قازىبەكتىڭ ات داۋىن شەشۋى
استانا. قازاقپارات - ءبىر ۇلكەن اس بولىپ، سول استا بايگىگە شاپقان جۇيرىكتەر ىشىنەن ءبىر قارا جال قۇلا جەكە-دارا وزىپ كەلىپتى. سوندا بايگەنى تاماشالاۋعا كەلگەن ءبىر ادام: - مىناۋ مەنىڭ تاي كۇنىندە جوعالتقان اتىم، - دەپ اتتىڭ شىلبىرىنا جارماسادى.
اتتى قوسىپ وتىرعان يەسى:
- جوق بۇل مۇلدەم جالا، ءوزىمنىڭ كەر بيەمنەن تۋعان قول تۋما مالىم، دەيدى. كوپشىلىك ەكى جاعىنا دا «سەنىكى ءجون» دەپ ايتا الماي سودان بارىپ قازىبەكتىڭ تۋعان اكەسى كەلدىبەك بيگە جۇگىنىسكە كەلەدى. ءبىراق ەكى داۋگەردىڭ ءسوزىن تىڭداعان كەلدىبەك «ات سەنىكى» دەپ كەسىپ ايتا الماي، داعدىرىپ وتىرىپ قالادى.
ەكى داۋگەردىڭ ايتقان دالەلىنە قۇلاق تۇرە ءجۇرىپ، وعان بيلىك ايتا الماي داعدارعان اكەسىن بايقاعان جەتى جاسار قازىبەك:
- سەن قالاي تانىعىش بولىپ الدىڭ؟ - دەپ داۋگەرلەردىڭ بىرىنە سۇراق قويادى.
- مەن ەنىن كورسەم، ودان تۋعان ءتولىن، ءتولىن كورسەم ەنەسىن جازا باسپاي تانيمىن، دەپ جاۋاپ بەرەدى، اتىن تاي كۇنىندە جوعالتقان ادام. سوندا قازىبەك اتتى بايگىگە قوسقان ادامعا:
- كانى، ءسىز قالاي مال تانىعىشسىز؟ - دەيدى.
- مەن، ەنەسىن ءبىر كورسەم، ىشىندەگى قۇلىنىن تۋعاننان كەيىن سول بيەدەن تۋعانىن بۇلجىتپاي تانيمىن، - دەيدى. سوندا قازىبەك تۇرىپ:
- جارايدى. ەندى ەكەۋىڭىز بارىڭىزدار دا، اناۋ جۇرگەن قوزىلار ىشىنەن ەكى قوزى ۇستاپ اكەلىڭدەر، دەيدى. ولار بارىپ الىپ كەلگەندە:
- قوزىنى كوگەندەپ قويىڭىزدار دا، ورىستەگى قويدان ءوزدى-ءوزىڭ اكەلگەن قوزىنىڭ ەنەسىن الىپ كەلىڭدەر، - دەيدى.
ەكى داۋگەر ورىستەگى قويدان ەكى ساۋلىقتى الىپ كەلىپ قوزىلاردى باۋىرىنا سالعاندا، ات قوسقان ادام اكەلگەن ساۋلىق قوزىدان جەريدى، قوزى دا جاتسىنىپ ساۋلىققا جۋىمايدى. ال تاي كۇنىندە جوعالتتىم دەگەن ادام ساۋلىققا قوزىسىن سالعاندا ەنەسى ەمىرەنىپ تۇرا قالادى. قوزى باۋىرىنا كىرىپ ەمە بەرەدى.
قازىبەك كوپشىلىككە قاراپ:
- كانە، حالايىق، بۇعان سىزدەر نە ايتاسىزدار؟ - دەگەندە، كوپشىلىك ءبىر اۋىزدان «ات تاي كۇنىندە جوعالتقان ادامدىكى» ەكەن دەسەدى.
