قازاقستاننىڭ جاڭا دامۋ باعدارى: پرەزيدەنت بۇگىن جولداۋىن جاريالايدى

- 28-قازاندا تۇسكە دەيىن جىلداعى داستۇرگە ساي قازاقستان حالقىنا جولداۋىمدى جاريالايمىن. قازىر وسى ماڭىزدى قۇجاتتىڭ ماتىنىمەن جۇمىس ىستەپ جاتىرمىن، - دەپ جازعان ەدى پرەزيدەنت Х الەۋمەتتىك جەلىسىندە.

ەستەرىڭىزگە سالا كەتسەك، مەملەكەت باسشىسى قاسىم-جومارت توقايەۆ VI دۇنيەجۇزىلىك كوشپەندىلەر ويىندارى جەڭىمپازدارىن ماراپاتتاۋ راسىمىندە قازان ايىندا قازاقستان حالقىنا جولداۋ جاساپ، الداعى جوسپارلاردى ايقىندايتىنىن ايتتى.

- ۆيسە-پرەزيدەنت تاعايىندالدى. جاڭارتىلعان ۇكىمەت جۇمىسىنا كىرىستى. قاۋىپسىزدىك كەڭەسىنىڭ اپپاراتى جاساقتالدى. كوپ ۇزاماي قازاقستان حالىق كەڭەسىنىڭ قۇرامى بەكىتىلەدى. قۇرىلتايدىڭ كەلىسىمىمەن كونستيتۋتسيالىق سوت سۋديالارى، ورتالىق سايلاۋ كوميسسياسى مەن جوعارى اۋديتورلىق پالاتانىڭ مۇشەلەرى تاعايىندالادى. وسىلايشا ەلىمىزدىڭ نەگىزگى مەملەكەتتىك ينستيتۋتتارى تولىق جاڭعىرتىلادى. بۇل دا اۋقىمدى رەفورمالارىمىزدىڭ وتە ماڭىزدى بولىگى. ال قازان ايىندا مەن كونستيتۋتسيانىڭ 46-بابىنا سايكەس قازاقستان حالقىنا جولداۋ جاساپ، الداعى جوسپارىمىزدى ايقىندايمىن، - دەگەن بولاتىن مەملەكەت باسشىسى.

مەملەكەتىمىزدىڭ الدىندا تۇرعان ناقتى مىندەتتەر مەن جوسپارلار جاريالاناتىن القالى جيىنعا قۇرىلتاي دەپۋتاتتارى، ورتالىق جانە جەرگىلىكتى مەملەكەتتىك ورگانداردىڭ باسشىلارى، ۇكىمەتتىڭ جانە حالىق كەڭەسىنىڭ مۇشەلەرى، قوعام وكىلدەرى مەن ەڭبەككەرلەر قاتىسادى.

جولداۋ ساعات 11:00-دەن باستاپ رەسپۋبليكالىق تەلەارنالاردان، سونداي-اق اقوردانىڭ الەۋمەتتىك جەلىلەردەگى رەسمي پاراقشالارىنان تىكەلەي ەفيردە كورسەتىلەدى. ونلاين ترانسلياتسيا Jibek Joly ەفيرىندە، سونداي-اق تەلەارنانىڭ YouTube ارناسىندا جانە Kazinform سايتىندا جۇرەدى. سونداي-اق جولداۋ ءماتىنىن اگەنتتىكتىڭ تەلەگرام ارناسىنان وقي الاسىزدار.

ايتا كەتەيىك، مەملەكەت باسشىسى قاسىم-جومارت توقايەۆتىڭ مۇنىڭ الدىنداعى جولداۋى «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى سيفرلىق وزگەرىستەر ارقىلى شەشۋ» دەگەن تاقىرىپپەن 2025 -جىلىدڭ 8 -قىركۇيەگىندە جاريالاندى.

جولداۋداعى تاپسىرمالار نەگىزىنەن سيفرلىق ترانسفورماتسيا، ينۆەستيتسيا تارتۋ، ءوندىرىستى ءارتاراپتاندىرۋ، ينفراقۇرىلىمدى جاڭعىرتۋ، سۋ جانە جەر رەسۋرستارىن ءتيىمدى پايدالانۋ، سونداي-اق ادامي كاپيتالدى دامىتۋ باعىتتارىن قامتيدى.

قازاقستاندى ءۇش جىل ىشىندە جاپپاي سيفرلىق ەلگە اينالدىرۋدى كوزدەگەن جولداۋ اياسىندا سيفرلاندىرۋ مەن جاساندى ينتەللەكتىنى دامىتۋعا ارنالعان سيفرلىق كودەكس پەن «Digital Qazaqstan» اتتى تۇجىرىمدامالىق قۇجات قابىلداندى. جاساندى ينتەللەكت جانە سيفرلىق دامۋ مينيسترلىگى قۇرىلدى. Alatau City-گە ارنايى مارتەبە بەرۋ تۋرالى جارلىق ازىرلەنىپ، قالانىڭ باسقارۋ رەجيمىن، قارجىلىق مودەلىن جانە باسقا دا ماسەلەلەرىن رەتتەيتىن جەكە زاڭ قابىلداندى.

ۇكىمەت تاراپىنان نۆەستيتسيا تارتۋ جونىندەگى ناقتى ۇسىنىستار، بانكتەردىڭ قاراجاتىن ەكونوميكانىڭ ناقتى سەكتورىنا تارتۋدىڭ ءتيىمدى تەتىكتەرى ازىرلەندى. بانكتەر تۋرالى جاڭا زاڭ كۇشىنە ەندى.

«كەلەشەك مەكتەپتەرى» جوباسى ىسكە اسىپ، وقۋشىلارعا ارنالعان جاساندى ينتەللەكت نەگىزدەرى بويىنشا وقۋ باعدارلامالارى مەن ماتەريالدارى ازىرلەندى. قاشىقتان وقىتۋ مەن جاساندى ينتەللەكت نەگىزىندە «Qazaq Digital Mektebi» مودەلى دايىندالدى. جاساندى ينتەللەكت بويىنشا پاندەردى بارلىق باعىت بويىنشا ءبىلىم بەرۋ باعدارلامالارىنا مىندەتتى تۇردە ەنگىزۋدى كوزدەيتىن جوعارى جانە جوعارى وقۋ ورنىنان كەيىنگى ءبىلىم بەرۋدىڭ مەملەكەتتىك جالپىعا مىندەتتى ستاندارتىنا وزگەرىستەر ەنگىزىلدى. Al-Sana باعدارلاماسى ارقىلى شامامەن 100 مىڭ ستۋدەنت تەحنولوگيالىق جوبالارعا تارتىلدى.