قازيپا قالي قىزى: ەلىڭدى ءسۇيۋ ۇلتتىق قۇندىلىقتارىڭدى جوعارى باعالاپ، دارىپتەۋمەن ولشەنەدى
اتامەكەنىنە «تۋعان حالقىمنىڭ كەرەگىنە جاراپ، ءبىر كەتىگىنە قالانامىن» دەگەن ىزگى ويمەن ورالعان بەلگىلى ەتنوديزاينەر قازيپا مۇحامەتقاليدىڭ ەسىمى ۇلتتىق قولونەر، تىگىن بيزنەسى سالاسىندا جاقسى تانىس.
31 جىل بۇرىن ەڭبەك جولىن شاعىن عانا تىگىن اتەلەسىن اشۋدان باستاعان ول بۇگىندە ىسكەرلىك الەمىندە ءوز قولتاڭباسىن قالىپتاستىرعان ءىرى كاسىپكەرگە اينالدى. وسى جولدا قيىندىقتار مەن سىناقتارعا مويىماعان نازىك جاننىڭ باتىلدىعى، ۇلتجاندىلىعى مەن اسقان ەڭبەكقورلىعى تاڭقالدىرىپ، جەتكەن جەتىستىكتەرى تامساندىرادى.
تابىسقا جەتۋ جولىندا جيناعان تاجىريبەسى مەن كاسىپكەرلىك قۇپياسى، ومىردەگى ۇستانىمى تۋرالى ەۋرازيالىق ديزاينەرلەر وداعىنىڭ قۇرمەتتى ديزاينەرى، «ۇلتتىق برەند» پرەمياسىنىڭ يەگەرى، «Hazifa» ءسان ءۇيىنىڭ ديرەكتورى، «كازبرەند» مۇشەسى، Hazifa برەندىنىڭ نەگىزىن قالاۋشىسى، «قۇرمەتتى دە ارداقتى ديزاينەر» اتاعىنىڭ يەگەرى، «ءداستۇر» سىيلىعىنىڭ لاۋرەاتى، ۇزدىك ەتنوديزاينەر قازيپا قالي قىزىنىڭ وزىنەن سۇراپ بىلدىك.
- قىتايدىڭ التاي قالاسىندا ونەرگە جاقىن وتباسىندا دۇنيەگە كەلدىڭىز. وسكەن ورتاڭىزدىڭ ءسىزدىڭ بۇگىنگىدەي تۇلعا بولىپ قالىپتاسۋىڭىزعا ىقپالى قانداي بولدى؟
- اكە-شەشەم مۋزىكانى، ءان سالعاندى جاقسى كورەتىن. سوندىقتان وتباسىمىزدا 5 بالا كىشكەنتايىمىزدان ءان مەن بيگە، قولونەر مەن سۋرەتكە جاقىن بولىپ وستىك. مەكتەپتەگى بۇكىل ءىس-شارالاردى جۇرگىزىپ، ءان سالىپ، بيلەۋدەن الدىما جان سالمادىم. انام قولى شەبەر تىگىنشى ەدى، ساحنالىق عانا ەمەس، كۇندەلىكتى كيىمدەرىمدى دە سان الۋان ەتىپ تىگىپ، قۋىرشاقتاي ساندەپ كيىندىرىپ قوياتىن. سودان ءسانقوي بولىپ، ادەمى كيىنۋدى ادەتكە اينالدىرىپ ءوستىم. ساحنا دەپ ءجۇرىپ ساباق ۇلگەرىمىمدى تومەندەتكەن ەمەسپىن.
الايدا وتباسىم مەنىڭ ءارتىس بولعانىمدى قالاعان جوق. ونىڭ ۇستىنە ول جاقتا ماماندىقتى ءوزىڭ تاڭداي المايسىڭ، ياعني سىناقتان العان بالل قاي ماماندىققا تۇسۋگە جەتەدى، سوعان تۇسەسىڭ. سونىمەن مەن اۋىلشارۋاشىلىعى تەحنيكالارى سالاسىنا وقۋعا ءتۇستىم. ءبىراق بۇل وقۋ ورنىندا دا بۇكىل كونسەرتتەر مەن ءىس-شارالاردىڭ باسى-قاسىندا ءجۇردىم. ونى ءبىتىرىپ، كوللەدجگە مۇعالىم بولىپ ورنالاسقان كەزدە دە بەلسەندى قىزمەتكەر رەتىندە ونەرىممەن تانىلدىم.
