قازاقستاننىڭ باتىسىنداعى ەنەرگوجۇيەنى جاڭعىرتۋ: اتىراۋ وبلىسىندا جاڭا جەلى ىسكە قوسىلدى

اتىراۋ وبلىسىندا قازاقستاننىڭ باتىس ايماعىنىڭ ەلەكتر جەلىلەرىن نىعايتۋ ماقساتىندا سالىنعان جاڭا ەلەكتر جەلىلەرى ىسكە قوسىلدى. رەسمي قوسۋ راسىمىنە تەلەكوپىر ارقىلى پرەمەر-مينيستر ءاليحان سمايىلوۆ قاتىستى. kazinform بۇل تۋرالى primeminister.kz سايتىنا سىلتەمە جاساپ حابارلايدى.

جەلىنىڭ وتكىزۋ قابىلەتىن ارتتىرۋ جانە قازاقستاننىڭ باتىس ايماعىنداعى تۇتىنۋشىلاردى تۇراقتى ەنەرگيا قۋاتىمەن قامتاماسىز ەتۋ ماقساتىندا «KEGOC» ا ق «باتىس قازاقستان ەنەرگەتيكالىق تورابى - اتىراۋ - ماڭعىستاۋ» باعىتى بويىنشا جالپى ۇزىندىعى 780 شاقىرىمعا جۋىق 220 ك ۆ بەس ەلەكتر بەرۋ جەلىسىن سالدى. جۇمىس بارىسىندا 4,2 مىڭنان استام ەلەكتر باعانالارى ورناتىلىپ، «ۋرالسكايا»، «پراۆوبەرەجنايا»، «يندەر»، «قۇلسارى»، «تەڭىز» قوسالقى ستانتسيالارىن كەڭەيتۋ قامتاماسىز ەتىلدى، سونداي-اق «قاراباتان» جاڭا تاراتۋشى قوسالقى ستانسياسى ىسكە قوسىلدى.

جوبانى ىسكە اسىرۋ ناتيجەسىندە ەلەكتر جەلىسىنىڭ قۋاتتىلىعى ايتارلىقتاي ۇلعايتىلدى: «باتىس قازاقستان ەنەرگەتيكالىق تورابى - اتىراۋ» ۋچاسكەسىندە 100 م ۆت- تان 200 م ۆت-قا دەيىن؛ «اتىراۋ - ماڭعىستاۋ» ۋچاسكەسىندە 50 م ۆت-تان 200 م ۆت- قا دەيىن. ناتيجەسىندە باتىس ايماق جەلىسىنىڭ سەنىمدىلىگى ەكى ەسەگە ارتىپ، اپات ىقتيمالدىعى تومەندەدى.

ءاليحان سمايىلوۆ ءوز سوزىندە بۇل ستراتەگيالىق ماڭىزدى جوبانىڭ باتىس ايماعىنىڭ ەنەرگەتيكالىق قاۋىپسىزدىگىن قامتاماسىز ەتۋ جانە ەكونوميكالىق دامۋى ءۇشىن ماڭىزى زور ەكەنىن اتاپ ءوتتى.

«مۇنىڭ بارلىعى ەلەكتر جەلىلەرىنىڭ وتكىزۋ قابىلەتىن ەكى ەسەگە ۇلعايتۋعا، سونداي- اق ەلىمىزدىڭ باتىس وڭىرىندەگى تۇتىنۋشىلار ءۇشىن ەنەرگوبلوكتاردا، ونىڭ ىشىندە ماەك ستانتسياسىندا اۆاريالىق جاعدايلاردىڭ سانىن ەداۋىر ازايتۋعا مۇمكىندىك بەرەدى»، - دەدى پرەمەر-مينيستر.

باتىس ايماقتىڭ ەلەكتر جەلىسىن نىعايتۋ، سونىمەن قاتار ونىڭ ءارى قاراي قازاقستاننىڭ ءبىرىڭعاي ەلەكتر ەنەرگەتيكاسى جۇيەسىمەن ينتەگراتسيالانۋىنا نەگىز بولماق.

«KEGOC» ا ق باسقارما ءتوراعاسى ءنابي ايتجانوۆ قۇرىلىس جۇمىستارى كەزىندە قولدانىلعان زاماناۋي ەلەكتر جەلىسى جابدىقتارى جوعارى ونىمدىلىگىمەن ەرەكشەلەنەتىنىن اتاپ ءوتتى.

««يندەر» قوسالقى ستانتسياسىندا ورناتىلعان باسقارىلاتىن قوسىمشا رەاكتورلار كەرنەۋدى اۋىستىرماستان تۇراقتاندىراتىن بىرەگەي كەشەن بولىپ تابىلادى. ول سونداي-اق بەلسەندى جانە رەاكتيۆتى قۋات اعىنىن جىلدام باسقارۋعا مۇمكىندىك بەرەتىن ۇزاق ەلەكتر بەرۋ جەلىلەرى مەن تاراتۋ جەلىلەرىنىڭ ىسىراپتارىن ازايتىپ، جۇمىسىنىڭ سەنىمدىلىگىن ارتتىرادى»، - دەدى ءنابي ايتجانوۆ.

قۇرىلىس جۇمىستارىنا وتاندىق مەتالل جانە تەمىربەتون تىرەكتەرى، سىمدار، وقشاۋلاعىشتار مەن ترانسفورماتورلار پايدالانىلدى. قازاقستاندىق قامتۋ ۇلەسى شامامەن %70 قۇرادى.

 

اۆتور

گۇلميرا الياكپاروۆا