قۇربان ايت: قازاقستاندا قوي باعاسى قانشا
استانا. KAZINFORM - قىسقا قاراعاندا قازىر ەلىمىزدىڭ كەيبىر وڭىرىندە ءتورت تۇلىك باعاسى %20-50 كوتەرىلدى. دەگەنمەن كەي وبلىستا باعا وزگەرىسسىز قالدى.
قۇرباندىققا شالاتىن قوي باعاسى اقتاۋدا جوعارى بولىپ شىقتى. مۇندا قۇربان ايت مەرەكەسىنە دەيىن قوي 70000 تەڭگەگە ساتىلسا، قازىر باعا ورتا ەسەپپەن 120000 تەڭگە بولىپ تۇر. ەڭ ارزانىنا دا، قىمباتىنا دا ورتا ەسەپپەن 20000 تەڭگە قوسىلىپ، قازىر قۇربان مالىن 90000-140000 تەڭگەگە ساتىپ الۋعا بولادى. الماتىدا دا توقتى مەن قوي باعاسى شامالاس. مۇندا باعا 75000 تەڭگەدەن باستالىپ، 150000 تەڭگەگە دەيىن جەتتى. مەرەكە جاقىنداعان سايىن بازاردا توقتىلار ازايىپ جاتىر. ايتىپ وتەيىك، ەلىمىزدىڭ وڭتۇستىك استاناسىندا قوي باعاسى قىستا دا جوعارى بولعان. تەك توقتىنى 35000 تەڭگەگە ساتىپ الۋعا مۇمكىندىك بولدى.
ال اقتوبە مەن استانادا توقتى، قوي باعاسى 70000 تەڭگەدەن باستالىپ، 120000 تەڭگەگە جەتىپ تۇر. قوي باعاسى كەي جەردە ءسال ارزان. دەگەنمەن بۇل وڭىرلەردە دە شوپان اتا ءتولى قىستا قازىرگى باعادان تومەن بولدى. اقتوبەدە باعا ءسال وزگەرگەنىمەن، استانادا جارتى جىلدا قوي قۇنى كەي جەردە ەكى ەسە كوتەرىلدى.
ەلىمىزدىڭ وڭتۇستىگىندەگى تۇركىستان، تاراز بەن شىمكەنتتە قۇرباندىققا شالۋعا بولاتىن توقتى مەن قوي باعاسى 60000 تەڭگەدەن باستالىپ، 120000 تەڭگەگە جەتتى. تەك تۇركىستان مەن شىمكەنتتە قۇنى ارزان قۇرباندىق مالىن تابۋ قيىنداي تۇسكەن. ال تارازدا سەمىز قوي ساتىپ العىڭىز كەلسە، باعا ءسال جوعارى بولىپ تۇر.
اتىراۋ، وسكەمەن، سەمەي مەن تالدىقورعاندا قۇرباندىققا شالىناتىن قوي باعاسى 65000 - 90000 تەڭگە. بۇل قالالاردا باعا بۇعان دەيىن دە وسى شامادا بولدى. سۇرانىسقا قاراي ءقازىر باعانىڭ شامامەن 20000 تەڭگەگە كوتەرىلگەنىن كورۋگە بولادى.
قونايەۆ، قىزىلوردا، كوكشەتاۋ مەن پەتروپاۆلدا قوي باعاسى - 55000-85000 تەڭگە. بۇل قالالاردا دا سۇرانىس ارتقانىمەن، باعا قىستاعىداي كۇيدە ساقتالىپ قالدى.
قاراعاندى مەن جەزقازعاندا قۇرباندىققا شالاتىن قوي باعاسى شامامەن 45000-80000 تەڭگە.
پاۆلودار مەن ورالدا قوي باعاسى - 60000 تەڭگە. مۇندا دا باعا وزگەرمەدى.
قۇربان ايت مەرەكەسى قارساڭىندا قوي باعاسىن سالىستىرىپ، ەڭ ارزانى قوستاناي قالاسىندا ەكەنى انىقتالدى. مۇندا باعا - 40000 - 60000 تەڭگە.
بۇعان دەيىن مەكتەپ تۇلەكتەرىنىڭ كەشىنە قانشا قارجى قاجەت ەكەنى تۋرالى جازىلدى.
