قۇرلىقتاعى مۇناي قورىنىڭ كولەمى ارتىپ كەلەدى

استانا. KAZINFORM - الەمدەگى مۇناي قورى ەكىنشى اي قاتارىنان ارتىپ كەلە جاتىر. مۇنداي دەرەك حالىقارالىق ەنەرگەتيكالىق اگەنتتىكتىڭ سوڭعى ەسەبىندە كەلتىرىلگەن.

ەنەرگەتيكالىق قاداعالاۋشى ورگانننىڭ مالىمەتىنشە، جالپى الەمدىك مۇناي قورى ەكىنشى اي قاتارىنان ارتىپ، ناۋرىزدا 7,7 ميلليارد باررەلگە دەيىن جەتكەن. وسى ورايدا اگەنتتىك بيىل مۇناي قورى ورتاشا ەسەپەن تاۋلىگىنە 720 مىڭ، ال كەلەسى جىلى تاۋلىگىنە 930 مىڭ باررەلگە ۇلعاياتىندىعىن بولجاپ وتىر.

ءساۋىردىڭ ورتاسىنان مامىردىڭ ورتاسىنا دەيىن شيكى مۇنايدىڭ الەمدىك قورى قۇرلىقتا 100 ميلليون باررەلدەن استامعا ارتىپ، 3,127 ميلليارد باررەلگە جەتتى. فرانسۋزدىق Kayrros گەوتالداۋ كومپانياسىنىڭ ساراپشىسى اۆگۋستينا پراتتىڭ ايتۋىنشا، بۇل COVID-19 ىندەتى ۋاقىتىنان بەرى قۇرلىقتاعى قوردىڭ ەڭ ۇلكەن كورسەتكىشى سانالادى.

الەمدەگى مۇنايدى ەڭ ءىرى يمپورتتاۋشى قىتايدا مامىر ايىندا مۇناي قورى رەكوردتىق جوعارى دەڭگەيگە - 1,127 ميلليارد باررەلگە جەتتى. بۇل ۇكىمەت پەن مۇناي ءوندىرۋشى كومپانيالاردىڭ قارا التىننىڭ تومەن باعاسى كەزىندە قور جيناقتاپ الۋ بويىنشا كەلىسىلگەن شارتىمەن بايلانىستى بولۋى ىقتيمال.

سوڭعى ۋاقىتتا تەڭىز تانكەرلەرىندە ساقتالعان مۇناي كولەمىنىڭ ارتۋى دا الاڭداتارلىق جايتتاردىڭ ءبىرى بولىپ تۇر. Kpler كومپانياسىنىڭ دەرەگىنشە، سوڭعى ايدا تانكەرلەردە 7 كۇننەن استام تۇرعان شيكى مۇنايدىڭ، كوندەنسات پەن مۇناي ونىمدەرىنىڭ كولەمى 14 پايىزعا ارتىپ، 160 ميلليون باررەلگە جەتىپ وتىر. بۇل دا سوڭعى 2 جىلداعى ەڭ جوعارى كورسەتكىش.

بۇعان دەيىن قازاقستان ەۋروپاعا ەڭ ءىرى مۇناي جەتكىزۋشىلەر ۇشتىگىنە ەنگەنىن جازعان ەدىك.