قازاقستاندىقتار قاي ەلگە كوپ ساياحاتتايدى؟

استانا. قازاقپارات - جاز كەزىندە ساياحاتتاۋشىلار كۇرت كوبەيەدى. ءبىرى دەمالىسىندا اۋىلعا نە وزگە قالاعا بارسا، ەندى ءبىرى شەتەلگە شىققاندى قۇپ كورەدى.

اركىم «كورپەسىنە قاراي كوسىلەدى». دەگەنمەن، وتانداستارىمىز بۇرىنعىداي بەلگىلى اۋماقتارعا عانا ساپارلامايدى. جاڭا ەل، جاڭا مادەنيەتكە قىزىعاتىنداردىڭ سانى ارتقان. ءسويتىپ، قازاقستاندىقتار ساياحاتىن قاي ەلگە جوسپارلايدى؟

ساياحات تەك دەمالىس ەمەس، ەل كورۋ، جەر كورۋ. وزگەنىڭ مادەنيەتىمەن تانىسۋ، كوكجيەگىن كەڭەيتۋ. ال قاي ەلگە بارامىن دەگەن سۇراققا كەلسەك - تاڭداۋ كوپ، ءبىراق ءار ساپاردىڭ وزىندىك ەرەكشەلىگى بار. جىل سايىن دەمالىس دەسە، قازاقستاندىقتاردىڭ ويىنا ءبىرىنشى بولىپ انكارا مەن دۋباي تۇسەتىن. ءبىراق كەيىنگى كەزدە تەڭىزدەن شارشاعاندار ەكزوتيكا ىزدەپ، تۋريستەر ءۇشىن جاڭا باعىت سانالاتىن كامبودجاعا دەيىن بارىپ ءجۇر.

قىرمىزى ابىلاي قىزى، استانا قالاسىنىڭ تۇرعىنى:

- ءوزىمنىڭ تاجىريبەمدە نەگىزى 6 مەملەكەت. ول كامبودجا، ءۇندىستان، تۇركيا، رەسەي فەدەراتسياسى، التاي جانە مىسىر مەملەكەتى. قاراشا ايىندا الماتى - استانا - سيانۋكۆيل باعىتتارى بويىنشا تىكەلەي رەيس اشىلعان بولاتىن. مەنىڭ وتباسىم سول مۇمكىندىكتى پايدالانا وتىرىپ، سول كامبودجاعا ساياحاتتاعان بولاتىنبىز. ءۇندىستانعا بالا كەزدەن قىزىعاتىنبىز.

قازىرگى ساياحات تەك جولعا بيلەت الۋمەن شەكتەلمەيدى. قاۋىپسىزدىك جانە جولدىڭ باعىت- باعدارىن بىلمەك كەرەك. ال مۇنىڭ ءبارى وتاندىق ءموبيلدى قوسىمشا ارقىلى وڭاي شەشىلەدى. پلاتفورمانى قولدانىپ، تۋر جايلى اقپاراتتى تەكسەرىپ، توتەنشە جاعدايعا تاپ بولعان كەزدە بىردەن ەلشىلىكپەن نەمەسە كونسۋلدىقپەن بايلانىسۋعا بولادى.

بىلتىر شەتەلگە شىققان قازاقستاندىقتار سانى 1 ميلليوننان اسقان. تۇركياعا 303 مىڭ ادام ساياحاتتاسا، 204 مىڭى مىسىرعا، 197 مىڭى بىرىككەن اراب امىرلىكتەرىنە بارعان. ال ۆەتنام 143، تايلاند 131 مىڭ وتانداسىمىزدى قابىلداعان.

بيىلعى جىلدىڭ العاشقى جارتىسىندا شەتەلگە شىققان قازاقستاندىقتاردىڭ سانى 520 مىڭنان استى. كوش باسىنداعى ۆەتنام ەلىنە 118مىڭ قازاقستاندىقتىڭ جولى تۇسسە، مىسىر مەن بىرىككەن اراب امىرلىكتەرى 100 مىڭعا جۋىق تۋريست تارتقان. تۇركيا 71 مىڭ قوناقتى قابىلداسا، تايلاند 64 مىڭ تۋريسكە جايلى جاعداي جاساپتى.

شەتەلگە شىعاتىن تۋريستەردىڭ كوبەيۋىنە تەك سۇرانىس قانا ەمەس، ينفراقۇرىلىم مەن كولىك قاتىناسى دا اسەر ەتەدى. اسىرەسە، تىكەلەي اۋە رەيستەرىنىڭ ارتۋى مەن جاڭا باعىتتاردىڭ اشىلۋى - حالىقارالىق تۋريزمدى دامىتۋدىڭ ماڭىزدى تەتىگى.

تۇركيا مەن مىسىردان باستالعان ساپارلار ەندى ۆەتنام مەن تايلاند سياقتى جاڭا باعىتتارعا ويىسا باستاعان. بۇل تۋريزم دەمالۋ عانا ەمەس، جاڭا الەمدى تانۋعا جاسالعان قادام ەكەنىن دە بايقاتادى.

24.kz