قۇنانبايدى قاتىگەز كەيىپكەر دەپ ويلادىم - «اباي وقۋلارى» جۇلدەگەرىمەن سۇحبات
استانا. KAZINFORM - بىرەر كۇن بۇرىن 8-11 سىنىپ وقۋشىلارى اراسىندا وتكەن XXVI رەسپۋبليكالىق «اباي وقۋلارى» شىعارماشىلىق بايقاۋى ءوز مارەسىنە جەتكەن ەدى.
سايىستىڭ جۇلدەگەرى مەن ۇيىمداستىرۋشىسى Jibek Joly ارناسىنىڭ «بۇگىن LIVe» ستۋدياسىنا قوناق بولىپ، بايقاۋ تۋرالى وي- پىكىرىن ايتتى.
- 26-رەت ۇيىمداستىرىلىپ جاتقان «اباي وقۋلارى» بايقاۋى بيىل حالىقارالىق دەڭگەيدە العاش رەت ءوتىپ وتىر. بايقاۋدىڭ دەڭگەيى وتە جوعارى بولدى. حالىقارالىق دەڭگەيدە بولعاننان كەيىن ءبىزدىڭ ەلىمىزدەن عانا ەمەس، شەكارالاس مەملەكەتتەردىڭ دە كىل جۇيرىكتەرى باق سىناپ، باسەكەلەستىك وتە مىقتى دەڭگەيدە بولدى. وسى سايىستان قولا جۇلدەگەر اتانۋ مەن ءۇشىن ۇلكەن مارتەبە. بارلىعى ءساتتى ءوتتى دەگەن ويدامىن، - دەدى «اباي وقۋلارى» رەسپۋبليكالىق بايقاۋىنىڭ Ⅲ ورىن يەگەرى ايعانىم ماحسۇتقانوۆا.
سەمەيلىك قاتىسۋشى «ءسوز ونەرىندەگى ۇلى اباي» نوميناتسياسى بويىنشا دوداعا تۇسكەن.
- مەن «ءسوز ونەرىندەگى ۇلى اباي» نوميناتسياسى بويىنشا جۇلدەگەر اتاندىم. بۇل سايىستا حاكىم ابايعا ارنالعان شىعارمالار بويىنشا سۇراقتار قويىلادى. ال سەن سول سۇراققا مۇدىرمەي جاۋاپ بەرۋىڭ كەرەك. ول جەردە بەكىتىلگەن 3 كىتاپ بار. ولار مۇحتار اۋەزوۆتىڭ «اباي جولى» رومان- ەپوپەياسى، رامازان توقتاروۆتىڭ «ابايدىڭ جۇمباعى» رومان-حامساسى جانە كامەن ورازاليننىڭ «ابايدان سوڭ» رومانى. ودان بولەك اباي تۋرالى قوسىمشا كىتاپتار وقۋعا بولادى. ونى قازىلار القاسى ەسكەرىپ، سول بويىنشا دا سۇراقتار قويىپ قالۋى مۇمكىن. مەن ءوز باعامدى لايىق دەپ سانايمىن. سەبەبى بۇل جارىس حالىقارالىق دەڭگەيدە وتكەننەن كەيىن تارتىستى باسەكە بولدى. بۇل دودادا ءبارى ءادىل ءوتتى. مەن ءوز جۇلدەمە قاناعاتتانامىن. سايىسكەرلەرمەن قارسىلاس سەكىلدى ەمەس، جاقسى ءتىل تابىسىپ كەتتىك. ولار شىنىمەن دە وزا شاپقان، ناعىز جۇيرىكتىڭ دە جۇيرىگى بولدى، - دەيدى 10-سىنىپ وقۋشىسى.
بايقاۋ جۇلدەگەرى بالا كەزىنەن ابايدى تانىپ وسكەنىن ايتادى. ستۋديا قوناعىنىڭ سوزىنشە، بۇل دا دودادا وزا شابۋعا ءوز سەپتىگىن تيگىزگەن.
