قازاقستاننىڭ تازا ەنەرگەتيكانى دامىتاتىن جاقسى الەۋەتى بار - قىتايلىق ساراپشى

استانا. KAZINFORM - قازاقستانداعى ماشينا جاساۋ سالاسىنىڭ دامۋى جانە تازا ەنەرگەتيكاعا كوشۋ پەرسپەكتيۆالارى قىتايلىق ينۆەستورلاردىڭ قىزىعۋشىلىعىن تۋدىرىپ وتىر. بۇل تۋرالى قىتايدىڭ حالىقارالىق ساۋداعا جاردەمدەسۋ كوميتەتى جانىنداعى ماشينا جاساۋ كوميتەتى ءتوراعاسىنىڭ ورىنباسارى جوۋ حايمين مالىمدەدى.

− قازاقستاننىڭ تازا ەنەرگەتيكانى دامىتاتىن جاقسى الەۋەتى بار. وعان قوسا، مۇندا يننوۆاتسيالىق تەحنولوگيالار دا دامىپ كەلەدى. 2030 -جىلعا قاراي جاڭارتىلاتىن ەنەرگيا كوزدەرىنىڭ ۇلەسى %30- عا دەيىن ارتادى دەپ كۇتىلۋدە، − دەدى سپيكەر قازاقستان ماشينا جاساۋشىلارىنىڭ XII فورۋمىنىڭ كۋلۋارىندا.

مەتاللۋرگيا سالاسىنا قاتىستى چجوۋ حايمين قازاقستان مەن قىتاي اراسىنداعى ەكىجاقتى قارىم-قاتىناس ءوندىرىس كولەمىنىڭ ارتۋىنا ىقپال ەتكەنىن ايتتى - سالا 1,8 ميلليارد دوللارعا وسكەن.

ءسوز سوڭىندا ول ەكى ەل اراسىنداعى ىنتىماقتاستىقتى ودان ءارى نىعايتۋعا دايىن ەكەنىن جەتكىزدى.

− ءبىزدىڭ حالىقارالىق ساۋداعا جاردەمدەسۋ كوميتەتى قازاقستان ماشينا جاساۋشىلارى وداعىمەن بىرلەسىپ ىنتىماقتاستىقتى جالعاستىرۋعا دايىن. ءبىز قازاقستاندىق جانە قىتايلىق كومپانيالار اراسىنداعى حالىقارالىق ارىپتەستىكتى قامتاماسىز ەتىپ، ساۋدا مەن ينۆەستيتسيانى دامىتۋعا ىقپال ەتە الامىز، − دەدى چجوۋ حايمين.

بۇعان دەيىن چ. حايمين قىتاي كومپانيالارى قازاقستاننىڭ ماشينا جاساۋ سەكتورىنا، ونىڭ ىشىندە نەگىزگى كومپونەنتتەردى وندىرەتىن بىرلەسكەن كاسىپورىندار قۇرۋعا قىزىعۋشىلىق تانىتقانىن ايتقان ەدى.

2028 -جىلعا قاراي قازاقستاندا ماشينا جاساۋ كولەمى 4,5 ەسەگە ارتادى.