قۇلاپ، دىرىلدەپ جاتقان: شىمكەنتتە پوليتسەيلەر ءبىر ادامنىڭ ءومىرىن ساقتاپ قالدى

شىمكەنتتە پاترۋلدىك پوليتسەيلەر ايالدامادا تالماسى ۇستاپ قالعان ازاماتتى قۇتقاردى. Kazinform بۇل تۋرالى Polisia.kz-كە سىلتەمە جاساپ حابارلايدى.

مۇحيت يمانوۆ پەن مۇراتبەك ءتاجىباي ايالدامادا ەپيلەپسيالىق تالماعا ۇشىراعان ازاماتقا دەر كەزىندە كومەك كورسەتتى. قالا كوشەلەرىندە ءتارتىپتى قامتاماسىز ەتىپ جۇرگەن پاترۋلدىك پوليتسيا پولكىنىڭ قىزمەتكەرلەرى اۆتوبۋس ايالدامالارىنىڭ بىرىندە قۇلاپ، دىرىلدەپ جاتقان ادامدى بايقاعان.

پوليتسەيلەر جەدەل ارەكەت ەتىپ، ونى ءبىر جاعىمەن جاتقىزىپ، باسىنا سىرت كيىمىن قويدى. بىرنەشە سەكۋندتان كەيىن ەر ادامنىڭ ۇستاماسى توقتادى. ول مەديتسينا قىزمەتكەرلەرىنە تاپسىرىلدى. وسىلايشا، قۇقىق قورعاۋشىلار جەدەل جانە ۇيلەسىمدى ارەكەتتىڭ ارقاسىندا تاعى ءبىر ادامنىڭ ءومىرىن ساقتاپ قالدى. ولارعا قۇتقارىلعان تۇرعىننىڭ تۋىستارى شىن جۇرەكتەن ريزاشىلىعىن ءبىلدىردى.

«ەر ادامنىڭ تىنىسى ءۇزىلىپ، داۋىسى تارىلىپ جاتقان ەدى. ەپيلەپسيالىق ۇستامانىڭ بەلگىلەرى كورىندى. ارىپتەسىممەن بىرگە وعان العاشقى كومەك كورسەتتىك. كەيىن ازامات ەسىن جينادى. ءبىر جاقسىسى، ءبىز ءدال سول ساتتە جاقىن ماڭدا بولدىق. ارينە، بۇل ارەكەتىمىزدى باتىرلىق دەپ سانامايمىز. قاجەت كەزدە كومەككە كەلۋ - ءبىزدىڭ مىندەتىمىز»، - دەيدى مۇحيت يمانوۆ.

اۆتور

ەلميرا ورالبايەۆا