قازاقستاننىڭ جۇك تاسىمالى نارىعىن شەتەلدىك كومپانيالار يەمدەنىپ كەلگەن
استانا. قازاقپارات - قازاقستاندا جۇك تاسىمالىن رەتتەيتىن جاڭا ەرەجە قابىلداندى. وسىعان دەيىن قازاقستاننىڭ جۇك تاسىمالى نارىعىن شەتەلدىك كومپانيالار يەمدەنىپ كەلگەن.
«بۇعان ەرەجەدەگى ولقىلىقتى پايدالانىپ، رۇقسات قاعازدارىن زاڭسىز بەرگەن پىسىقايلار كىنالى»، - دەيدى وتاندىق كومپانيا وكىلدەرى.
ولاردىڭ ايتۋىنشا، مۇنداي قۇيتىرقى ارەكەتتىڭ سالدارىنان وتاندىق تاسىمالداۋشىلار توعىز جولدىڭ تورابىندا بولسا دا، قىرۋار قارجىدان قاعىلىپ قالدى. ەندى حالىقارالىق تاسىمالدارعا ارنالعان شەتەلدىك رۇقسات بلانكىلەرىمەن الماسۋدىڭ جاڭا ەرەجەسى ەنگىزىلدى. قۇجات ءبىرقاتار كەمشىلىكتى جويۋعا سەپتىگىن تيگىزەدى.
بۇگىندە قازاقستاننىڭ 42 شەتەلمەن جۇك تاسىمالى بويىنشا كەلىسىمى بار. ياعني، وتاندىق كومپانيالاردىڭ باسقا ەلدەرگە تاۋار تاسۋىنا جاعداي جاسالعان. ول ءۇشىن مەملەكەتتەر ءوزارا ارنايى رۇقسات قاعازدارىن الماستىرادى. قاعاز جۇزىندە ءبىزدىڭ جۇك كولىكتەرى شەكارادان ەشقانداي كەدەرگىسىز وتۋگە ءتيىس. ءبىراق...
يۋريي فۋرمان، جۇك تاسىمالداۋشى كومپانيانىڭ باسشىسى:
- بۇعان دەيىنگى 715-بۇيرىقتىڭ وسال تۇسى بولدى. كەي پىسىق كومپانيالار رۇقسات قاعازدارىن شەكتەن تىس تولتىرىپ الاتىن ەدى. سونىڭ كەسىرىنەن باسقا تاسىمالداۋشىلارعا جەتپەيدى. رۇحساتتاماسى بار كومپانيالار جىل سوڭىنا دەيىن بۇل قۇجاتتاردى پايدالانبايدى.
ياعني، بۇل رەيستەر جاسالمادى دەگەن ءسوز. ءبىزدىڭ تاسىمالداۋشىلاردىڭ ورنىنا ول جۇكتى شەتەلدىك كومپانيالار تاسيدى. ءبىز ءوز نارىعىمىزدى باسقا ەلدەرگە ءوز ەركىمىزبەن بەرىپ وتىرمىز دەگەن ءسوز. ماسەلەن 2023 -جىلى جاۋاپتى مينيسترلىك 186 مىڭ رۇقسات قاعازىن تاراتىپ بەرگەن. ونىڭ 34 مىڭى مۇلدەم قولدانىلماي قالدى. ال بىلتىر بەرىلگەن 335 مىڭ قۇجاتتىڭ 21 مىڭى كادەگە جاراتىلماعان. سوندىقتان بيىل جاڭا ەرەجە كۇشىنە ەندى.
سەلىم قۋانىش ۇلى، ق ر ك م اۆتوموبيل كولىگى جانە كولىكتىك باقىلاۋ كوميتەتى ءتوراعاسىنىڭ ورىنباسارى:
- رۇقسات قۇجاتقا ءوتىنىم بەرگەن كاسىپورىننىڭ اتى-ءجونى جازىلادى. جەكە كاسىپكەر نەمەسە جاۋاپكەرشىلىگى شەكتەۋلى سەرىكتەستىك. سودان كەيىن شەتەلگە باراتىن كولىك قۇرالىنىڭ مەملەكەتتىك تىركەۋ ءنومىرى جازىلادى. ياعني، ول تاسىمالداۋشى ءوزىنىڭ العان قۇجاتىن ءوزى عانا قولدانادى دا، باسقا بىرەۋگە بەرۋگە نە ساتۋعا مۇمكىندىگى جوق. سونداي ەرەجە قابىلداندى. جانە دە ول رۇقسات قۇجاتتى العاننان كەيىن ءبىزدىڭ ەلدىڭ اۋماعىنان 30 كۇننىڭ ىشىندە شىعىپ كەتۋى كەرەك. ەگەر بۇل ۋاقىت ىشىندە رۇقسات قاعازى پايدالانىلماسا، جۇك كولىگىنە قاتىستى شەكتەۋ شارالارى قابىلدانادى. ياعني، تاسىمالداۋشىلار تەك قاجەت بولعان جاعدايدا عانا ءوتىنىم بەرەدى دەگەن ءسوز.
24.kz
