قازاقستاندىقتاردىڭ قۇقىعى شەتەلدە قالاي قورعالادى

استانا. KAZINFORM - قازاقستان رەسپۋبليكاسىنىڭ سوتى ەل ىشىندە عانا ەمەس، شەتەلدە دە ازاماتتاردىڭ قۇقىعىن قورعاۋ ءۇشىن حالىقارالىق قۇقىقتىق كومەك كورسەتەدى.

ەلوردا سوتىنىڭ مالىمەتىنە سۇيەنسەك، قازاقستان ازاماتتارىنا شەتەلدە قۇقىقتىق كومەك كورسەتىلەتىن نەگىزگى باعىتتار:

- سوت قۇجاتتارىن تاپسىرۋ؛

- ايعاقتاردى الۋ، ساراپتاما جۇرگىزۋ جانە باسقا دا پروتسەستەر؛

- شەتەل سوتتارىنىڭ شەشىمدەرىن تانۋ جانە ورىنداۋ؛

- شەتەلدەن اليمەنت ءوندىرۋ.

شەتەلدە سوت پروتسەسى قالاي جۇزەگە اسىرىلادى؟

بارلىق ارەكەت گااگا، مينسك جانە كيشينيەۆ كونۆەنتسيالارى سياقتى حالىقارالىق كەلىسىمدەرگە نەمەسە ءوزارا ارەكەتتەستىك قاعيداتىنا سايكەس جۇزەگە اسىرىلادى. سوت تاپسىرمالارى حالىقارالىق ستاندارتتارعا ساي دايىندالىپ، ولاردىڭ ورىندالۋىنا كەپىلدىك بەرىلەدى.

- قازاقستان سوتى ازاماتتاردىڭ قۇقىعىن الەمنىڭ كەز كەلگەن نۇكتەسىندە قورعاۋ ءۇشىن حالىقارالىق سەرىكتەستىكتى كەڭەيتىپ، پروتسەستەردى جەتىلدىرۋدى جالعاستىرۋدا، - دەلىنگەن حابارلامادا.

ەسكە سالا كەتسەك، وتكەن جىلدىڭ سوڭىندا مەملەكەت باسشىسى وتاندىق سوت جۇيەسىن رەفورمالاۋعا قاتىستى زاڭعا قول قويدى.