قازاقستاننىڭ بولاشاق ا ە س-تەرىنە قاجەت مامانداردى قاي ەلدەر دايىنداپ جاتىر

استانا. KAZINFORM - قازاقستاندا اتوم سالاسى ءۇشىن بىلىكتى كادرلار دايارلاۋ بەلسەندى جۇرگىزىلىپ جاتىر. بۇل تۋرالى Kazinform ساۋالىنا جولداعان جاۋابىندا ەنەرگەتيكا مينيسترلىگى ءمالىم ەتتى.

- مامانداردى دايارلاۋ فيزيكا، ەنەرگەتيكا، ەلەكتروتەحنيكا، تاۋ-كەن ينجينيرينگىمەن بايلانىستى 18 ءبىلىم بەرۋ باعدارلاماسى بويىنشا جۇرگىزىلەدى. 2024-2025 وقۋ جىلىنا وسى باعىتتار ءۇشىن 5246 ءبىلىم بەرۋ گرانتى ءبولىندى. ونىڭ ىشىندە باكالاۆريات - 4530 گرانت، ماگيستراتۋرا - 590 گرانت، دوكتورانتۋرا - 126 گرانت. دايىندىق وتاندىق ۋنيۆەرسيتەتتەردە دە، يادرولىق تەحنولوگيالارعا ماماندانعان جەتەكشى شەتەلدىك جوعارى وقۋ ورىندارىمەن ىنتىماقتاستىقتا دا جۇزەگە اسىرىلادى. «بولاشاق» مەملەكەتتىك باعدارلاماسى بويىنشا «اتوم جانە يادرولىق ونەركاسىپ» ماماندىعى باسىم باعىتتاردىڭ قاتارىنا كىرەدى. 2024 -جىلدان باستاپ وسى باعدارلاما بويىنشا ءتورت ماگيسترانت ا ق ش، ۇلى بريتانيا جانە فرانسيادا ءبىلىم الىپ جاتىر، - دەپ جازىلعان مينيسترلىك مالىمەتىندە.

بۇل ەلدەردىڭ قاتارىنا رەسەي مەن ماجارستان قوسىلماق.

- اتوم سالاسى بويىنشا كادرلاردى دايارلاۋ قازاقستاندىق جوعارى وقۋ ورىندارىندا 5 ءبىلىم بەرۋ جانە ەكى ديپلومدىق باعدارلامالار (يادرولىق فيزيكا، يادرولىق ينجەنەريا، يادرولىق فيزيكا جانە اتوم ەنەرگەتيكاسى، تەوريالىق يادرولىق فيزيكا) نەگىزىندە جۇرگىزىلەدى. سونىمەن قاتار، قازاقستان شەتەلدىك ارىپتەستەرمەن عىلىميءبىلىم بەرۋ بازاسىن دامىتا باستادى. فرانسيا، رەسەي جانە ۆەنگريامەن ءبىرقاتار قۇجاتقا قول قويىلدى.

قازاقستان رەسپۋبليكاسىنىڭ وتىن-ەنەرگەتيكالىق كەشەنىن دامىتۋدىڭ 2023-2029 -جىلدارعا ارنالعان تۇجىرىمداماسىنا سايكەس، اتوم سالاسىن جوعارى بىلىكتى كادرلارمەن قامتاماسىز ەتۋ ءۇشىن شەتەلدىك باعدارلامالار بويىنشا وقۋعا گرانتتار ءبولۋ بويىنشا جۇمىس جۇرگىزىلەدى. سونداي- اق جۇمىس ىستەپ تۇرعان ا ە س-تەردە پراكتيكالار مەن تاعىلىمدامالاردان ءوتۋ ۇيىمداستىرىلادى، - دەلىنگەن رەسمي جاۋاپتا.

ايتا كەتسەك، پرەزيدەنت قاسىم-جومارت توقايەۆ بۋرابايداعى ۇلتتىق قۇرىلتايدا يادرولىق ەنەرگەتيكا اگەنتتىگىن قۇرۋدى تاپسىرعان بولاتىن. ونىڭ ءتوراعاسى بولىپ الماسادام ساتقاليەۆ تاعايىندالدى.

اۆتور

ەسىمجان ناقتىباي