التاي قالاسىنداعى «اعاجاي» انسامبلىندە جۇرگىزۋشى ءارى ءانشى بولدىم، تەلەكونسەرتتەردى جۇرگىزدىم. بوي جەتىپ، تالعامىم وزگەرگەن سوڭ ۇستىمە ادەمى كوستيۋمدەردى انامنىڭ كومەگىمەن ءوزىم تىگىپ الاتىن بولدىم. ءبىر سالامەن قاراپ قالماي «قىتاي ءتىلى جانە قازاق تىلىندە جازبا اۋدارما» بويىنشا ەكىنشى، ونى بولعاسىن جوعارى دارەجەلى پارتيا مەكتەبىنەن «ەكونوميكا ساياساتى» دەگەن ءۇشىنشى ماماندىقتى وقىدىم.
- ومىرلىك ميسسياڭىز - تىگىنشىلىك جولعا قالاي كەلدىڭىز؟
- تىگىنشىلىك جولدى باستاۋىما 1994 -جىلى جاقىن قۇربىم تۇرمىسقا شىعاتىن بولىپ، قازاقستاننان الدىرعان توي كويلەگىن وعان قىسقارتىپ، جوندەپ تىگىپ بەرۋىم سەبەپ بولدى. كىشكەنتايىمنان شەشەمنىڭ قاسىندا تىگىنشىلىكتىڭ بارلىق بازالىق تەحنيكاسىن بالالىقپەن ەرمەك ەتىپ ءجۇرىپ، ۇيرەنىپ العان ەكەنمىن. سونداي-اق مەكتەپتە سۋرەتتى وتە جاقسى سالاتىنمىن. ويۋ-ورنەكتىڭ ءتۇر-ءتۇرىن قيۋ ماعان ەش قيىن ەمەس ەدى. اۋىلشارۋاشىلىعى سالاسىندا ءبىلىم العان كەزدە سىزۋ ساباعى دا مەنىڭ سۋرەتشىلىك قابىلەتىمنىڭ دامۋىنا سەپتىك ەتتى. ءسويتىپ الگى قۇربىمنىڭ كويلەگىن ادەمىلەپ وزگەرتكەنىم سونشا، تويدا وعان تامسانىپ، كوزى تۇسپەگەن ادام قالمادى. سودان «توي كويلەكتەر تىگىپ شىعارۋعا بولادى ەكەن عوي» دەگەن وي كەلدى.
وقۋىمدى ءبىتىرىپ، التايعا ورالاردا 10 ءتۇرلى كويلەكتىڭ سىزباسىن سالىپ، ماتەريالدارىن الىپ قايتتىم. جاز بويى سونى تىگىپ، قازان ايىندا 30 عا جۋىق ءار ءتۇرلى كويلەكپەن «ءاز-ءسان ۇلتتىق ويۋ-ورنەكتەرى» اتتى العاشقى دۇكەنىمدى اشتىم. دۇكەندى قوسىمشا قىز جاساۋى رەتىندە جاستىقتار، كورپە قاپتارى، كيىم مەن ساندىق جاپقىشتارمەن تولتىردىق. تىگەتىن كومەكشىلەرىم - تۋىستارىمىزدىڭ قىز-كەلىنشەكتەرى بولدى. سۇرانىس ارتقاسىن دۇكەن جانىنان شەبەرحانا جانە قىزمەتكەرلەر تۇراتىن جاتاقحانا دايىندادىق. پروكاتقا بەرەتىن دۇكەنىمدەگى توي كيىمدەرىنىڭ ورنەگىن سول كەزدە-اق تەك بيسەرمەن تىكتىك. ءتۇرلى كورمەلەرگە قاتىسىپ جۇلدەلەر الدىم، تاجىريبە جيناقتادىم.
