قازاقستاننىڭ ۇزدىك ونەرتاپقىشتارى ماراپاتتالدى
ەلوردادا ونەرتابىس سالاسىنداعى جەتىستىكتەردى پاش ەتەتىن «شاپاعات-2023» رەسپۋبليكالىق بايقاۋىنىڭ جەڭىمپازدارى ماراپاتتالدى، دەپ حابارلايدى Kazinform.
ونەرتابىس سالاسىنداعى جەتىستىكتەر بايقاۋى 2004-جىلدان بەرى وتكىزىلىپ كەلەدى. جيىرما جىلعا جۋىق ۋاقىت ارالىعىندا 200 گە جۋىق وتاندىق ونەرتاپقىشتار مەن زيالى قاۋىم «شاپاعات» بايقاۋىنىڭ جەڭىمپازى اتانعان.
ال 2013-جىلدان بەرى «قازاقستان رەسپۋبليكاسىنىڭ ەڭبەك سىڭىرگەن ونەرتاپقىشى» نوميناتسياسى بەرىلىپ كەلەدى.
«قۇرمەتتى قاتىسۋشىلار! «شاپاعات» بايقاۋى - تالانتتى ونەرتاپقىشتار مەن راتسيوناليزاتورلار ءۇشىن ءوز جەتىستىكتەرىن كورسەتۋگە جانە ەڭبەگى ءۇشىن ماراپات الۋعا بىرەگەي مۇمكىندىك. بيىل بايقاۋ 18-رەت وتۋدە جانە وسى ۋاقىت ىشىندە ول ونەرتابىس پەن تالانتتىڭ ناعىز مەرەكەسىنە اينالدى. جىل سايىن بۇل شارا جاڭا ونەرتابىستار مەن جاڭا تەحنولوگيالار، ءومىردى جاقسى جاققا وزگەرتە الاتىن سەرپىندى جوبالار جاساعان جۇزدەگەن تالانتتى ادامداردىڭ باسىن قوسادى. بۇگىن ءبىز «شاپاعات» بايقاۋىنىڭ جەڭىمپازدارىنا قۇرمەت كورسەتەمىز، ولار وزدەرىنىڭ تالانتىمەن جانە ەڭبەكقورلىعىمەن ەلىمىزدەگى ونەرتاپقىشتىق ءىستىڭ دامۋىنا باعا جەتپەس ۇلەس قوسۋدا. ءبىزدىڭ وتاندىق جاڭالىقتارىمىز ءوندىرىس تيىمدىلىگىن ارتتىرۋعا، ءومىر ءسۇرۋ ساپاسىن جاقسارتۋعا جانە ەلىمىزدىڭ وركەندەۋىن نىعايتۋعا ىقپال ەتەتىنىنە سەنىمدىمىن. سىزدەردى شىعارماشىلىق- ونەرتاپقىشتىق بەلسەندىلىك، وي قوزعالىسى مەرەكەسىمەن قۇتتىقتايمىن! جاڭا جەمىستەر مەن تاماشا شەشىمدەردىڭ ورىنداۋىن تىلەيمىن!»، - دەپ قۇتتىقتادى ق ر ادىلەت ءمينيسترى ازامات ەسقارايەۆ سالتاناتتى كەشتىڭ اشىلۋىندا.
بيىل ەلىمىزدىڭ وننان استام وڭىرىنەن 150-دەن استام قاتىسۋشى «جىلدىڭ ەڭ ۇزدىك ونەرتابىسى»، «ونەرتاپقىش ايەل»، «ۇزدىك يننوۆاتسيالىق كومپانيا»، «جاس ونەرتاپقىش»، «جاس دارىن» نوميناتسيالارى بويىنشا سونداي-اق «قازاقستان رەسپۋبليكاسىنىڭ ەڭبەك سىڭىرگەن ونەرتاپقىشى» قۇرمەتتى اتاعى ءۇشىن دوداعا تۇسكەن بولاتىن.
جەڭىمپازدار كونكۋرستىق كوميسسيا وتىرىسىنىڭ قورىتىندىسى بويىنشا داۋىس بەرۋ ارقىلى انىقتالعان. كوميسسيا قۇرامىنا ق ر پرەزيدەنتى جانىنداعى ۇلتتىق عىلىم اكادەمياسى، «dara» پرەزيدەنتتىك باستامالار قورى، ق ر عىلىم جانە جوعارى ءبىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم كوميتەتى، قر دەنساۋلىق ساقتاۋ مينيسترلىگى، حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى، «اتامەكەن» ۇكپ، «QazInnovations» يننوۆاتسيالىق دامۋ ۇلتتىق اگەنتتىگى، «QazTrade» ساۋدا ساياساتىن دامىتۋ ورتالىعىنىڭ وكىلدەرى ەنگەن.
