قازاقستاننان ءىز-ءتۇسسىز 15 ميلليارد دوللار شىعارىلعان
استانا. KAZINFORM - قازاقستاننان شامامەن 15 ميلليارد دوللار كولەمىندە كريپتواكتيۆتەر شىعارىلعان. بۇل تۋرالى ۇلتتىق بانك ءتوراعاسىنىڭ ورىنباسارى بەرىك شولپانقۇلوۆ مالىمدەدى.
«بۇگىنگى كۇنى ەلدەن شىعارىلعان كريپتواكتيۆتەردىڭ كولەمى 15 ميلليارد دوللاردى قۇراپ وتىر. بۇعان سەبەپ ازاماتتاردىڭ كريپتواكتيۆتەرگە ەركىن ينۆەستيتسيا سالا الۋى ءۇشىن اكىمشىلىك- قۇقىقتىق رەتتەۋ جەتكىلىكسىز بولدى»، - دەپ ءتۇسىندىردى ۇلتتىق بانك ءتوراعاسىنىڭ ورىنباسارى.
شولپانقۇلوۆتىڭ ايتۋىنشا، قازىرگى تاڭدا قازاقستاندا سيفرلىق اكتيۆتەر نارىعىن رەتتەۋ بويىنشا زاڭنامالىق تاسىلدەر ازىرلەنىپ جاتىر. ەرەكشە كوڭىل زاڭسىز جولمەن قاراجات شىعارۋدى توقتاتۋعا بولىنەدى.
«قازىر ءبىز بۇل باعىتتاعى تاسىلدەر ازىرلەنگەنىن جانە الداعى ۋاقىتتا جۇزەگە اسىرىلاتىنىن ايتىپ وتىرمىز. ەكىنشى ماسەلە - زاڭسىز جولمەن قاراجات شىعارۋعا تىرىسقان ادامداردى قىلمىستىق جانە اكىمشىلىك جاۋاپكەرشىلىككە تارتۋ»، - دەدى ول.
ۇلتتىق بانك ءتوراعاسىنىڭ ورىنباسارى بولاشاقتا حالىقارالىق كريپتوۆاليۋتا وپەراتسيالارىن باقىلاۋ جۇيەسىنىڭ تەحنولوگيالىق مۇمكىندىكتەرى ارقىلى كىم، قايدا، قانشا قاراجات شىعارعانىن انىقتاۋ مۇمكىن بولاتىنىن اتاپ ءوتتى.
«بالكىم، ءبىز دە بريفينگ وتكىزىپ، قاراجاتتى «كولەڭكەلى» ايماقتا قالاي جانە كىم جۇمساعانىن اتى-جونىمەن جاريالايتىن شىعارمىز. بۇل - اكىمشىلىك جانە قىلمىستىق قۋدالاۋعا قاتىستى شارا بولادى»، - دەدى شولپانقۇلوۆ.
جۋرناليستەر بۇرىن شىعارىلعان 15 ميلليارد دوللاردىڭ ءىزى بار ما دەپ سۇرادى.
«قازىرگى تاڭدا جوق. ءبىراق ءبىز حالىقارالىق جۇيەگە مۇشە بولعان سوڭ، ءبارى كورىنەتىن بولادى. مۇمكىن، جەكە بريفينگ وتكىزىپ، قاراجاتتىڭ قاشان، كىم ارقىلى شىعارىلعانىن، كىمنىڭ قانداي كريپتواميانىندا زاڭسىز قاراجات ساقتاپ وتىرعانىن جاريالايمىز. تەحنولوگيالىق مۇمكىندىك بار، تەك ۋاقىت قاجەت»، - دەپ ۋادە بەردى بەرىك شولپانقۇلوۆ.
بۇعان دەيىن شولپانقۇلوۆ قازاقستاندا كريپتوۆاليۋتانى رەسمي تۇردە ساتىپ الىپ، ساتۋعا مۇمكىندىك بەرەتىن زاڭنامالىق وزگەرىستەر دايىندالىپ جاتقانىن حابارلاعان ەدى.
