قازاقستاننان 300 تالاپكەر تۇركيا گرانتىن يەلەندى

استانا. قازاقپارات - 2024-2025 وقۋ جىلىندا 300 قازاقستاندىق ستۋدەنت تۇركيا رەسپۋبليكاسىنىڭ Türkiye Burslarıگرانتتىق باعدارلاماسى اياسىندا تۇركيانىڭ مەملەكەتتىك ۋنيۆەرسيتەتتەرىندە وقۋعا مۇمكىندىك الدى.

بۇل تۋرالى عىلىم جانە جوعارى ءبىلىم مينيسترلىگىنىڭ باسپا ءسوز قىزمەتى حابارلادى.

بۇل باعدارلاما - تۇركيادا جوعارى ءبىلىم الۋ ءۇشىن تولىق قارجىلاندىرۋدى قامتاماسىز ەتە وتىرىپ، شەتەلدىك ستۋدەنتتەردى قولداۋعا باعىتتالعان نەگىزگى باستامالاردىڭ ءبىرى.

الەمنىڭ تۇكپىر-تۇكپىرىنەن تالانتتى تالاپكەرلەرگە ارنالعان Türkiye Bursları باعدارلاماسى 1991-جىلدان بەرى جۇمىس ىستەيدى. وسى ۋاقىتقا دەيىن قازاقستاننان بۇل گرانتتى 9 مىڭنان استام ستۋدەنت يەلەنگەن ەدى.

بيىلعى وقۋ جىلىنا ارنالعان گرانتقا يە بولعان قازاقستاندىق ستۋدەنتتەردىڭ ءتىزىمى تامىز ايىندا جاريالاندى.