قازاقستاندىقتارعا كرەديت الماۋعا كومەكتەسەتىن كەڭسەلەر اشىلادى

Кредит
Фото: Фото: freepik.com

  پرەمەر- ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ «قارىزسىز قوعام» جوباسىن جۇزەگە اسىرۋ ماسەلەسى بويىنشا كەڭەس وتكىزدى. kazinform بۇل تۋرالى primeminister.kz سايتىنا سىلتەمە جاساپ حابارلايدى.

جوبا اياسىندا كەڭسەلەر اشىلادى:

بارلىق وبلىس ورتالىقتارىندا؛

رەسپۋبليكالىق ماڭىزى بار قالالاردا.

ورتالىق كەڭسە استانا قالاسىندا ورنالاسادى.

اتالعان الاڭداردا كونسۋلتاتيۆتىك- كەڭەسشى توپتار قۇرىلادى، ولاردىڭ قۇرامىنا قارجى بويىنشا تاۋەلسىز كەڭەسشىلەر، قارجى نارىعىن رەتتەۋ جانە دامىتۋ اگەنتتىگىنىڭ وكىلدەرى جانە جەكە سوت ورىنداۋشىلارى كىرەدى.

جوبالىق كەڭسەلەردىڭ ماقساتى:

ازاماتتارعا بانكتەر مەن شاعىن قارجى ۇيىمدارى الدىنداعى مەرزىمى وتكەن بەرەشەكتەردى رەتتەۋ بويىنشا كەڭەس بەرۋ؛

بيزنەستى جوسپارلاۋعا كومەك كورسەتۋ؛

جۇمىسقا ورنالاسۋعا جاردەم بەرۋ؛

مەكتەپتەردىڭ، كوللەدجدەردىڭ جانە جوعارى وقۋ ورىندارىنىڭ وقىتۋشىلارىن قارجى جانە قۇقىق ساۋاتتىلىعىنا ۇيرەتەتىن وقۋ- ادىستەمەلىك ماتەريالداردى ازىرلەۋ جانە مامانداردى دايارلاۋ.

ۇسىنىلعان مالىمەتكە سۇيەنسەك، حالىقتىڭ ودان ءارى قارىز الۋىنا جول بەرمەۋ، بورىشتىق جۇكتەمەنىڭ ءوسۋىن شەكتەۋ، قارجى نارىعىنداعى الاياقتىق فاكتىلەرىن ازايتۋ، اتقارۋشىلىق ءىس جۇرگىزۋدى جەتىلدىرۋ جانە تۇتىنۋشىلاردىڭ قۇقىقتارىن قورعاۋدى كۇشەيتۋ ءۇشىن زاڭنامانى ودان ءارى جەتىلدىرۋ ارقىلى جۇيەلى شارالار قابىلداناتىن بولادى.

«قازاقستان رەسپۋبليكاسى ازاماتتارىنىڭ تولەم قابىلەتتىلىگىن جانە بانكروتتىقتى قالپىنا كەلتىرۋ تۋرالى» زاڭى اياسىندا وسى جىلدىڭ 3-ناۋرىزى مەن 11-قازانى ارالىعىندا قازاقستاندىقتاردان سوتتان تىس بانكروتتىققا 68,3 مىڭ ءوتىنىش تۇسكەن. ولاردىڭ 55,2 مىڭى بويىنشا ازاماتتار 1414 نومىرىنە SMS حابارلاما جىبەرۋ ارقىلى وسى ءتارتىپتى قولدانۋدان باس تارتۋ تۋرالى حابارلاما الدى.

5,7 مىڭ ازاماتقا قاتىستى سوتتان تىس بانكروتتىق ءراسىمى جۇرگىزىلىپ جاتىر، 1,2 مىڭ ءوتىنىش قارالۋدا. 5,2 مىڭ ازامات بانكروت دەپ تانىلىپ، ولاردىڭ جالپى بەرەشەگى 8 ميلليارد تەڭگەدەن استى.

ەسكە سالا كەتەيىك، مەملەكەت باسشىسى بيىلعى 1-قىركۇيەكتەگى قازاقستان حالقىنا جولداۋىندا «قارىزسىز قوعام» جوباسىنىڭ ماڭىزدىلىعىن جانە ونى ەلىمىزدىڭ بارلىق ايماعىندا كەڭەيتۋ قاجەتتىگىن اتاپ وتكەن بولاتىن. «قارىزسىز قوعام» جوباسىنىڭ ماقساتى - ازاماتتارعا قارجىلىق جانە قۇقىقتىق بىلىكتى كومەك كورسەتۋ، حالىقتىڭ قارجىلىق ساۋاتتىلىعىن ارتتىرۋ، ازاماتتاردىڭ بانكتىك نەسيەلەر مەن شاعىن نەسيەلەر بويىنشا پروبلەمالىق قارىزدارىن شەشۋگە كومەكتەسۋ.

سوڭعى جاڭالىقتار