قۇمار ويىننىڭ قۇرىعى قىسقارادى
بانكتەرگە بەرەشەگى بار بورىشكەرلەر ەندى ءباس تىگە المايدى. سول سەكىلدى مەملەكەتتىك قىزمەتشىلەردەن باستاپ ءبىرقاتار ساناتتاعى ازاماتتاردىڭ قۇمار ويىنعا قاتىسۋعا شەكتەۋ قويىلدى.
مەملەكەت باسشىسى ويىن بيزنەسى، لوتەرەيا قىزمەتى، دەنساۋلىق ساقتاۋ، مەملەكەتتىك ەڭبەك ينسپەكتسياسى، مەملەكەتتىك باقىلاۋ جونىندەگى زاڭعا قول قويدى. قۇجاتتا حالىقتىڭ قۇمار ويىنعا تاۋەلدىلىگىن تومەندەتۋدىڭ تەتىكتەرى قارالعان. جاڭا زاڭدا قانداي وزگەرىستەر بار؟ ەلدە 700 مىڭنان اسا جەتكىنشەك قۇمار ويىندارعا ءباس تىگەدى. بۇل دەگەنىڭىز لۋدومانيا كەسەلى ەرەسەكتەرمەن قاتار، جاسوسپىرىمدەر اراسىندا دا وتە وزەكتى دەگەن ءسوز. ال اجىراسقان ءاربىر 7 وتباسىنىڭ شاڭىراعىنىڭ شايقالۋىنا وسى قۇمارلىق سەبەپ. مەملەكەت باسشىسى قۇردىمعا اپارتىن قۇمارلىققا زاڭمەن نۇكتە قويۋدى تاپسىرعان ەدى. ءماجىلىس جانە سەنات دەپۋتاتتارى قۇجاتتى قايتا قاراپ، پرەزيدەنتكە ۇسىندى. بۇگىن قاسىم- جومارت توقايەۆ زاڭعا قول قويدى.
ەرلان قارين، ق ر مەملەكەتتىك كەڭەسشىسى
بۇل ۇلتتىق قۇرىلتايدا كوتەرىلگەن باستامالاردى جۇزەگە اسىرۋ اياسىندا قابىلدانعان بەسىنشى زاڭ. مەملەكەت باسشىسى اتىراۋدا سويلەگەن سوزىندە لۋدومانيانى الەۋمەتتىك كەسەلدىڭ ءبىرى دەپ اتاپ ءوتتى جانە ءتيىستى نورماتيۆتىك قۇجاتتى پارلامەنتتىڭ قازىرگى سەسسياسىنىڭ سوڭىنا دەيىن قابىلداۋدى تاپسىردى. زاڭ جوباسى ءتۇرلى پىكىرتالاس الاڭىندا تالقىلانىپ، وعان دەپۋتاتتار، ۇلتتىق قۇرىلتايدىڭ جانە جاستار جونىندەگى كەڭەستىڭ مۇشەلەرى قاتىستى. مامىر ايىندا زاڭسىز ويىن بيزنەسى مەن لۋدومانياعا قارسى ءىس- قيمىل جونىندەگى كەشەندى جوسپار بەكىتىلىپ، ونىڭ ەرەجەلەرى جاڭا زاڭنىڭ نورمالارىمەن ۇيلەسىم تاپتى. پارلامەنت دەپۋتاتتارىنىڭ ۇسىنىسىمەن قابىلدانعان بۇل قۇجاتتا قۇمار ويىندارىن ويناۋعا رۇقسات بەرىلگەن ادامداردىڭ سانىن ازايتۋدى كوزدەيتىن جۇيەلى ءىس- شارالاردىڭ ءبىرتۇتاس كەشەنى قاراستىرىلعان.
قۇجات اياسىندا بانكتەرگە بەرەشەگى بار بورىشكەرلەردىڭ ءباس تىگۋىنە تىيىم سالىندى. بۇل شامامەن 3,5 ميلليون ادام. سونىمەن بىرگە، ەندى مەملەكەتتىك جانە اسكەري قىزمەتشىلەر مەن قۇقىق قىزمەتكەرلەرى جانە بيۋدجەتتىك ۇيىمنىڭ باسشىلارى دا قۇمار ويىندارعا قاتىستىرىلمايدى. قۇمار ويىندارعا ءباس تىگۋگە تىيىم سالىنادى مەملەكەتتىك قىزمەتشىلەر اسكەري قىزمەتشىلەر ارنايى جانە قۇقىق قورعاۋ ورگاندارىنىڭ قىزمەتكەرلەرى بيۋدجەتتىك ۇيىمداردىڭ باسشىلارى بانك بورىشكەرلەرى.