- اتامەكەنگە كەلۋگە نە اسەر ەتتى؟
- بەيجىڭدە قازاقستاننان كەلگەن ءبىر قىزبەن تانىسىپ، سونىڭ ەلىمىز تۋرالى اڭگىمەسىنەن كەيىن اتامەكەنگە قونىس اۋدارۋعا نيەت پايدا بولدى. قۇجاتتار دايىنداپ، قازاقستاندا الەم تىلدەرى ۋنيۆەرسيتەتىندە قانداستارعا ارنالعان دايىندىق كۋرسىنان ءوتتىم. كەلە سالىپ، جەكە پاتەر جالداپ، ەكى قىزبەن اتەلەمدى اشىپ تاستادىم. قىتايعا بارىپ، جۇمىسىمنان شىعىپ، ءبىر چەمودانىمدى كوتەرىپ، ەلگە 1998 -جىلى ءبىرجولاتا كوشىپ كەلدىم. قاز ۇ ۋ-دىڭ ەكونوميكا فاكۋلتەتىنە ماگيستراتۋراعا قۇجات تاپسىردىم. اتەلەمدى الماتىداعى «اسەم» بيزنەس ورتالىعىنا كوشىردىم. بۇل ءبىر جاعى ۇيرەنىپ قالعان كاسىبىم بولسا، ەكىنشىدەن اتامەكەنگە كەلگەندەگى تابىس كوزىم بولدى. ال ۇشىنشىدەن، قىتايدا جۇرگەندە ەكونوميكا سالاسىندا ءبىلىم الا وتىرىپ، دامىعان ەلدەردىڭ ساياساتىن زەرتتەگەندە، مەنىڭ تاقىرىبىم - كەڭەس ۇكىمەتى ەلدەرىنىڭ ەكونوميكالىق جاعدايى بولدى.
سول كەزدە قازاقستاننىڭ ىشكى ءوندىرىسىن، دامۋ بارىسىن، تاۋەلسىزدىك العاننان كەيىنگى جاعدايىن زەرتتەپ، تۋعان ەلگە دەگەن جاناشىرلىقپەن، وسىندا كەلىپ، ونى دامىتۋعا، اقساپ تۇرعان تۇسىنان كومەك بەرۋگە ۇلەس قوسۋىم كەرەك دەگەن وي، سەزىم تۋىندادى. ءوزىمدى ەلىمە كەرەك سەزىندىم. كەلىپ، اتەلە اشقان سوڭ ءبىرىڭعاي قازاق ءتىلدى ايەلدەردى جۇمىسقا الدىم. 40 قا جۋىق ادامعا جۇمىس بەردىم. ونەر جارىم-جارتى ءبىلىمدى قاجەت ەتپەيدى، سوندىقتان «سىمبات- ءسان» اكادەمياسىنىڭ ءۇشىنشى كۋرسىنا تىگىن تەحنولوگياسى بويىنشا وقۋعا ءتۇستىم. بۇل - مەنىڭ وسىمەن التىنشى وقۋىم ەدى. 1999 -جىلدارى وقۋدى دا وقىپ، تىگىن اتەلەمدى دە دامىتىپ، اتامەكەندەگى جۇمىسىم ورگە باستى.
- قازاقستاندا كاسىپ جۇرگىزۋدە قانداي قيىندىقتار كەزدەستى؟
- تىگىنشىلىك بۇگىن تاپسىرىس بەرىپ، ەرتەڭ جوق دەپ قاراپ وتىراتىن كاسىپ ەمەس، ونى ىستەگەسىن، تىگىنشىلەرگە ۇنەمى ۇزىلمەيتىن جۇمىس تاۋىپ بەرۋىڭ كەرەك. قاشان تاپسىرىس بەرەدى ەكەن دەپ كۇتىپ وتىرساڭ اش قالاسىڭ. سوسىن باراحولكا بازارىنداعى بۋتيكتەردىڭ ساۋداگەرلەرىنە پالتو تىگىپ ساتۋ تۋرالى ۇسىنىس ايتتىم. ءسويتىپ 14 ساۋدا نۇكتەسىمەن كەلىسىم ورناتىپ، ولاردى تاۋارمەن قامتاماسىز ەتىپ تۇردىق. وسىلايشا، قول استىمداعى قىزمەتشىلەرىمنىڭ جۇمىس ورنىن ساقتاپ قالدىم. اتەلەدەگى كەلىنشەكتەردىڭ كۇيەۋلەرى دە جۇمىسسىز قالماسىن دەپ، سەرىپپەلى ماتراتس جاسايتىن سەح اشتىم. سول ارالىقتا حالىقارالىق بايقاۋدا «ەڭ سىرباز مودەل» دەگەن جۇلدەنى جەڭىپ الدىم. «ازيا داۋىسى» فەستيۆالى اياسىندا حالىقارالىق جاس مودەلەرلەردىڭ بايقاۋىندا باس جۇلدە بۇيىردى. كيىمدەرىمدى تانىمال انشىلەر كيدى.
