قازاقستاننىڭ قاي وڭىرلەرىنەن سيرەك مەتالدار تابىلدى

استانا. KAZINFORM - قازاقستاندا سيرەك كەزدەسەتىن مەتالدار قورى بار 10 ۋچاسكەدە بارلاۋ جۇمىستارى اياقتالدى.

ونەركاسىپ جانە قۇرىلىس مينيسترلىگى گەولوگيا كوميتەتىنىڭ ءتوراعاسى ەرلان اقباروۆ بۇل اۋماقتاردا گەولوگيالىق بارلاۋ جۇمىستارىمەن قانداي كومپانيالار اينالىساتىنىن ايتىپ بەردى.

- ۇكىمەت تاپسىرماسىنا سايكەس، ءبىز جەر قويناۋىن مەملەكەتتىك گەولوگيالىق زەرتتەۋ اياسىندا 12 جەردە جۇمىس جۇرگىزدىك. ونىڭ 10 ىندا بارلاۋ جۇمىستارى اياقتالدى. ءبىز تاپقان ەڭ ءىرى اۋماق - كۇيرەكتىكول ۋچاسكەسى، مۇندا سيرەك مەتالداردىڭ شامامەن 20 ميلليون توننا وندىرىستىك قورى بار، - دەدى ەرلان اكباروۆ ۇكىمەتتە وتكەن بريفينگتە.

باسقا وڭىرلەردە دە تانتال مەن نيوبيي سياقتى سيرەك مەتالدار تابىلىپ، مەملەكەتتىك ەسەپكە الىنعان. دالىرەك ايتقاندا، وڭتۇستىك قازاقستاندا 3، شىعىس قازاقستان وبلىسىندا – 2، سولتۇستىك قازاقستاندا - 3 نىسان بار.

- ءبىز ىزدەستىرۋ- باعالاۋ جۇمىستارىن اياقتادىق. ەندى بارلاۋ جۇمىستارىن جۇرگىزۋ قاجەت. ءارى قاراي بۇل جۇمىستارمەن ناقتى ينۆەستورلار اينالىسادى. قازىر بۇل ۋچاسكەلەردى «تاۋ-كەن سامۇرىق» كومپانياسىنا بەرۋ ماسەلەسى قارالىپ جاتىر. بۇل شەشىمدەردىڭ ءبىر نۇسقاسى، - دەپ اتاپ ءوتتى كوميتەت باسشىسى.

سونداي-اق، سپيكەر كورەي گەولوگيا ينستيتۋتىمەن (KIGAM) بىرلەسىپ، شىعىس قازاقستان وبلىسىندا ليتي كەن ورىندارىن تاپقانىن ايتتى. قازىرگى تاڭدا بارلاۋ جۇمىستارىن جۇرگىزۋ جونىندە كەلىسسوزدەر ءجۇرىپ جاتىر.

- وندا ليتي مەن وعان ىلەسپە سيرەك مەتالدار قورى بار. قور بار جەردە ءبىزدىڭ دە ۇلەس بولادى. «تاۋ-كەن سامۇرىق» كومپانياسىنىڭ دا بەلگىلى ءبىر ۇلەسى بولۋى مۇمكىن، - دەدى ەرلان اقباروۆ.

سونىمەن بىرگە، بۇعان دەيىن كانادالىق كومپانيانىڭ قازاقستاندا گەولوگيالىق بارلاۋ جۇرگىزۋگە ليتسەنزيا العانى حابارلانعان ەدى.

- كانادالىق كومپانيا «ءبىرىنشى كەلۋ» قاعيداتىمەن بارلاۋعا ليسەنزيا الدى. وندا قازاقستاندىق تاراپتىڭ ۇلەسى جوق. ولار بارلاۋدى وزدەرى جۇرگىزىپ، كەندى دە وزدەرى وندىرەتىن بولادى، - دەپ تولىقتىردى كوميتەت ءتوراعاسى.

ايتا كەتەيىك، قازاقستان سيرەك جەر ەلەمەنتتەرى بويىنشا الەمدىك وندىققا كىرۋى مۇمكىن.

سونداي-اق، ەكسپورتتىق شەكتەۋلەر سيرەك جەر ەلەمەنتتەرىنىڭ باعاسىن شارىقتاتىپ جىبەرگەن.

اۆتور

ايجان سەرىكجان قىزى