرگەننەن كەيىنگى جيىنتىق اكتيۆتەرىنىڭ كەمىندە %10 قۇراۋى ءتيىس، - دەپ ءتۇسىندىردى مينيسترلىك وكىلى.

بۇگىن ەلوردادا «اتامەكەن» ۇلتتىق كاسىپكەرلەر پالاتاسى الاڭىندا «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭى تالقىلاندى. جيىنعا قۇزىرلى ورگاندار وكىلدەرى، قۇرىلىس كومپانيالارىنىڭ باسشىلارى مەن بيزنەس وكىلدەرى قاتىستى.

ەسكە سالايىق، بيىل 30 -ساۋىردە ءماجىلىس ۇلەسكەر اقشاسىنا تۇرعىن ءۇي سالۋ ەرەجەسىن جەتىلدىرەتىن زاڭدى قابىلدادى.

12 -ماۋسىمدا سەنات ۇلەسكەرلىكتى رەتتەپ، ازاماتتىق قورعانىس جۇيەسىن نىعايتاتىن زاڭداردى قارادى.

اۆتور

داۋلەت ىزتىلەۋ