جۋرناليستەردىڭ كوزىنە ءتۇسىپ، جۇلدىزدى ساتتەرىم باستالىپ كەتتى. وسىلاي شاپقىلاپ جۇرگەندە 2000 -جىلى جول اپاتىنا ءتۇسىپ، اياعىمنان جاراقات الدىم. بار قاراجاتىم ەم-دومعا جۇمسالدى. تالاي اۋىر وتالار جاساتتىم. كاسىبىم تۇرالاپ قالدى. ءبىراق سوندا دا بولسا قۇر جاتا المادىم، ورىس ءتىلىن ۇيرەنىپ، ودان ءارى دامۋعا بار كۇشىمدى سالدىم. اياقتالماعان وقۋىمدى ۇيدە وتىرىپ ءوز بەتىمشە جالعاستىردىم، كيىمدى كەسىپ-ءپىشۋ تەحنولوگياسىن قىتاي تەورياسىمەن سالىستىرا وتىرىپ، «كيىمدى كەسىپ-ءپىشۋدىڭ قىسقارتىلعان ءۇش ولشەم تەورياسى» دەگەن كىتابىمدى جازدىم. ويۋ-ورنەكتەردى ءۇي بۇيىمدارىمەن بايلانىستىرىپ، سىزا باستادىم، پەردەلەردىڭ ءتۇر-ءتۇرىن جوبالادىم. كەستەلى ويۋلارى بار تۇسكيىزدىڭ زاماناۋي ۇلگىسى رەتىندە كومپوزيتسيالىق قۇرىلىمى ءار ءتۇرلى پانو كارتينالار جاسادىم.
- ءتۇن ارتىنان كۇن شىعاتىنى سياقتى بۇل سىناقتى ەڭسەرگەنىڭىز قازىر ايقىن كورىنىپ تۇر. سول كەزدە سىزگە نە نارسە دەم بەردى؟
- قايدا بارسام دا، قايدا جۇرسەم دە ۇلتتىق ويۋ-ورنەكتەرىمىزدى دارىپتەۋگە، ناسيحاتتاۋعا، زامانعا ساي ەتىپ قايتا جاڭعىرتۋعا تىرىسامىن. ويۋ-ورنەك بىرەۋگە قىزىق، بىرەۋگە تاڭسىق، بىرەۋگە شيماي بولىپ كورىنەتىن شىعار. ال سول شيماي مەنىڭ ءومىرىمدى جاڭعىرتتى. سونىڭ ارقاسىندا ەسىمدى جيناپ، ۇمىتقانىمنىڭ ءبارى سانامدا قايتا جاڭعىردى. ەكى اياعىمدى تەڭ باسىپ، ورنىمنان تۇردىم، تايانعان بالداعىمدى قوقىسقا تاستادىم. سول ويۋ-ورنەكتىڭ ارقاسىندا ەتنو-ديزاينەر بولدىم. «ۇلتتىق ۇلگىدەگى ءۇي بۇيىمدارى» اتتى شىعارماشىلىق جوبامدى قايتادان قولعا الىپ، ءتۇرلى ويۋ-ورنەكتەردى زەرتتەپ، ۇلگىلەرىن جاساۋمەن اينالىستىم. «حابار» تەلەارناسىنداعى «ۇلتتىق قازىنا» تەلە بايگەسىنىڭ، «قازاقستان» تەلەارناسىنداعى ۇلتتىق «ناۋرىز» سىيلىعىنىڭ جەڭىمپازى بولدىم. كاسىپپەن اينالىسىپ ءجۇرىپ تەز شەشىم قابىلداۋعا، جىلدام ارەكەت ەتۋگە ۇيرەنەسىڭ. 5-6 ايدىڭ ىشىندە ءبىراز قارجى جيناپ، ۇلتتىق ناقىشتاعى ءۇي بۇيىمدارىن جاساۋدى قولعا الدىم. ءسويتىپ قازىرگى Hazifa جوعارى ساپالى ءۇي بۇيىمدارى برەندىنىڭ نەگىزى قالاندى.
