قازاقستاندىقتاردىڭ پاسپورتىندا جاڭا قورعاۋ ەلەمەنتى پايدا بولادى

استانا. KAZINFORM - قازاقستان ازاماتتارىنىڭ ءتولقۇجاتىندا جاڭا قورعاۋ ەلەمەنتى پايدا بولادى. بۇل تۋرالى ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ ءمالىم ەتتى.

- ۇلتتىق ءتولقۇجاتتى قورعاۋ دەڭگەيىن كوتەرىپ جاتىرمىز. ءبىزدىڭ ازاماتتار ۆيزاسىز 43 ەلگە بارا الادى. قازاقستاندىق پاسپورت حالىقارالىق ستاندارتتارعا سايكەس كەلەدى. قاجەتتى قورعاۋ ەلەمەنتتەرىن ودان ءارى جەتىلدىرىپ جاتىرمىز (فوتوداعى اتى مەن تەگى ميكروماتىن تۇرىندە كورسەتىلەدى)، - دەدى باۋىرجان الەنوۆ ۇكىمەت وتىرىسىندا.

ودان ءارى ءمينيستردىڭ ءبىرىنشى ورىنباسارى كوشى-قون سالاسىندا باقىلاۋ كۇشەيەتىنىن ايتتى.

- قاۋىپسىزدىك كەڭەسىندە بەرىلگەن تاپسىرمالار اياسىندا كوشى-قون سالاسىنىڭ اقپاراتتىق جۇيەسىن ينتەگراتسيالاۋ جۇمىسىن ىسكە اسىرىپ جاتىرمىز. ىشكى ىستەر ورگاندارى كوشى-قون باقىلاۋىن جەتىلدىرۋ بويىنشا بارلىق قاجەتتى شارانى قابىلدايدى. قۇجات جانە ەلگە كەلگەن ازاماتتاردى تىركەۋ پروتسەسىنە مونيتورينگ جۇرگىزىلەدى. جالعان تىركەۋى بار پاتەرلەردى انىقتاپ، ولاردىڭ سانىن ازايتتىق، سونىمەن قاتار پاتەر يەلەرى جاۋاپكەرشىلىككە تارتىلدى، - دەپ تولىقتىردى ۆەدومستۆو وكىلى.

ەسكە سالساق، جىل باسىندا ەلىمىزدە دەموگرافيا جانە كوشى-قون سالاسىن رەتتەيتىن مەملەكەتتىك ورگان قۇرۋ ۇسىنىلعان ەدى.