قۇربان ايت مەرەكەسى 6-ماۋسىمدا باستالادى – ق م د ب
استانا. KAZINFORM - قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى بيىل ەلىمىزدە قۇربان ايت مەرەكەسى قاي كۇنى باستالاتىنىن ايتتى.
- بيىل قاسيەتتى قۇربان ايت مەرەكەسى 6-ماۋسىمدا باستالادى. قازاقستان مۇسىلماندارى ءدىني باسقارماسى ءبىرقاتار الىس تا جاقىن مۇسىلمان ەلدەردىڭ عۇلامالارىمەن، ءپاتۋا شىعارۋ ورتالىقتارىمەن كەڭەسىپ، وسىنداي ءپاتۋا قابىلدادى، - دەدى باس ءمۇفتي ق م د ب- دا وتكەن باسپا ءسوز ءماسليحاتىندا.
سونداي-اق ول بۇل مەرەكەنىڭ قازاق حالقىنىڭ داستۇرىندە ورنى بولەك ەكەنىن اتاپ ءوتتى.
- باعزى زاماننان بەرى يسلام ءدىنىن رۋحاني تىرەگىنە اينالدىرعان حالقىمىز قۇربان ايتتى ايرىقشا دايىندىقپەن قارسى العان. مالدىڭ سەمىزىن، جارامدىسى مەن ەڭ جاقسىسىن قۇرباندىققا شالىپ، ەتىن تۇرمىسى تومەن ادامدارعا تاراتۋ، قوناق كۇتىپ، ۇلكەننىڭ باتاسىن الۋ، سىيلىققا كادە بەرۋ سەكىلدى امالدار داستۇرىمىزدە قالىپتاسقان ىزگى قۇندىلىقتار، - دەدى ناۋرىزباي قاجى تاعان ۇلى.
ق م ب د مالىمەتىنشە، يسلام دىنىندە قاسيەتتى كۇندەر، تۇندەر جانە ايلار قاماري جىل ساناۋى نەگىزىندە انىقتالادى. مۇنداي جىل ساناۋى اي فازاسىنىڭ وزگەرۋىنە نەگىزدەلگەن. جاڭا ايدىڭ كورىنۋىمەن جاڭا اي باستالادى. قاماري اي كەيدە 29 نە 30 كۇن بولادى.
زۋلحيججا ايىن انىقتاۋ ءۇشىن زۋل-قاعدا ايىنىڭ 29 ندا ايدى باقىلايدى. كۇن باتقان كەزدە جاڭا اي كورىنسە، كەلەسى كۇنى زۋل-حيججا ايى باستالعان بولىپ سانالادى. ەگەر كۇن بۇلتتى بولىپ، اي كورىنبەسە، زۋل-قاعدا ايىن 30 كۇنگە تولىقتىرادى.
وسى نەگىزدە 2025-جىلى 27-مامىردا جاڭا ايدىڭ كورىنۋىنە بايلانىستى بيىل زۇلحيججا ايى 28-مامىردا باستالىپ، اراپا 5-ماۋسىمعا، ال قۇربان ايت 6-ماۋسىمعا ساي كەلەدى.
ايتا كەتەلىك قۇربان ايتتا قازاقستاندىقتار قانشا كۇن دەمالاتىنى تۋرالى جازعان ەدىك.
