قازاقستاننان الەمنىڭ 31 ەلىنە تىكەلەي ۇشۋعا بولادى - كولىك مينيسترلىگى

استانا. KAZINFORM - كولىك مينيسترلىگى تەمىرجول جانە ازاماتتىق اۆياتسيا سالاسىنداعى مارشرۋتتىق جەلى تۋرالى حابارلادى.

تەمىرجول كولىگى

بۇگىنگى تاڭدا ەلىمىزدە جولاۋشىلار تاسىمالى سالاسىندا 154 تەمىرجول مارشرۋتى ورىندالادى.

ولاردىڭ ىشىندە:

• 112 مارشرۋتتى «جولاۋشىلار تاسىمالى» ا ق ورىنداسا؛

• 30 مارشرۋت جەكەمەنشىك تاسىمالداۋشىلارعا تيەسىلى؛

• ال قالعان 12 مارشرۋت حالىقارالىق مارشرۋتقا جاتادى.

2025 -جىلدىڭ العاشقى 6-ايىندا تەمىرجول كولىگىمەن 9,5 ميلليون جولاۋشى تاسىمالداندى. جولاۋشىلار ۆاگوندارىن جاڭارتۋ بويىنشا جۇيەلى جۇمىس جۇرگىزىلۋدە. جىل باسىنان بەرى شامامەن 60 جاڭا جولاۋشىلار ۆاگونى ساتىپ الىندى.

اۋە قاتىناسى

ازاماتتىق اۆياتسيا سالاسىندا ىشكى جانە حالىقارالىق باعىتتاردىڭ سانى ارتىپ كەلەدى:

• ىشكى باعىتتاردا 61 مارشرۋت بويىنشا اپتا سايىن 849 رەيس ورىندالادى؛

• حالىقارالىق باعىتتاردا 144 مارشرۋت بويىنشا اپتاسىنا 842 رەيس جۇزەگە اسىرىلادى. قازاقستاننان الەمنىڭ 31 ەلىنە تىكەلەي ۇشۋعا بولادى.

حالىقارالىق اۋە رەيستەر گەوگرافياسى الەمنىڭ كەلەسى ەلدەرىن قامتيدى:

رەسەي، قىرعىزستان، وزبەكستان، تاجىكستان، گرۋزيا، بەلارۋس، ءازىربايجان، تۋركيا، ۇلى بريتانيا، گەرمانيا، يتاليا، نيدەرلاندى، پولشا، چەحيا، ۆەنگريا، چەرنوگوريا، ب ا ءا، كاتار، يران، مىسىر، كۋۆەيت، باحرەين، ومان، وڭتۇستىك كورەيا، قىتاي، ءۇندىستان، ۆەتنام، تايلاند، موڭعوليا، مالايزيا، مالديۆارالدارى.