قازاقستاننىڭ مال شارۋاشىلىعى ونىمدەرى ءۇشىن رەسەي نارىعىن اشتى

استانا. KAZINFORM - 2024-جىلدىڭ 15- قاڭتارىنان باستاپ رەسەي فەدەراتسياسى قازاقستاننان مال شارۋاشىلىعى ونىمدەرىن اكەلۋگە قويىلعان شەكتەۋلەردى الىپ تاستادى.

شەشىم قازاقستان رەسپۋبليكاسى مەن رەسەي فەدەراتسياسىنىڭ اۋىل شارۋاشىلىعى مينيسترلەرى ايداربەك ساپاروۆ پەن دميتري پاترۋشيەۆ اراسىنداعى جەلتوقسانداعى كەلىسسوزدەر بارىسىندا قول جەتكىزىلگەن ۋاعدالاستىقتاردىڭ ناتيجەسىندە قابىلداندى.

«قازاقستاندىق ءونىمدى ەكسپورتتاۋداعى كەدەرگىلەردى جويۋ جۇمىستارى مەملەكەت باسشىسىنىڭ تاپسىرماسى اياسىندا جۇرگىزىلۋدە. بۇل - قازاقستان مەن رەسەيدىڭ اۋىل شارۋاشىلىعى سالاسى ءۇشىن ماڭىزدى قادام، قوس ەل اراسىنداعى ساۋدا- ەكونوميكالىق بايلانىستى نىعايتۋعا ىقپال ەتەدى»، - دەپ اتاپ ءوتتى مينيستر.

2022-جىلدىڭ قاڭتارىندا قاراعاندى وبلىسىندا اۋسىل اۋرۋىنىڭ پايدا بولۋىنا بايلانىستى ر ف- نا قازاقستاندىق ءونىمنىڭ يمپورتى شەكتەلگەن بولاتىن. الايدا، 2 جىلدىق ۇزىلىستەن كەيىن دۇنيەجۇزىلىك جانۋارلار دەنساۋلىعى ۇيىمىنىڭ ۆاكسيناتسياسىمەن رەسمي قولايلى ايماق مارتەبەسىنە يە قازاقستاننىڭ ايماقتارىنان الىنعان مال شارۋاشىلىعى ونىمدەرىن جەتكىزۋگە نارىق اشىلادى. قالعان وڭىرلەردە جۇمىس جالعاسادى.

كەلىسىم اياسىندا رەسەيگە سيىر ەتى، قوي ەتى، شوشقا ەتى، ءسۇت جانە ءسۇت ونىمدەرى، سونداي-اق وزگە دە ەت ونىمدەرىن ەكسپورتتاۋ قولجەتىمدى.

سونىمەن قاتار، قازاقستان مەن رەسەيدىڭ اۋىلشارۋاشىلىق مينيسترلىكتەرى «ە ا س ۋ» ا ج اقپاراتتىق جۇيەلەرىن «ارگۋس-فيتو» ف م ا ج جانە «مەركۋري» (روسسەلحوزنادزور) ف م ا ج- مەن ينتەگراتسيالاۋدى جوسپارلاۋدا. بۇل ۆەتەرينارلىق-باقىلاۋ پروتسەدۋرالارىن جەڭىلدەتۋگە جانە وڭتايلاندىرۋعا، قاجەتسىز كەدەرگىلەردى جويۋعا، شەكارالاردا باقىلاۋدان ءوتۋ ۋاقىتىن اۆتوماتتاندىرۋعا جانە قىسقارتۋعا مۇمكىندىك بەرمەك.

ايتا كەتەرلىگى، ەكى ەلدىڭ تاۋار اينالىمىنىڭ كولەمى بىردەي ەمەس. قازاقستاننىڭ رەسەيدەن تاسىمالداناتىن يمپورتى ەكسپورتتان الدەقايدا ارتىق. سوندىقتان، ايداربەك ساپاروۆ رەسەي نارىعىنا قازاقستاندىق ءونىمدى جەتكىزۋ كولەمىن ۇلعايتۋ مۇمكىندىگىن قاراستىرۋ قاجەتتىگىن دە ايتتى.