- استاناعا 2010 -جىلى كەلىپسىز. باس قالادا بيزنەسىڭىز قالاي دامىدى؟
- 2016 -جىلى استاناداعى ۇلتتىق مۇراجايدا تاۋەلسىزدىكتىڭ 25 جىلدىعىنا ارنالعان «ۇلى دالا مۇراسى» اتتى ۇلكەن كورمەم ءوتتى. ونىڭ ىشىندە 25 جىلدىققا وراي ويۋ-ورنەكتەرى ءبىر-ءبىرىن قايتالامايتىن 25 ءتۇرلى پانو كارتينام، 25 مەترلىك قىزىل كەستەلى جول كىلەمشەم قويىلدى. 2017 -جىلى ەكسپو كورمەسى اياسىندا تاۋەلسىزدىك سارايىندا تاعى كورمەم ءوتتى، وعان 17 ءتۇرلى ويۋلى پەردەلەر قويدىم. سونىمەن قاتار كەستەلەنگەن داستارحاندار، كورپە جاپقىشتار، توسەك قاپتار، كورپەلەر، جاستىقتار قويىلدى.
ودان كەيىن دە گەرمانيا، فرانسيا، دۋباي، بەلارۋسسيا سياقتى شەتەلدەردە وتكەن كورمەلەرگە قاتىستىم. بىرنەشە دۇكەندەر اشىپ قويدىم. الايدا كارانتين كەزىندە ءبارى جابىلدى. پاندەميادا جۇمىس توقتادى، ءبىراق تاعى قاراپ وتىرماي، ونلاين شەبەرلىك ساباعىن ۇيىمداستىردىم. ۇيدە وتىرعان قىز-كەلىنشەكتەرگە، كوپ بالالى انالارعا، از قامتىلعان وتباسىلارداعى ايەلدەرگە ارناپ «70 ساباق. 70 بۇيىم. شەبەرلىككە جەتەلەيتىن 70 قادام» دەگەن تەگىن ساباقتى الەۋمەتتىك جەلىلەر ارقىلى وتكىزدىم. باستامانى ءوزىم كوتەردىم، كەيىن «وتانداستار» قورىنىڭ ۇسىنىسىمەن جانە ق ر مادەنيەت مينيسترلىگىنىڭ قولداۋىمەن «قازيپا وتانداستار» مەكتەبى دەپ ونلاين ساباق بەردىم. سونىمەن قاتار استانا قالالىق جۇمىسپەن قامتۋ ورتالىعى جانە «اتامەكەن» ۇ ك پ قارجىلاندىرۋىمەن جىلىنا ءبىر رەت وتكىزىلەتىن جوسپارلى شەبەرلىك مەكتەبىم بار.
- قولىڭىزدان كەلمەيتىنى جوق، كاسىبىڭىز دە سان ءتۇرلى باعىتتا دامىپ كەلەدى ەكەن. قازىر قانداي جوبالار بويىنشا جۇمىس جۇرگىزەسىز؟
- قورجىنىما 1000 عا جۋىق ويۋ-ورنەك جينالدى. ولاردى ءار ءتۇرلى تاسىلمەن قولدانىپ ءجۇرمىن. كويلەك تىگۋدە ورگانزا، سەتكا ماتەريالداردى قولدانۋدى العاش بولىپ ەنگىزدىم. تاعى ءبىر ۇلەسىم - ۇلتتىق ناقىشتاعى جوعارى ساپالى ءۇي بۇيىمدارىنىڭ كەستەلەنگەن تۇرىنەن تولىق ۇلكەن توپتاماسىن جاساپ شىعۋىم. بۇل بۇرىن سوڭدى بولماعان دۇنيە. 100 دەن استام ءۇي بۇيىمدارىنىڭ توپتاماسى بار. سوعان قوسا قازىرگى كەزدە سول ويۋ-ورنەكتەردى پرينتتەۋ، ماتاعا تاڭبالاۋ، باستىرۋ ادىسىمەن ءار ءتۇرلى بۇيىمدار جاساپ ءجۇرمىن.
