قازاقتىڭ ۇلتتىق كيىمى گيننەستىڭ رەكوردتار كىتابىنا ەنگىزىلمەك
استانا. قازاقپارات - قازاقتىڭ ۇلتتىق كيىمى گيننەستىڭ رەكوردتار كىتابىنا ەنگىزىلمەك. تەڭىز جاعالاۋىندا ۇيىمداستىرىلاتىن الەمدىك جيىنعا ۇلتتىق كيىم كيگەن 5 مىڭ ادام كەلمەك، دەپ حابارلايدى Almaty.tv ءتىلشىسى.
يدەيا اۆتورى - اسەمگۇل ادامباي. ۇيىمداستىرۋشى بۇل ءىس-شارا ارقىلى كوپتى ۇلتتىق باعىتقا ۇيىستىرۋدى كوزدەيدى. باستى ماقسات - قازاقتىڭ كيىمىن، ونىڭ باي مادەنيەتىن ناسيحاتتاۋ. تاريحي كۇندە عاسىرلار بويى ءوڭى مەن ءسانىن جويماعان قازاق كيىمى وسىلايشا، جاڭاشىلدىقپەن ۇيلەسىم تاپپاق.
«قازاقتىڭ ۇلتتىق كيىمى الەمگە تانىلۋعا لايىق دەگەن ويمەن ماڭعىستاۋ حالقىنىڭ اتىنان قاڭتاردا ءبىرىنشى رەت گيننەس رەكوردى شتاب كۆارتيراسىنا ءوتىنىم بەرىلدى. ودان كەيىن كەلىسسوزدەردە كوپ تالاپتار قويىلدى. ەڭ ءبىرىنشى - قاۋىپسىزدىك. ارنايى ورىن بولادى. ول جەر قورشاۋعا الىنادى، - دەدى يدەيا اۆتورى اسەمگۇل ادامباي.
اتالعان جيىنعا 16 جاستان اسقان كەز كەلگەن قازاقستان ازاماتى قاتىسا الادى. ول ءۇشىن تەك ارنايى اشىلعان سايتقا تىركەلۋ كەرەك. سايتتا كيىمدەردىڭ ارنايى كاتالوگى جاساقتالعان. سول تىزىمگە ساي، ءار قاتىسۋشى ۇلتتىق كيىمدى كيىپ كەلۋى قاجەت.
«ەرتەرەك كەلىپ، وزىنە ارنالعان نومەردى الىپ، ورىنىنا تۇرۋى كەرەك. لوندوننان كەلەتىن گيننەس رەكوردتار ۇجىمى ەرەجەلەردى تۇسىندىرەدى. ساناق جۇرگىزىلگەن كەزدە ادامدار ورنىنان قوزعالماي تالاپتى ورىنداسا، گيننەس رەكوردتار كىتابىنا قازاق ۇلتتىق كيىمىمەن ەنەمىز دەگەن ويدامىز، - دەدى يدەيا اۆتورى اسەمگۇل ادامباي.
ايتا كەتەيىك، ءىس-شارادا الەمگە ۇلتتىق كيىمنەن بولەك، قولونەر تۋىندىلارى دا تانىستىرىلماق. ال ۇيىمداستىرۋشىلار باي تاريحىمىز ارقىلى الەم نازارىن اۋدارىپ، قازاقستانعا كەلەتىن تۋريست سانىن ارتتىرۋدى كوزدەپتى.
«اسەمگۇل حابارلاسىپ «ۇلتتىق كيىمدەر تۋرالى نە بىلەسىز؟ بەرىڭىزشى» دەدى. مەن قولىمدا بار ماتەريالمەن كومەكتەسىپ، 10-15 ۇلتتىق كيىمدى سۋرەتىمەن اننوتاتسياسىن جىبەردىم. گيننەستىڭ رەكوردتار كىتابىنا ەنۋ دەگەن ول ءبىر ادام قولى جەتپەيتىن ۇلكەن نارسە ەمەس، ءبىراق حالىق قولداسا، جۇمىلسا ىسكە اسپايتىن نارسە جوق، - دەدى ق ر مادەنيەت سالاسىنىڭ ۇزدىگى تامارا جۇماليەۆا.
اتالعان ءىس- شارا 22-ناۋرىز كۇنى ساعات 9:00-10:30 اراسىندا وتەدى. ال قاۋىپسىزدىك شارالارىن قاتاڭ ساقتاۋ ماقساتىندا 2 كۇن بۇرىن دايىندىق باستالماق.
