قازىردىڭ وزىندە 120-دان استام ۇسىنىس ەنگىزىلدى - ايدا بالايەۆا

استانا. KAZINFORM - مادەنيەت جانە اقپارات ءمينيسترى ايدا بالايەۆا ۇلتتىق قۇرىلتايدىڭ 4-وتىرىسى اياسىندا القالى جيىننىڭ ءبىرىنشى جۇمىس سەكسيلارى بارىسىندا ايتىلعان ۇسىنىستارعا قاتىسى مالىمەتتەرمەن ءبولىستى.

بۋرابايدا ۇلتتىق قۇرىلتايدىڭ «ازاماتتىق قوعام» جانە «مادەنيەت. ونەر. رۋحانيات» سەكسيالارى اياقتالدى. ايدا بالايەۆانىڭ اتاپ وتۋىنشە، پىكىرتالاس الاڭى قىزۋ ءوتىپ، قاتىسۋشىلار ءتۇرلى ماسەلەنى كوتەردى.

- ۇلتتىق قۇرىلتايدىڭ سەكتسيالىق الاڭدارى مەن جالپى وتىرىسىندا تالقىلاناتىن بارلىق ۇسىنىس مىندەتتە تۇردە جۇزەگە اسىرىلادى. سوندىقتان ماسەلەنى تالقىلاپ قانا قويماي، ونى جۇزەگە اسىرۋ بويىنشا ناقتى ۇسىنىس ەنگىزۋ ماڭىزدى. ولاردىڭ بەلگىلى ءبىر سالاعا ىقپال ەتەرى ءسوزسىز. ۇلتتىق قۇرىلتايدىڭ «ازاماتتىق قوعام» جانە «مادەنيەت. ونەر. رۋحانيات» اتتى ەكى سەكتسياسىنىڭ قورىتىندىسىندا ۇلتتىق قۇرىلتاي مۇشەلەرىنەن 120-دان استام ۇسىنىس ەنگىزىلدى. ۇلتتىق قۇرىلتاي مۇشەلەرى ناقتى ءبىر سەكسيامەن شەتلەمەيتىندىگىن، ولاردىڭ بارلىق سەكسياعا قاتىسىپ، ءوز ۇسىسىنتارىن بىلدىرە الاتىندىعىن اتاپ ءوتۋ ماڭىزدى، - دەدى مينيستر.

وسى ورايدا ول «مادەنيەت. ونەر. رۋحانيات» سەكتسياسىندا وزەتى ماسەلەنىڭ از بولماعانىن جاسىرمادى.

- «مادەنيەت. ونەر. رۋحانيات» سەكسياسىنا قاتىستى ايتار بولساق، ماسەلەنىڭ كەڭ اۋقىمى قوزعالعانى ءسوزسىز: بالالارعا ءتالىم-تاربيە بەرۋ، قوعامدىق مادەنيەتتى قالىپتاستىرۋ، كىتاپ باسپاسى قىزمەتىن دامىتۋ، سونىمەن قاتار كينو يندۋسترياسىنا قاتىستى وزەكتى اسپەكتىلەر، ءداستۇرلى قۇندىلىقتارى قالىپتاستىرۋ ءارى تاسىمالدىلىعىن ارتتىرۋ جانە باسقا دا ماسەلەلەر. بۇل ماسەلەنىڭ بارلىعى قىزۋ رەاكسيا تۋىنداتقانى ءسوزسىز. ويتكەنى، ءاربىر قاتىسۋشى ءوز كوزقاراسىن بىلدىرۋگە تىرىسادى. ۇلتتىق قۇرىلتاي مۇشەلەرىنىڭ ناقتى ۇسىنىس بەرەتىنى قۋانتادى جانە ولاردىڭ كوپشىلىگى الداعى ۋاقىتتا قوسىمشا تالقىعا تۇسەدى، - دەدى ايدا بالايەۆا.

بۇعان دەيىن بۋرابايدا IV ۇلتتىق قۇرىلتاي باستالعانىن جازعان ەدىك.

وسى جيىن اياسىندا عىلىم جانە جوعارى ءبىلىم ءمينيسترى ساياسات نۇربەك قازاقستان تاريحىنىڭ جاڭا اكادەميالىق باسىلىمىن ازىرلەۋ جۇمىسىنىڭ بارىسى جايىندا ايتتى.

اۆتور

مارلان جيەمباي