قازاقستاننىڭ UFC تۋرنيرىن وتكىزۋ مۇمكىندىگى بار ما
استانا. KAZINFORM - ەلىمىزدىڭ حالىقارالىق دەڭگەيدەگى UFC ءتۋرنيرىن وتكىزۋگە تولىق مۇمكىندىگى بار ما؟ بۇل ساۋالعا ماماندار جاۋاپ بەردى.
ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا «م م ا سپورتى قارقىندى دامىپ كەلەدى. جاقىندا UFC پرەزيدەنتى دانا ۋايت قازاقستاندا تۋرنير وتكىزۋگە قارسى ەمەس ەكەنىن جانە بولاشاق جوسپاردا بارىن ايتتى. وسى ورايدا استانا الەمدىك تۋرنيردى قابىلداي الا ما؟» دەگەن ساۋال قويىلدى.
- ارينە، تۋرنيرگە قىزىعۋشىلىق تانىتىپ وتىرمىز. بۇعان دەيىن ايتقانىمداي، قالانىڭ ينفراقۇرىلىمى مەن اۋقىمدى كولەمدەگى قوناقتاردى قابىلداۋعا قاۋقارى بار. ءبىزدىڭ الاڭ حالىقارالىق ستاندارتتار مەن تالاپتارعا تولىق سايكەس كەلەدى. بۇل قالانىڭ ەكونوميكاسى ءۇشىن مۋلتيپليكاتيۆتى اسەر بەرەدى، - دەپ جاۋاپ بەردى استانا قالاسىنداعى تۋريزمدى دامىتۋ ورتالىعىنىڭ باسشىسى ارتەم كۆاشۋك بريفينگ بارىسىندا.
«استانا كونسەرت» كومپانياسىنىڭ پروديۋسەرى مالىك حاسەنوۆتىڭ مالىمدەۋىنشە، UFC تۋرنيرى دەڭگەيىندەگى ءىس- شارانى «بارىس ارەنا» كەشەنىندە ەش قيىندىقسىز وتكىزۋگە بولادى.
- كەشەن UFC-دىڭ بارلىق رايدەرىنە سايكەس كەلەدى. ونىڭ ۇستىنە ەلىمىزدە وتە تانىمال جەكپە-جەك سپورتشىلارى بار، مىسالى شاۆكات راحمونوۆ. تۋرنير وتكىزۋگە تەحنيكالىق جاعىنان دا، ينفراقۇرىلىم بويىنشا دا دايىنبىز. تەك جۇمىس ىستەۋدى قاجەت ەتەتىن باعىت، حالىقارالىق سەرىكتەستەر مەن دەمەۋشىلەردى تارتۋ. UFC تۋرنيرىنىڭ شامامەن قانشا تۇراتىنىن ەسكەرسەك، جەرگىلىكتى دەمەۋشىلەر ەسەبىنەن وتكىزۋ وتە قىمباتقا تۇسەدى. اۋقىمدى كوممەرتسيالىق ءىس-شارا قازاقستاندا ءالى بولعان جوق دەۋگە بولادى. ءبىراق، قازىرگى نارىقتىڭ دامۋىمەن جوعارى دەڭگەيگە جەتەمىز دەپ ويلايمىن، بۇل 2- 3 جىلدىڭ ماسەلەسى، - دەيدى ول.
ەسكە سالايىق، UFC تۋرنيرلەرىندە بىرنەشە وتانداسىمىز جەڭىسكە جەتىپ ءجۇر. بيىل ناۋرىزدا قازاقستاندىق جەكپە-جەكشى اسۋ المابايەۆ ەكىنشى مارتە جەڭىسكە جەتتى.
