قازاقستاننىڭ تۇركياداعى ديپلوماتيالىق وكىلدىكتەرىندە مەملەكەتتىك تۋلار جارتىلاي ءتۇسىرىلدى

كوستەنكو اتىنداعى شاحتادا جۇمىسشىلاردىڭ قازا بولۋىنا بايلانىستى 29- قازان ەلىمىزدە ۇلتتىق ازا تۇتۋ كۇنى بولىپ جاريالانعان بولاتىن.

وسىعان بايلانىستى قازاقستاننىڭ تۇركياداعى ديپلوماتيالىق وكىلدىكتەرىندە مەملەكەتتىك تۋلار جارتىلاي ءتۇسىرىلدى، دەپ حابارلايدى Kazinform.

نەگىزگى مەملەكەتتىك رامىزدەر 29- قازانعا قاراعان ءتۇنى انكارا ۋاقىتى بويىنشا 21.00 دەن باستاپ ءتۇسىرىلدى، بۇل استانا ۋاقىتى بويىنشا 00.00 گە سايكەس كەلەدى.

قازاقستاننىڭ تۇركياداعى ەلشىلىگىنە جەرگىلىكتى ازاماتتار مەن باسقا ەلدەردىڭ وكىلدەرى كەلىپ، قولداۋ ءبىلدىرىپ، كوڭىل ايتۋ كىتابىنا جازبا قالدىرىپ جاتىر.

تۇركيادا ۇلتتىق مەرەكە - رەسپۋبليكا كۇنى اتالىپ وتسە دە، حالقىمىزدىڭ مۇڭىن ءبولىسۋ ماقساتىندا تۇرىك ساياساتكەرلەرى مەن قوعام قايراتكەرلەرى دە قازاقستان ەلشىلىگىنە كەلەدى.

كوڭىل ايتقىسى كەلەتىندەر ءۇشىن قازاقستان ەلشىلىگىنىڭ ەسىگى 30- قازانعا دەيىن ساعات 10.00 دەن 18.00 گە دەيىن اشىق.