- ءوزىم سەمەي قالاسىنىڭ تۋماسى بولعاندىقتان، ابايدى كەڭىنەن تانۋعا مۇمكىندىك بولدى. مەكتەپ تابالدىرىعىن اتتاعان ساتتەن باستاپ اباي تانۋشىلارمەن سۇحباتتاسىپ، تىعىز بايلانىستا بولعاننان كەيىن مەن دە كوزىمدى اباي دەپ اشتىم. اباي جولىن العاش رەت 9-سىنىپتا وقىدىم. كەيىن وسى بايقاۋ ءۇشىن تاعى دا قايتالاپ وقىدىم. بۇل بايقاۋعا 1 -جىل شاماسىندا دايىندالدىم، - دەيدى ستۋديا قوناعى.
«اباي جولى» رومانىن 2 رەت وقىپ شىققان ايعانىم ءوزىنىڭ ەكى ءتۇرلى اسەر العانىن ايتادى.
- اباي جولىن اراعا 1 جىل عانا سالىپ قايتا وقىسام دا، مەنىڭ كوزقاراسىم مەن قابىلداۋىم مۇلدە باسقاشا بولدى. ەكىنشى رەت وقىعانىمدا «مەن سوندا بۇرىن نە وقىعانمىن؟» دەگەن سۇراق ويىما كەلدى. مەنىڭشە، «اباي جولى» - ءوزىڭدى تانۋعا كەرەمەت مۇمكىندىك. مىسالى، مەن 9-سىنىپتا وقىعاندا قۇنانبايدى وتە قاتىگەز كەيىپكەر رەتىندە كورگەن ەدىم. ال 10-سىنىپقا وتكەن كەزدە مۇحتار اۋەزوۆتىڭ سەنزۋراعا بايلانىستى قۇنانبايدىڭ پورترەتىن بۇرمالاعانىن ءتۇسىندىم. دەگەنمەن ول سەنزۋراعا قاراماستان، ارتىنان قۇنانبايدىڭ نەگىزى جاقسى كەيىپكەر ەكەنىن تۇسىندىرەتىن سويلەمدەردى جازىپ كەتكەن. بۇل - مۇحتار اۋەزوۆتىڭ شەبەرلىگى دەپ بىلەمىن، - دەيدى ايعانىم ماحسۇتقانوۆا.
ال ستۋدياعا قوناق بولعان «دارىن» رەسپۋبليكالىق عىلىمي- پراكتيكالىق ورتالىعىنىڭ باس مامانى بيىلعى بايقاۋدىڭ ادەتتەگىدەن ەرەكشە ەكەنىن جەتكىزدى.
جالپى «اباي وقۋلارى» اۋداندىق، وبلىستىق، رەسپۋبليكالىق دەڭگەيدە 3 كەزەڭدە وتكىزىلەدى. بيىل وبلىستىق كەزەڭگە 1311 وقۋشى قاتىستى. ال رەسپۋبليكالىق كەزەڭگە، قاتەلەسپەسەم، 122 بالا كەلدى. ونىڭ ىشىندە 39 ى اۋىل مەكتەپتەرىندە ءبىلىم الاتىندار. وعان قوسا تۇركىمەنستان، وزبەكستان، رەسەي فەدەراتسياسىنداعى التاي ولكەسىنەن جانە موڭعولياداعى قازاق دياسپوراسىنان 20 وقۋشى قاتىستى. «اباي وقۋلارى» 5 نوميناتسيا بويىنشا وتكىزىلەدى. ولار:
* «ءاندى سۇيسەڭ مەنشە ءسۇي»
* «ءسوز ونەرىندەگى ۇلى ابايدىڭ بەينەسى»
* «ابايدىڭ اسىل مۇراسى»
* «ابايدىڭ اقىن شاكىرتتەرى»
* «اركىمنىڭ- اق ولەڭگە بار تالاسى»
- نەگىزىندە بۇل بايقاۋ جىل سايىن تەك رەسپۋبليكالىق دەڭگەيدە وتكىزىلەتىن. بيىل ابايدىڭ 180 جىلدىق مەرەيتويىنا وراي العاش رەت حالىقارالىق دەڭگەيدە ۇيىمداستىرىلدى، - دەيدى ءمادينا بيداۋلەتوۆا.
