قازاقستاندىقتار قىتاي كولىكتەرىنە شاعىمدانىپ جاتىر - مينيسترلىك نە دەيدى
استانا. KAZINFORM - قازاقستاندىقتار قىتايدان اكەلىنەتىن اۆتوكولىكتەر كليماتقا بەيىمدەلمەگەن دەپ شاعىمدانىپ جاتىر.
ۇكىمەت وتىرىسىنان كەيىن وتكەن باسپا ءسوز ءماسليحاتىندا ب ا ق وكىلدەرى ونەركاسىپ جانە قۇرىلىس ۆيتسە-ءمينيسترى ولجاس ساپاربەكوۆكە كەلەسى ساۋالدى قويدى: «قازاقستاندىقتار قىتاي اۆتوكولىكتەرىنە شاعىمدانا باستادى. ايتۋىنشا، قىتايلىق اۆتوكولىكتەر ءبىزدىڭ كليماتقا بەيىمدەلمەگەن. بۇل پىكىرمەن كەلىسەسىز بە؟ بولاشاقتا قازاقستاندىق وندىرۋشىلەر قىتايلىق اۆتوكولىكتەردى نەمەسە ولاردىڭ قوسالقى بولشەكتەرىن قۇراستىرۋى مۇمكىن بە؟»
- الدىمەن ناقتى قانداي اۆتوكولىكتەر تۋرالى ايتىلعانىن انىقتاۋ كەرەك، ياعني بەلگىسىز جولمەن اكەلىنگەن كولىكتەر مە، الدە قازاقستاندا رەسمي تۇردە ساتىپ الىنعان با؟ بيىل ەكى زاۋىتتى ىسكە قوسۋ جوسپاردا بار، اتاپ ايتقاندا، Changan, Haval جانە Chery ماركالارىن شىعارادى. زاۋىت جاقىن ارادا ىسكە قوسىلادى، جوبانىڭ قۋاتتىلىعى جىلىنا 100 مىڭنان استام اۆتوكولىك. ول جەردە قىتاي برەندتەرىنىڭ كولىكتەرى وندىرىلەدى جانە ولاردىڭ قۇرامداس بولىكتەرىن جەرگىلىكتەندىرۋ دە كوزدەلگەن. ءاربىر ءوندىرۋشى بەلگىلى ءبىر مىندەتتەمەنى ءوز موينىنا الدى (تەحنولوگيالىق وپەراتسيالار، پروتسەستەر، قوسالقى بولشەكتەردى جەرگىلىكتەندىرۋ بويىنشا). وتكەن جىلى كەيبىر كومپونەنتتەر بويىنشا جەرگىلىكتەندىرۋ باستالدى، الداعى ۋاقىتتا پلاستيكالىق بولشەكتەردى، ورىندىقتاردى، مۋلتيمەديالىق جۇيەلەردى ءوندىرۋ جوسپارلانىپ وتىر، - دەپ جاۋاپ بەردى ونەركاسىپ جانە قۇرىلىس ۆيتسە-ءمينيسترى.
سونداي-اق مينيستر ورىنباسارىنان قىتايلىق كولىكتەر قازاقستاننىڭ كليماتىنا بەيىمدىلىگىنە قاتىستى جەكە ويىن سۇرادى.
- ەگەر اۆتوكولىكتەردى دەلدالدار اكەلگەن بولسا، وندا ول قازاقستان زاڭناماسى اياسىندا قارالۋى ءتيىس. بىزدە تەحنيكالىق رەگلامەنت تالاپتارى بار جانە اۆتوكولىكتەر سولارعا سايكەس كەلۋى كەرەك. ول كولىكتەر قالاي اكەلىندى، قاجەتتى قۇجاتتاردى قالاي الدى، ول جاعىن مەن ايتا المايمىن. ال قازاقستاندا وندىرىلەتىن كولىكتەر بويىنشا تالاپتار بار جانە ولار سايكەس كەلەدى، - دەيدى ول.
ايتا كەتەيىك، قازاقستاندا اۆتوكولىكتى مەملەكەتتىك نومىرىمەن بىرگە ساتۋ مۇمكىندىگى بەرىلمەك.
