قازاقستاننىڭ ەكسپورت كولەمى 80 ميلليارد دوللاردان استى

استانا. KAZINFORM - ساۋدا جانە ينتەگراتسيا ۆيتسە-ءمينيسترى اسەت ءنۇسىپوۆ سوڭعى جىلدارى ەلىمىزدىڭ ەكسپورتتاۋشىلارىنا قانداي قولداۋ كورسەتىلىپ جاتقانىن ايتتى.

- وتكەن جىلى قازاقستان ەكسپورتىنىڭ كولەمى %3,1- عا ءوسىپ، 80 ميلليارد دوللاردان استى. ونىڭ ىشىندە وڭدەۋ ونەركاسىبى ونىمدەرىنىڭ ەكسپورتى 28,8 ميلليارد دوللارعا جەتتى. سونىمەن قاتار، قىزمەت كورسەتۋ ەكسپورتىنىڭ كولەمى %10,8- عا ءوسىپ، 11,8 ميلليارد دوللارعا جەتكەنىن اتاپ وتپەۋگە بولمايدى، - دەدى ول قازاقستان ەكسپورتتاۋشىلارىنىڭ فورۋمىندا.

ۆيتسە-مينيستر بۇل كورسەتكىش مىڭداعان كاسىپكەردىڭ ەڭبەگىنىڭ ناتيجەسى ەكەنى اتاپ ءوتتى.

- ەكسپورتتىڭ باستى قوزعاۋشى كۇشىنە اينالىپ وتىرعان شاعىن جانە ورتا بيزنەستى قولداۋ - نەگىزگى باعىتتاردىڭ ءبىرى بولىپ قالا بەرەدى. وتكەن جىلى شوب-تى قولداۋ جونىندەگى مەملەكەتتىك باعدارلاما اياسىندا 27 مىڭنان استام جوبا قارجىلاندىرىلىپ، جالپى سوماسى 1,6 تريلليون تەڭگەنى قۇرادى. شوب سەكتورىنىڭ ەل ءى ج ءو- سىندەگى ۇلەسى %39,3- عا جەتىپ، ۇلتتىق ەكونوميكاعا اسەرى ارتىپ كەلە جاتىر، — دەدى اسەت ءنۇسىپوۆ.

سونداي-اق ول مينيسترلىكتىڭ باستى ماقساتى - ەكسپورتتاۋشىلار ءۇشىن تۇراقتى ءارى باسەكەگە قابىلەتتى ورتا قالىپتاستىرۋ ەكەنىن ايتتى.

- ەكسپورت دەگەن جاي عانا سىرتقا تاۋار مەن ءونىم جەتكىزۋ ەمەس، ونىڭ ارقاسىندا جاڭا ءوندىرىس ورىندارى اشىلادى، جۇمىس ورىندارى قۇرىلىپ، سالىق تۇسىمدەرى ارتادى. سوندىقتان قازاقستان ۇكىمەتى ەكسپورتتاۋشىلار ءۇشىن جاعداي جاساۋدى، لوگيستيكالىق ينفراقۇرىلىمدى دامىتۋدى جانە وتاندىق تاۋارلاردى شەتەلگە ىلگەرىلەتۋ تەتىكتەرىن جەتىلدىرۋدى جۇيەلى تۇردە جۇرگىزىپ كەلەدى. قولداۋ شارالارىنىڭ ارقاسىندا، سونداي-اق بارلىق مەملەكەتتىك ورگاندار مەن دامۋ ينستيتۋتتارىنىڭ كۇش-جىگەرىمەن بۇل جۇمىستى ارتىرۋعا تىرىسىپ جاتىرمىز، - دەدى ۆيتسە-مينيستر.

ايتا كەتەيىك، بۇعان دەيىن قازاقستان يتالياعا 100-دەن استام تاۋار ءتۇرى بويىنشا ەكسپورتتى ۇلعايتۋعا قاۋقارلى ەكەنىن جازعان ەدىك.

اۆتور

ەربول جانات