وسىلايشا «ق ر ەڭبەك سىڭىرگەن ونەرتاپقىشى» قۇرمەتتى اتاعى س. د. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى تراۆماتولوگيا جانە ورتوپەديا كافەدراسىنىڭ پروفەسسورى، مەديتسينا عىلىمدارىنىڭ دوكتورى ەرعالي نابيەۆكە بەرىلدى.
جەڭىمپازعا ارنايى لەنتا، ەستەلىك ديپلوم جانە 1 ميلليون تەڭگە سوماسىندا اقشالاي سىياقى تابىس ەتىلدى.
«جىل ونەرتابىسى» نوميناتسياسىندا «ءۇلبى مەتاللۋرگيا زاۋىتى» اكسيونەرلىك قوعامى جەڭىمپاز اتاندى. بۇل زاۋىت «تيتان بەريلليدىنەن ءىرى گاباريتتى دايىنداما مەن بۇيىم الۋ ءتاسىلى» ونەرتابىسىنا 35417№ پاتەنتىنىڭ يەسى.
اۆتورلارى: كولماكوۆ م. گ.، ۋدارتسيەۆ س. ۆ. ارينوۆا ي. ۆ.، زورين ب. ل.، فومينوۆ گ. يۋ.، ۆەچكۋتوۆ ا. ن.، بوگاچيەۆ ۆ. ا.
«ونەرتاپقىش حانىم» اتالىمىندا تەحنيكا عىلىمدارىنىڭ دوكتورى ساۋلە مارات قىزى بازاربايەۆا جەڭىمپاز اتاندى. ول 35729№ «الىنعان ونىمدەردى قۇرىلىس ماتەريالدارىنا كادەگە جاراتۋ ارقىلى شلامداردا حرومدى (VI) دەتوكسيكاتسيالاۋ ءتاسىلى» پاتەنتىنىڭ بىرلەسكەن اۆتورى.
«جاس ونەرتاپقىش» نوميناتسياسىندا PhD دوكتورى الەكساندر سەرگەيەۆيچ بارۋكين جەڭىمپاز اتاندى. ول ءبىرقاتار پاتەنتتەردىڭ يەلەنۋشىسى جانە اۆتورى.
«ۇزدىك يننوۆاتسيالىق كومپانيا» نوميناتسياسىندا ا. ب. بەكتۇروۆ اتىنداعى حيميا عىلىمدارى ينستيتۋتى جەڭىمپاز.
بۇل ۇيىم - 1997-جىلى بەرىلگەن ق ر ونەرتابىسىنا العاشقى پاتەنتتىڭ، سونداي-اق 1025 قورعاۋ قۇجاتتارىنىڭ، ونىڭ ىشىندە 60 شەتەلدىك، ك س ر و- نىڭ 40 تان استام، رەسەي فەدەراتسياسى مەن ەۋرازيالىق پاتەنتتەرىنىڭ يەگەرى.
«جاس دارىن» نوميناتسياسىندا اتىراۋ قالاسى، IT- مەكتەپ-ليتسەيىنىڭ 11- سىنىپ وقۋشىسى قىدىرباي قازىبەك جەڭىمپاز اتاندى. ول «گاز بەن ورتتەن قورعاۋ جۇيەسى» جوباسىنىڭ اۆتورى.
سونىمەن قاتار، جاس بۋىندى ىنتالاندىرۋ ماقساتىندا «جاس دارىن» نوميناتسياسى بويىنشا «ونەرتابىس سالاسىنداعى يننوۆاتسيالىق جوبالارى ءۇشىن» 5 ديپلومانت انىقتالدى.
ولار - پاۆلودار زياتكەرلىك مەكتەبىنىڭ وقۋشىلارى ءميرالى يبرايەۆ، زارينا سەگىزبايەۆا، ورال قالاسىنان نۇرسۇلتان زينۋللين، تاراز قالاسىنان ءاديا كەرىمقۇلوۆا، استانادان نۇرتورە ارنۇر ۇلى، الماتىدان كارولينا دوسكەمپىروۆا.
ەستەرىڭىزگە سالا كەتەيىك «شاپاعات» رەسپۋبليكالىق كونكۋرسىن جىل سايىن ق ر ادىلەت مينيسترلىگى ەلىمىزدەگى ونەرتاپقىشتىق بەلسەندىلىكتى ارتتىرۋ ماقساتىندا وتكىزىپ كەلەدى.