كيىممەن قوسا ءتۇرلى كومپوزيتسياداعى ماتالار شىعارىپ جاتىرمىن. 70 تەن استام كيىم ۇلگىلەرى بولسا، 50 دەن اسا ماتا بۇيىمدارىنىڭ ديزايندەرىن شىعاردىم. ولاردىڭ تۇرلەرى ءبىرىن-ءبىرى قايتالامايدى. ءبىر وكىنىشتىسى، بۇل ماتالاردى تۇركيادا جاساتامىن. سەبەبى ەلىمىزدە بۇل جاعىنان ءوندىرىس دامىماعان. جوعارى وقۋ ورىندارىمەن دە ديزاين كافەدراسى ستۋدەنتتەرىنىڭ تاجىريبەدەن وتەتىن الاڭى رەتىندە بىزگە كەلىپ جۇمىس ىستەۋىنە مۇمكىندىك بەرىپ، ىنتىماقتاستىق ورناتتىق. مەنىڭ تىگىپ بەرگەن كيىمدەرىم ارقىلى كاسىبىن جۇرگىزەتىن بىرنەشە برەندتەرمەن جۇمىس ىستەيمىن. 30 جىل بويى قازاقتىڭ ويۋ-ورنەكتەرىن كيىممەن، بۇيىمدارمەن بايلانىستىرىپ كەلدىم. ويۋلاردى ءار ءتۇرلى باعىتتا كومپوزيتسيا ەتىپ قولدانۋدى زەرتتەدىم، ونى ماتالارعا، كيىمدەرگە، ءتۇرلى بۇيىمدارعا قوندىرۋمەن اينالىستىم. وسى مەنىڭ ۇلتتىق قولونەردەگى وزىندىك قولتاڭبام دەپ سانايمىن.
- بولاشاق كاسىپ اشقىسى كەلەتىن جاندارعا قانداي كەڭەس بەرەر ەدىڭىز؟
- كاسىپ باستاماس بۇرىن، سول سالادا تاجىريبەڭىز بولۋى كەرەك. ءوز باسىم، ءبىر ءىستى ۇناتسام، بەتىن سيپاپ قانا قويماي، ونى ىشىنە ءۇڭىلىپ، تەرەڭدەي زەرتتەپ بارىپ، كىرىسەمىن. قازاقستاندا جۇمىس ىستەيمىن، كاسىپ اشامىن دەگەن ادامعا مۇمكىندىك كوپ. تەك ءوزىڭ سول سالانى تەرەڭ مەڭگەرىپ، قورىقپاي كىرىسسەڭ المايتىن اسۋ بولمايدى. جالپى بىلەرىم، بويىمدا شىعارماشىلىق شابىت شەكسىز. بىرەۋى بىتسە، ەكىنشىسى شىعىپ جاتادى.
وعان قوسا ءبارىن ادال ەڭبەكپەن، ءوز بويىمنان تولىق وتكىزىپ بارىپ اتقارامىن. قولعا العان ءىسىڭ جۇرەگىڭە جاقىن بولۋى قاجەت. تالانت پەن جىگەر دە كەرەك. قازىرگى تاڭدا نەگىزگى تسەحىمىز الماتىدا. استانادا بىرنەشە دۇكەندەرىمىز، ءسان ورتالىقتارىمىز، فوتو ستۋديامىز، باسقا دا نىساندارىمىز بار. بارلىعى 30 شاقتى ادامدى جۇمىسپەن قامتىپ وتىرمىز.
كيىمدەرىمىزدىڭ ساپاسى جوعارى، ءتۇرلى ماتاعا ويۋلانىپ، كەستەلەنىپ تىگىلگەنىنە قاراماستان باسقا نارىقتاعى ديزاينەرلەردىڭ ونىمدەرىنەن باعاسى تومەن. سەبەبى مەن وزىندىك قۇنىن كوتەرمەۋ ءۇشىن جۇمىس كۇشىن وڭتايلى پايدالانىپ، باسى ارتىق قىزمەتتەرگە ماماندار الماي، كوبىن ءوزىم اتقارا بەرەمىن. ەندىگى ارمانىم - بۇگىنگە دەيىن جيناعان بار ءبىلىمىم مەن تاجىريبەمدى كەيىنگى بۋىنعا ۇيرەتىپ كەتۋ ءۇشىن جەكە مەكتەبىمدى اشۋ. مەنىڭ تۇسىنىگىمدە، ۇلتىڭدى ءسۇيۋ سول ەلىڭنىڭ سالت-ءداستۇرى مەن قۇندىلىقتارىن جوعارى باعالاۋمەن ولشەنەدى. زامان تالابىنا ساي ويۋ-ورنەكتەرمەن كەستەلەنگەن ۇلتتىق بۇيىمدارىمىزدىڭ كەز كەلگەن ءبىر نۇسقاسى تۋعان حالقىمنىڭ كادەسىنە جاراسا، ەڭبەگىمنىڭ اقتالعانى دەپ بىلەمىن.
رايحان راحمەتوۆا
