قازاقستاننىڭ اسكەري-اۋە كۇشتەرى جىلىنا 600 گە جۋىق ۇشۋ ورىندايدى
استانا. قازاقپارات - 2 - شىلدە - قازاقستان اسكەري-اۋە كۇشتەرى كۇنى. 1998-جىلى 2 -شىلدەدە اۋە قورعانىسى كۇشتەرىنىڭ اسكەري-اۋە كۇشتەرىن قۇرۋ تۋرالى ديرەكتيۆا شىقتى.
وسى ۋاقىت ىشىندە اسكەري اۆياتسيا كەڭ اۋقىمدى تاپسىرمالاردى شەشۋگە قابىلەتتى زاماناۋي قۋاتتى قۇرىلىمعا دەيىنگى جولدان ءجۇرىپ ءوتتى.
اۋە كۇشتەرى مەملەكەتتىڭ قاۋىپسىزدىگىن قامتاماسىز ەتۋدە شەشۋشى ءرول اتقارادى. ولاردىڭ نەگىزگى مىندەتى -اۋە كەڭىستىگىن قورعاۋ، ستراتەگيالىق ماڭىزدى نىسانداردى بۇركەمەلەۋ، قۇرلىق اسكەرلەرىنىڭ ارەكەتىنە قولداۋ كورسەتۋ. ۇشۋ بولىمشەلەرى زاماناۋي ۇشاقتارمەن جانە تىكۇشاقتارمەن جابدىقتالعان. ولاردىڭ قاتارىندا كوپفۋنكتسيونالدى س ۋ-30 س م، س ۋ-27 جويعىش ۇشاقتارى، L-39 وقۋ- جاۋىنگەرلىك، م ي-171ش جانە م ي-35م كولىكتىك- جاۋىنگەرلىك جانە سوققى بەرۋشى تىكۇشاقتارى، سونداي- اق Airbus Military شىعارعان ا-400م ۇشاقتارى بار.
قازاقستاننىڭ اسكەري-اۋە كۇشتەرى ءۇشىن كاسىبي كادرلاردى اقتوبەدەگى ەكى مارتە كەڭەس وداعىنىڭ باتىرى تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىندا دايارلايدى. وندا كۋرسانتتار تەوريانى مەڭگەرىپ، زاماناۋي ترەناجەرلاردا جاتتىعادى جانە ۇشۋعا دايىندىقتان وتەدى. ينستيتۋت تۇلەكتەرى ۇشقىشتار، شتۋرماندار، تەحنيكتەر جانە اسكەري اۆياتسيا قۇرامىنىڭ باسقا دا ماڭىزدى ساناتتارىنىڭ قاتارىن تولىقتىرادى.
وزگەرمەلى گەوساياسي جاعدايدا اۋە كۇشتەرى دامۋىن جالعاستىرۋدا. وسىعان سايكەس وقۋ باعدارلامالارى قايتا قارالدى. دايىندىقتىڭ جاڭا ادىستەمەلەرى ەنگىزىلىپ، حالىقارالىق جانە ءتۇرارالىق وقۋ-جاتتىعۋلارعا قاتىسۋ جاندانۋدا. مۇنداي ءىس-شارالار تاجىريبە الماسۋعا، وداقتاستارمەن قارىم-قاتىناستى شىڭداۋعا جانە جاۋىنگەرلىك دايىندىق دەڭگەيىن ارتتىرۋعا مۇمكىندىك بەرەدى.
قازاقستاندىق ۇشقىشتاردىڭ كاسىبيلىگى مەن ادالدىعىن كورسەتكەن جارقىن ەپيزودتاردىڭ ءبىرى 2024 -جىلعى كوكتەمگى سۋ تاسقىنى كەزىندە ورىن الدى. كۇردەلى اۋا رايى جاعدايىندا تىكۇشاقتار مەن ۇشاقتاردىڭ ەكيپاجدارى تۇرعىنداردى سۋ باسقان ەلدى مەكەندەردەن ەۆاكۋاتسيالاۋدى قامتاماسىز ەتتى. ءبىر ايدا 600 گە جۋىق ۇشۋ ورىندالىپ، 3,5 مىڭنان استام ادام قۇتقارىلدى. ەكى مىڭعا جۋىق مامان جانە 280 توننادان استام گۋمانيتارلىق جۇك تاسىمالداندى.
وسى جەتىستىكتەردىڭ ارتىندا ۇشۋ جانە ينجەنەرلىك قۇرام، بايلانىسشى، مەتەورولوگ، تەحنيك جانە ازاماتتىق قىزمەتكەرلەر سەكىلدى ۇلكەن ۇجىمنىڭ كۇندەلىكتى جۇمىسى تۇر. ولاردىڭ كاسىبيلىگى قازاقستاننىڭ سەنىمدى جانە زاماناۋي اۆياتسياسىنىڭ نەگىزى دەۋگە تۇرارلىق.
ايتا كەتەيىك، «اۋماقتىق قورعانىس تۋرالى» زاڭ قارۋلى كۇشتەرگە جۇكتەمەنى ازايتۋعا مۇمكىندىك بەرەدى.