گۋلجاش تۋرانوۆا، "وركەن" بالالاردىڭ ءال- اۋقاتىن ارتتىرۋ ۇلتتىق عىلىمي پراكتيكالىق ينستيتۋتىنىڭ اعا وقىتۋشىسى:
- زاڭ نورمالارىنا سايكەس، مەملەكەتتىك قىزمەتكەرلەرگە قۇمار ويىنداردىڭ كەز كەلگەن قىزمەتى - بۋكمەكەرلىك كەڭسەلەر، كازينولار جانە ونلاين كازينولار شەكتەلەتىن بولادى. وسىلايشا جالپى سانى 280 مىڭعا جۋىق ادامدى قۇرايتىن اسكەري قىزمەتكەرلەر، مەملەكەتتىك مەكەمە قىزمەتكەرلەرى، بيۋدجەتتىك ۇيىمداردىڭ باسشىلارى قۇمار ويىندارعا قاتىسا المايدى. زاڭدى بۇزعان جاعدايدا ولارعا قاتىستى كەلەڭسىز سەبەپتەرمەن جۇمىستان بوساتۋعا دەيىنگى قاتاڭ شارالار قولدانىلاتىن بولادى.
ەندى بۋكمەكەرلىك كەڭسەلەردىڭ جارناماسىن جاساپ، سويىلىن سوعاتىندارعا ايىپپۇل سالىنادى. ولاردىڭ بارلىق سىرتقى جارنامالارى الىنىپ تاستالادى.
گۋلجاش تۋرانوۆا، "وركەن" بالالاردىڭ ءال- اۋقاتىن ارتتىرۋ ۇلتتىق عىلىمي پراكتيكالىق ينستيتۋتىنىڭ اعا وقىتۋشىسى:
- ب ا ق- تا سپورتتىق تاقىرىپتاعى، سونداي- اق وتاندىق تەلەارنالاردىڭ حالىقارالىق سپورت جارىستارىن تىكەلەي ترانسلياتسياسى كەزىندەگى جارنامانى قوسپاعاندا، بۋكمەكەرلىك كەڭسەلەر مەن توتاليزاتورلاردى بۇقارالىق اقپارات قۇرالدارىندا، كينو، بەينە جانە انىقتامالىق قىزمەتتەردە جارنامالاۋعا تىيىم سالىنادى. بۋكمەكەرلىك كەڭسەلەردىڭ جارناماسىن تاراتقان جاعدايدا 60 ا ە ك جانە ودان جوعارى ايىپپۇلدار قاراستىرىلعان. ءاپ- ساتتە مول بايلىققا كەنەلە قالاسىڭ دەيتىن لوتو ويىندارىنا دا ءبىرقاتار شەكتەۋلەر ەنگىزىلدى. ماسەلەن، الەۋمەتتىك نىسانداردا جانە ولارعا جاقىن ايماقتاردا لوتەرەيا كەڭسەلەرىن ورنالاستىرۋعا جانە بيلەتتەرىن ساتۋعا تىيىم سالىندى. بۇل بالالاردى قۇمار ويىننىڭ قۇرىعىنان قۇتقارادى.
شىنبولات پازىل، ۇلتتىق لوتەرەيانىڭ رەسمي وكىلى، سپيكەر:
- جاس شەتەۋى 21 جاستان اسقان ازاماتتار عانا لوتورەياعا قاتىسا الادى دەگەن. ودان بولەك الەۋمەتتىك نىسانداردان 100 مەتر قاشىقتىقتان ورنالاسۋ كەرەك. وقۋ ورىندارى بار مىسالى يا، مەشىت دەگەن نارسەلەر بار، سولاردان 100 م قاشىقتىقتا ورنالاسۋ تۋرالى نورمالاردى ءبىز ۇسىنعان بولاتىنبىز جانە سول ۇسىنىسىمىزدى ءبىزدىڭ مينيسترلىك قولداپ، ءبىز سول بويىنشا جۇمىستى باستاعانبىز. ەندى قازىر زاڭ قابىلداندى. بۇل وزگەرىستەر ءبىزدىڭ مەملەكەتىمىزگە ۇلكەن پايداسىن اكەلەدى دەگەن ويدامىز. جاڭاشىلدىق مۇنىمەن بىتپەيدى. ەنەرگەتيكالىق سۋسىندارعا تاۋەلدىلىك تە بالالار اراسىندا وتكىر تۇر. بۇل دا قۇمارلىقتىڭ ءبىر ءتۇرى. ەندى وعان زاڭمەن نۇكتە قويىلادى. ياعني، 21 جاسقا تولماعاندار ءۇشىن تاۋار ءتۇرى ساتىلمايدى.
شەرنياز جالعاسبەك ۇلى
