قازاقستاننىڭ جازعى كۋرورتتارىندا دەمالۋ قانشا تۇرادى

استانا. KAZINFORM - دەمالىس كەزىندە قوناق ۇيلەردى الدىن الا قالاي برونداپ، دايىن جولداما بويىنشا قايدا بارۋعا بولادى؟ وسى ورايدا كوپشىلىك نازارىنا قاجەت مالىمەتتەردى ۇسىنۋدى ءجون كوردىك.

بالقاش كۋرورتى ايماعى

ەليتالى نومىرلەردە تۇرۋ باعاسى ءبىر ادامعا تاۋلىگىنە 50000 تەڭگەدەن، ەكى ادامعا 65000 تەڭگەدەن باستالادى. دەگەنمەن، دەمالىس بازالارىندا توقتاعان تيىمدىرەك بولادى. ماۋسىم ايىنىڭ باسىندا بۇل جەرلەردە 6 ورىنعا ارنالعان بولمەنى 16000 تەڭگەگە، ال شىلدەدە 40000 تەڭگەگە الۋ مۇمكىندىگى بار.

ورتاشا باعا ساناتىنداعى ەكى ورىندى نومىرلەر ماۋسىم ايىندا 10000 تەڭگەدەن باستالىپ، شىلدەدە ەكى ەسە قىمباتقا تۇسەدى.

سونىمەن قاتار، وپەراتورلار وتە ءتيىمدى دايىن تۋرلاردى ۇسىنىپ وتىر. ەكى كۇنگە تاماقسىز 27500 تەڭگەگە نەمەسە تاماقپەن بىرگە 35500 تەڭگەگە بارۋعا بولادى. ءۇش كۇنگە ارنالعان وسىنداي تۋرلار سايكەسىنشە 35000 تەڭگە جانە 51000 تەڭگە تۇرادى.

بۇل رەتتە دەمالىس كۇندەرىن تۋروپەراتورلار ۇسىنعاننان ارزانىراق جوسپارلاۋ وتە قيىن. سوندىقتان 50000 تەڭگە - بۇل ءۇش كۇندىك دەمالىستى ۇيىمداستىرۋعا بولاتىن ەڭ تومەنگى سوما.

الاكول كۋرورتى ايماعى

بۇل اۋماقتا قوناقتاردى ورنالاستىرۋ باعاسى ءۇش مەزگىل تاماقپەن كۇنىنە 10000 تەڭگەدەن باستالادى. قوناق ۇيدەگى جايلى نومىرلەر ساناتىنا جانە مەرزىمىنە بايلانىستى تاۋلىگىنە 39000 تەڭگەدەن 94000 تەڭگەگە دەيىن بولۋى مۇمكىن.

تۋريستەر اراسىندا سۇرانىسى از كەزەڭدە (ماۋسىم ايىنىڭ باسى) دەمالىس بازاسىنداعى ورىندار ورتاشا ەسەپپەن 10000 تەڭگە بولدى. ءبىراق 15-شىلدەدەن 15-تامىزعا دەيىن ولار كۇنىنە شامامەن 19000 تەڭگەگە دەيىن جەتەدى. دەمالىس بازالارىنىڭ باستى ارتىقشىلىعى - بۇل باعاعا كۇنىنە ءۇش مەزگىل تاماقتانۋ كىرەدى.

ەگەر شاعىن كوتتەدجدى تاڭداساڭىز (ەكى ادامعا)، وندا ول ماۋسىم ايىندا 45000 تەڭگەگە، ال شىلدەدە 80000 تەڭگەگە دەيىن جەتۋى مۇمكىن.

قوناق ءۇي نومىرلەرى ەكى ادامعا 39000 تەڭگەدەن، ال ءتورت ورىنعا 68000 تەڭگە شاماسىندا باعالانىپ وتىر. شىلدە-تامىز ايلارىندا بۇل باعا شامامەن ەكى ەسە وسەدى.

اتاپ ايتقاندا، جول شىعىنىن دا ەسكەرۋ كەرەك. ماسەلەن، الماتىدان اۆتوبۋس بيلەتى 21-25 مىڭ تەڭگە تۇرادى.

ورنالاسقان جەرىڭىزگە قاراي جانە تاماققا قانشا اقشا جۇمسايتىنىڭىزعا بايلانىستى مۇندا ءۇش كۇندىك دەمالىس ءبىر ادامعا شامامەن 120-150 مىڭ تەڭگە ارالىعىندا بولادى.

بۋراباي كۋرورتى ايماعى

شاعىن بولمەلى ءۇي ءۇشىن تومەنگى باعا شەگى كۇنىنە 12000 - 20000 تەڭگە سوماسىندا بەلگىلەنۋى مۇمكىن. قوناقۇيلەردە وسى تەكتەس شاعىن بولمەلەر ءسال ارزانىراق تابا الاسىز. شيپاجايعا جولداما قۇنى كۇنىنە شامامەن 18-20 مىڭ تەڭگەدەن باستالادى.

ەگەر پرەميۋم سەگمەنتى تۋرالى ايتاتىن بولساق، وندا جاز كەزىندە بولمەلەر 110000 تەڭگەگە، ال وسىعان سايكەس سەرۆيستەگى ۇيلەر 90000 تەڭگەگە جەتەدى.

