قازاقستاننىڭ شەتەلگە استىق پەن ۇن ەكسپورتى 12,4 ميلليون تونناعا جەتتى
استانا. KAZINFORM - جاڭا ءونىمنىڭ استىعى مەن ۇنىنىڭ ەكسپورتى وڭ ديناميكا كورسەتىپ وتىر. «ق ت ج» دەرەكتەرى بويىنشا (2024-2025 -جىلداردىڭ قىركۇيەك- شىلدە ايلارى) استىق پەن ۇننىڭ استىق ەكۆيۆالەنتىندەگى ەكسپورتى 12,4 ميلليون توننانى قۇرادى، بۇل 2023/2024 -جىلعى وسىنداي كەزەڭمەن سالىستىرعاندا %34 عا جوعارى (9,3 ميلليون توننا). بۇل تۋرالى ق ر ا ش م ءمالىم ەتتى.
جاڭا ءونىمنىڭ استىق جانە ۇن جەتكىزىلىمى ايتارلىقتاي ءوستى: وزبەكستانعا - %28,2 عا (3384000 توننادان 4338000 تونناعا دەيىن)، تاجىكستانعا - %39,2 عا (1039000 توننادان 1446000 مىڭ تونناعا دەيىن)، قىرعىزستانعا - 2,5 ەسەگە (156 مىڭ توننادان 398 مىڭ تونناعا دەيىن)، يرانعا - 17,3 ەسەگە (56 مىڭ توننادان 974 مىڭ تونناعا دەيىن)، ازەربايجانعا - 120 ەسەگە (6 مىڭ توننادان 723 مىڭ تونناعا دەيىن). 2024-2025 -جىلدارداعى ماۋسىمنىڭ نەگىزگى جەتىستىگى - ەكسپورت گەوگرافياسىنىڭ كەڭەيۋى جانە جاڭا نارىقتارعا شىعۋ.
قازاقستان العاش رەت بۇرىن استىق يمپورتتاۋشىلار تىزىمىندە بولماعان ءبىرقاتار ەۋروپالىق ەلدەرگە: بەلگيا، پولشا، پورتۋگاليا، نورۆەگيا جانە ۇلى بريتانياعا جەتكىزىلىمدەردى باستادى.
قازاقستاندىق ونىمگە ءباا، ۆەتنام جانە سولتۇستىك افريكا ەلدەرىنىڭ ساتىپ الۋشىلارى دا بەلسەندى قىزىعۋشىلىق تانىتۋدا. تەك «ازىق-تۇلىك كەلىسىمشارت كورپوراتسياسى» ا ق ۇلتتىق استىق وپەراتورى جەلىسى بويىنشا سولتۇستىك افريكاعا (ماروككو) جانە ۆەتنامعا تيىسىنشە شامامەن 60 مىڭ توننا جانە 15 مىڭ توننا بيداي ەكسپورتتالدى.
بۇدان بولەك، قازاقستاندىق استىق جونەلتۋشىلەر سوڭعى بەس جىلدا توقتاپ قالعان ازەربايجان، گرۋزيا جانە تۇركياعا جەتكىزىلىمدەردى قايتا جاڭعىرتتى. يتالياعا قاتتى بيداي ەكسپورتى ەداۋىر ارتتى. وسىلايشا، ەكسپورت كولەمىنىڭ ءوسۋى قازاقستاندىق استىقتىڭ الەمدىك نارىقتاعى جوعارى باسەكەگە قابىلەتتىلىگىن، ا و ك ونىمدەرىنىڭ سىرتقى ساۋداسىن كەڭەيتۋ جانە لوگيستيكالىق ينفراقۇرىلىمدى جاڭعىرتۋ بويىنشا قابىلدانىپ جاتقان مەملەكەتتىك قولداۋ شارالارىنىڭ تيىمدىلىگىن راستايدى.
