قازاقستاننىڭ ش ى ۇ بيۋجەتىندەگى ۇلەسى قانشا

استانا. KAZINFORM - قازاقستان شاڭحاي ىنتىماقتاستىق ۇيىمى بيۋجەتىندەگى جارنا مولشەرىن بەكىتتى. ءتيىستى جارلىققا مەملەكەت باسشىسى قاسىم-جومارت توقايەۆ قول قويدى.

«قوسا بەرىلىپ وتىرعان 2017-جىلعى 1-جەلتوقسانداعى شانحاي ىنتىماقتاستىق ۇيىمىنىڭ بيۋجەتىن قالىپتاستىرۋ جانە اتقارۋ ءتارتىبى تۋرالى كەلىسىمگە وزگەرىس ەنگىزۋ تۋرالى حاتتامانىڭ (بۇدان ءارى - حاتتاما) جوباسى ماقۇلدانسىن»، - دەلىنگەن پرەزيدەنت جارلىعىندا.

سونىمەن، اتالعان قۇجاتقا سايكەس، «شاڭحاي ىنتىماقتاستىق ۇيىمىنا مۇشە مەملەكەتتەردىڭ ۇلەستىك جارنالارىنىڭ مولشەرلەرى مىناداي:

بەلارۋس رەسپۋبليكاسى - 5,8 پايىز

ءۇندىستان رەسپۋبليكاسى - 5,9 پايىز

يران يسلام رەسپۋبليكاسى - 5,8 پايىز

قازاقستان رەسپۋبليكاسى - 15,2 پايىز

قىتاي حالىق رەسپۋبليكاسى - 17,6 پايىز

قىرعىز رەسپۋبليكاسى - 7,6 پايىز

پاكىستان يسلام رەسپۋبليكاسى - 5,9 پايىز

رەسەي فەدەراتسياسى - 17,6 پايىز

تاجىكستان رەسپۋبليكاسى - 6 پايىز

وزبەكستان رەسپۋبليكاسى - 12,6 پايىز».

جارلىقتا قازاقستان رەسپۋبليكاسىنىڭ پرەمەر-ءمينيسترى ولجاس اباي ۇلى بەكتەنوۆكە حاتتاماعا قازاقستان رەسپۋبليكاسىنىڭ اتىنان قول قويۋعا، وعان قاعيداتتىق سيپاتى جوق وزگەرىستەر مەن تولىقتىرۋلار ەنگىزۋگە رۇقسات بەرىلگەندىگى ايتىلعان.

اتالعان حاتتاما 2025-جىلعى 1-قاڭتاردان باستاپ ۋاقىتشا قولدانىلادى جانە ونىڭ كۇشىنە ەنۋى ءۇشىن قاجەتتى مەملەكەتىشىلىك راسىمدەردى تاراپتاردىڭ ورىنداعانى تۋرالى ولاردىڭ ءتورتىنشى جازباشا حابارلاماسىن دەپوزيتاري العان كۇننەن باستاپ كۇشىنە ەنەدى.

بۇعان دەيىن ولجاس بەكتەنوۆ پاكىستان يسلام رەسپۋبليكاسىنىڭ استاناسىندا وتكەن شاڭحاي ىنتىماقتاستىق ۇيىمىنا مۇشە مەملەكەتتەر ۇكىمەتتەرىنىڭ باسشىلارى كەڭەسىنىڭ 23- وتىرىسىنا قاتىسقانىن حابارلاعان ەدىك.