قازاقستاننىڭ قاي وڭىرلەرىندە سۋ باسۋ قاۋپى بار

استانا. KAZINFORM - سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ سۋ تاسقىنى كەزەڭىنە بولجام جاساۋعا مۇمكىندىك بەرەتىن Tasqyn اقپاراتتىق جۇيەسىنىڭ جۇمىسى تۋرالى ايتتى.

جۇيەنى سۋ رەسۋرستارى مينيسترلىگى سيفرلاندىرۋ جانە ەكولوگيا مينيسترلىكتەرىمەن، سونداي-اق «قازاقستان عارىش ساپارى» كومپانياسىمەن بىرلەسىپ ازىرلەدى.

- ءبىز Tasqyn جۇيەسىنەن جەرگىلىكتى اتقارۋشى بيلىككە اقپارات بەرەمىز. بارلىق وبلىستار ءۇش ايماققا ءبولىندى. سۋ باسۋ قاۋپى جوعارى «قىزىل» ايماققا سولتۇستىك قازاقستان، شىعىس قازاقستان جانە اباي وبلىستارى كىردى. ورتاشا قاۋىپتى ايماققا سەگىز وبلىس، ال سۋ تاسقىنى بولمايتىن ايماققا وڭتۇستىك وبلىستار ەندى، - دەدى ن. نۇرجىگىتوۆ سەناتتا تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، جۇيە ناقتى رەجيمدە جۇمىس ىستەپ تۇر.

- سۋ تاسقىنى قاي جەردە بولۋى مۇمكىن ەكەنىن قىزىل تۇسپەن كورسەتەدى، سودان كەيىن جەرگىلىكتى اتقارۋشى ورگاندار شارالار قابىلدايدى، - دەپ ءتۇسىندىردى مينيستر.

ەسكە سالساق، جاقىندا «قازسۋشار» كاسىپورنىنىڭ وبلىستىق فيليالدارى سۋ تاسقىنىمەن كۇرەسۋ ءۇشىن 360 ارنايى تەحنيكا دايىنداپ قويدى.