قۇلسارى دارىگەرلەرى العاش رەت پىشاقسىز وتا جاسادى

اتىراۋ. KAZINFORM - تاسقىن سۋ باسقان قۇلسارى قالاسىندا دارىگەرلەر العاش رەت لاپاروسكوپيالىق تاسىلمەن وتا جاسادى.

جىلىوي اۋداندىق ورتالىق اۋرۋحاناسىنىڭ باس دارىگەرى اسۋلان ابدراحمانوۆتىڭ ايتۋىنشا، بۇرىن ءدال مۇنداي وتا قولعا الىنباعان.

«بۇرىن اپپەنديتسيت، اسقازان جاراسىنان قان كەتۋ، جاتىردان تىس جۇكتىلىك، كىندىك جانە شاپ جارىعىنا وپەراتسيالار كەسۋ ادىسىمەن شۇعىل ءارى جوسپارلى تۇردە جاسالعان ەدى. ەندى لاپاروسكوپيالىق وتا جاساۋ ءىسى قولعا الىندى. بۇگىن 36 جاستاعى ازاماتقا زامان تالابىنا ساي لاپاروسكوپيالىق ادىسپەن وتا جاسالدى»، - دەيدى اسۋلان ابدراحمانوۆ.

ونىڭ پىكىرىنشە، لاپاروسكوپيالىق حيرۋرگيا - ناۋقاستىڭ ىشكى اعزاسىنا وتانى تىلىك جاساماي-اق ورىندايتىن جاڭا ءادىس. بۇل تاسىلمەن وتا جاسالعان ەمدەلۋشىگە ءبىر- ەكى اياعىنا تۇرۋ مۇمكىندىك جوعارى بولادى.

«ناۋقاس «تەڭىز» كەن ورنىنان اۋداندىق اۋرۋحانانىڭ قابىلداۋ بولىمىنە ءىشىنىڭ جانە وڭ جاق مىقىن تۇسىنىڭ اۋىرسىنۋى بەلگىلەرىمەن جەتكىزىلدى. ونىڭ جاعدايىنا مەديتسينالىق تەكسەرۋ جۇرگىزىلدى. لابوراتوريالىق زەرتتەۋ ناتيجەسىنەن كەيىن ناۋقاستا اپپەنديتسيت دياگنوزى بارى ناقتىلاندى. ناۋقاسقا ءوزىنىڭ كەلىسىمىمەن لاپاروسكوپيالىق ادىسپەن شۇعىل تۇردە وتا جاسالدى»، - دەپ حابارلادى اسۋلان ابدراحمانوۆ.

اۋدان دارىگەرلەرى ناۋقاستىڭ جاعدايى قالىپتى دەپ باعالاپ وتىر. ناۋقاس اۋرۋحانانىڭ حيرۋرگيا بولىمىندە ەم الۋدى جالعاستىرىپ جاتىر.