وسى كۋرورتتا ءۇش كۇندىك دەمالىسقا ادام باسىنا كەمىندە 150-200 مىڭ تەڭگە دايىنداۋ كەرەك.

ماڭعىستاۋ كۋرورت ايماعى

جەرگىلىكتى حوستەلدەردە باعا 2-4 مىڭ تەڭگەدەن باستالادى، ال تۋريستەر اعىلاتىن كەزەڭدە ەكى ەسە وسەدى. اقتاۋدا تاۋلىگىنە پاتەردى 8-14 مىڭ تەڭگە ارالىعىندا الۋعا بولادى. ال جاعالاۋعا جاقىن ۇيلەر قىمباتتىراق.

دەمالىس بازاسىنداعى ءبىر كىسىلىك نومىرلەر قازىر 12000 تەڭگەگە بەرىلىپ جاتسا، شىلدە ايىندا 20000 تەڭگەگە دەيىن جەتەدى. ەكى ورىنعا ارنالعان بولمەلەر - 30000 تەڭگەدەن، ۇلكەن ۇيلەر - 50000 تەڭگەدەن.

قوناق ءۇي ءنومىرىنىڭ قۇنى جايلىلىق دەڭگەيىنە قاراي ايتارلىقتاي ەرەكشەلەنەدى. ءبىر بولمەنىڭ ورتاشا قۇنى 20000-30000 تەڭگە شاماسىندا.

ايتا كەتەيىك، اسحانادا 3000 تەڭگەگە تاماق ىشۋگە بولادى، ال مەيرامحانادا ءبىر ادامعا شاققانداعى ورتاشا ەسەپشوت - 20000 تەڭگە.

جالپى، جول ساپارى - ۇلكەن ماسەلەنىڭ ءبىرى. مىسالى، استانادان كەلەتىن پويىزدىڭ بيلەتى 20000 تەڭگە، ال الماتىدان ەكى ەسەگە جۋىق قىمبات - 35000 تەڭگە تۇرادى. الدىن الا بيلەت الساڭىز، بۇل اقشاعا ۇشاقپەن جەتۋگە بولادى. ەگەر بيلەت ماسەلەسىن ەرتەرەك قولعا الماساڭىز، وندا مۇنداي رەيس 150000 تەڭگەگە دەيىن جەتۋى مۇمكىن.

ەندەشە، باسپانا مەن جولاقىعا، تاماقتانۋعا قاتىستى ورتاشا باعانى الساق، ءبىر ادامعا ءۇش كۇندىك دەمالىس 150000 تەڭگەدەن باستالادى.

الماتى تاۋ كلاستەرى

تاۋداعى شاعىن كوتتەدجدەر 70000 تەڭگەگە باعالانادى، ال ءبىر توپ بولىپ بارعاندارعا 140000 تەڭگەدەن جالعا بەرىلەدى. ءبىراق الدىن الا برونداساڭىز، %30 ارزانىراق تابا الاسىز. دەگەنمەن، اقشا ۇنەمدەۋ ءۇشىن الماتىداعى قوناقۇيلەرگە توقتاۋعا بولادى.

مۇندا حوستەلدەگى ءنومىر كۇنىنە 3-7 مىڭ تەڭگە تۇرادى. مەدەۋ مەن شىمبۇلاققا شاعىن اۆتوبۋسپەن جەتۋگە بولادى (تاكسيمەن ءبىر جاققا 2-3 مىڭ تەڭگە). قالادان تىكەلەي ۇلكەن الماتى كولىنە ەكسكۋرسيالار 10-15 مىڭ تەڭگە تۇرادى.

جەڭىل-جەلپى تاماقتانۋعا ءبىر ادامعا شامامەن 5000 تەڭگە جۇمسالادى، ال تولىققاندى تۇسكى تاماق ەكى ەسە قىمباتقا تۇسەدى. بۇل رەتتە، ءبىر توپ ادامعا بىردەن تاپسىرىس بەرسەڭىزدەر، اقشا ۇنەمدەۋدىڭ جاقسى ءتاسىلى.

جالپى العاندا، قىمباتقا تۇسەتىن جول شىعىنى مەن تاماقتانۋدى، سونداي- اق باسپانا قۇنىن ەسكەرە وتىرىپ، الماتى تاۋلارىندا 200000 تەڭگەگە ەمىن-ەركىن دەمالۋعا بولادى. بۇل تۇرعىدا جەرگىلىكتى تۇرعىندار ءۇشىن تاۋداعى دەمالىس ەكى ەسە ارزانعا تۇسەدى.

بۇدان بۇرىن حابارلانعانداي، جاقىندا تۋريزم جانە سپورت مينيسترلىگى تۋريستەردىڭ تاۋلى ايماقتارداعى قاۋىپسىزدىگىن قامتاماسىز ەتۋ ءۇشىن ت ج م بولىمشەلەرىنە ءوز مارشرۋتتارى تۋرالى مىندەتتى تۇردە حابارلاۋ نورماسى تۋرالى ايتقان ەدى.

ەسكە سالساق، شىلدەدەن باستاپ «استانا-بۋراباي» باعىتىندا جاڭا ەلەكتر پويىزى قاتىنايدى.