قازاقستاندىقتار قانداي جاعدايدا كرەديت تولەۋدەن بوساتىلادى

ءماجىلىس قاراۋىنا ەنگىزىلگەن زاڭ جوباسىندا كرەديت الۋدان الدىن الا جانە رەسمي تۇردە باس تارتقان قازاقستاندىقتاردى الاياقتار راسىمدەگەن قارىزدان بوساتۋ تۋرالى نورما قامتىلعان.

وسى ورايدا دەپۋتات بەرىك بەيسەنعاليەۆ جاڭا زاڭ جوباسىندا ەسكەرىلگەن وسى نورماعا قاتىستى تۇسىنىك بەردى، دەپ حابارلايدى Kazinform.

«ادامدار كرەديت الۋعا ءوتىنىم بەرمەسە دە، ونىڭ اتىنا بوتەن بىرەۋ نەسيە راسىمدەپ جاتقان وقيعالار كەزدەسىپ جاتادى. كەيىن وسى ادام شىن مانىندە كرەديت قاراجاتىن الماعانىن دالەلدەپ اۋرەگە تۇسەتىن. ياعني نەسيە الۋ ءۇشىن بانك عيماراتىنا دا بارماعانىن ايتىپ جاتادى. قازىر ۇسىنىلىپ جاتقان زاڭ جوباسىندا ارنايى تارماق ەنگىزىلۋدە. ونىڭ اياسىندا ادامدار eGov.kz جۇيەسى ارقىلى نەسيە راسىمدەۋدەن الدىن الا باس تارتا الادى»، - دەدى ب. بەيسەنعاليەۆ اگەنتتىك تىلشىسىنە بەرگەن سۇحباتىندا.

ءماجىلىس دەپۋتاتىنىڭ سوزىنە قاراعاندا، ەگەر ادامدار كرەديتتەن رەسمي تۇردە باس تارتسا، وندا بۇل ادام الاياقتاردىڭ تۇزاعىنا تۇسپەيدى.

«ناقتى ءبىر ادام وسى مۇمكىندىكتى پايدالانىپ نەسيەدەن باس تارتقانىمەن، كەيىننەن ونىڭ اتىنا بىرەۋ كرەديت راسىمدەپ جاتسا، وندا بۇل ادام بۇرىنعىداي دالەل ايتىپ، اۋرە بولمايدى. سەبەبى eGov-تا وسى ادامنىڭ كرەديتتەن باس تارتقانى تۋرالى بەلگى تۇرعانىن ەسكەرىپ، بانك وسى زاڭسىز راسىمدەلگەن نەسيە بويىنشا مىندەتتەمەنى وشىرەدى. اتاپ ايتقاندا، eGov جۇيەسىندە كرەديتتەن باس تارتۋ تۋرالى بەلگىنى قويساڭىز، وندا الاياقتاردىڭ سىزگە «ءىلىپ كەتكەن» قارىزىنا جاۋاپ بەرمەيسىز. ال كەيىننەن بانكتەن نەسيە العىڭىز كەلسە، eGov-تان جاڭاعى تىيىم سالۋ بەلگىسىن وشىرەسىز. بۇل قادامدار الاياقتار تۇزاعىنا ءتۇسىپ قالماۋ ءۇشىن كەرەك»، - دەدى دەپۋتات.

بۇگىن حابارلانعانىمىزداي، پارلامەنت ءماجىلىسىنىڭ قاراۋىنا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەديت بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەنگىزىلدى.

بۇل قۇجاتتا نەسيەلەر بويىنشا مەرزىمى وتكەن بەرەشەگى بولعان جاعدايدا ازاماتتارعا جاڭا تۇتىنۋشىلىق نەسيەلەر بەرۋگە تىيىم سالۋ، 90 كۇن كەشىكتىرىلگەننەن كەيىن بارلىق نەسيە بويىنشا پايىزداردى ەسەپتەۋگە تىيىم سالۋ، سونداي-اق بانكتەر مەن ميكروقارجى ۇيىمدارىنىڭ كوللەكتورلىق اگەنتتىكتەرگە ازاماتتاردىڭ نەسيەلەرىن ساتۋىنا شەكتەۋ ەنگىزۋ جانە تاعى دا باسقا نورمالار قاراستىرىلعان.