قازاقستاننان قىتايعا 1500 كيىكتى بەرۋ پروتسەسى قالاي ىسكە اسادى
استانا. KAZINFORM - قازاقستاننان قىتايعا جىبەرىلەتىن 1500 كيىكتى كۇتىپ-باعۋعا قاتىستى وتاندىق عالىمدارى ءتيىستى تەكسەرۋلەر جاساي الادى. بۇل تۋرالى ق ر ەكولوگيا جانە تابيعي رەسۋرستار مينيسترلىگى ءمالىم ەتتى.
- كيىكتەردى باسقا ەلدەرگە بەرۋ پروتسەسى حالىقارالىق جانە ۇلتتىق زاڭنامالارعا سايكەس، ءبىرقاتار كەشەندى ءراسىمدى تالاپ ەتەدى. بۇل پروتسەسس تەك اكىمشىلىك سيپاتتا ەمەس، سونىمەن قاتار عىلىمي نەگىزدەمەلەرگە سۇيەنەدى. ەڭ الدىمەن، ەكى تاراپتىڭ - جىبەرۋشى جانە قابىلداۋشى ەلدەردىڭ عىلىمي ۇيىمدارى بۇل پروتسەسكە بەلسەندى قاتىسۋى كەرەك. قازاقستان جاعىنان وتاندىق عالىمدار كيىكتەردى باسقا ەلگە جىبەرۋدىڭ بيولوگيالىق نەگىزدەمەسىن ازىرلەۋى قاجەت، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
بۇل نەگىزدەمە كيىكتەردىڭ پوپۋلياتسيالىق جاعدايىن، گەنەتيكالىق ارتۇرلىلىگىن، ولاردى تاسىمالداۋدىڭ ىقتيمال اسەرلەرىن جان-جاقتى تالداۋدى قامتيدى.
- ءوز كەزەگىندە، كيىكتەردى قابىلداۋشى ەل ولاردى ارى قاراي ۇستاۋعا قولايلى جاعدايلار جاساۋى ءتيىس. بۇل جاعدايلار كيىكتەردىڭ تابيعي مەكەندەۋ ورتاسىنا جاقىن بولۋى، ولاردىڭ قورەكتەنۋىنە، كوبەيۋىنە جانە اۋرۋلاردان قورعالۋىنا قاجەت ينفراقۇرىلىمدى قامتۋى كەرەك. قازاقستاندىق تاراپ جىبەرىلەتىن جانۋارلار ءۇشىن بارلىق قاجەت جاعدايلاردىڭ جاسالعانىنا كوز جەتكىزۋ ماقساتىندا ءتيىستى تەكسەرۋلەر مەن مونيتورينگ جۇرگىزۋگە قۇقىلى. بۇل قادامداردىڭ بارلىعى كيىكتەردىڭ ساقتالۋىن قامتاماسىز ەتۋگە، ولاردىڭ جاڭا ورتادا ءساتتى بەيىمدەلۋىنە جانە حالىقارالىق دەڭگەيدەگى تابيعاتتى قورعاۋ پرينتسيپتەرىنە سايكەس كەلۋىنە باعىتتالعان، - دەپ اتالىپ وتكەن ۆەدومستۆو اقپاراتىندا.
ەسكە سالساق، جاقىندا قازاقستان قىتايعا 1500 كيىكتى سىيعا تارتاتىنى ءمالىم بولدى.
وسى ورايدا ەكولوگيا جانە تابيعي رەسۋرستار ءمينيسترى ەرلان نىسانبايەۆ بۇل شەشىمگە قاتىستى ويىن ورتاعا سالدى.
