قازاقستاندىقتار قاشان وڭتۇستىك كورەيادا زاڭدى جۇمىس ىستەي الادى

استانا. KAZINFORM - قازاقستاندىقتاردىڭ وڭتۇستىك كورەيادا زاڭدى تۇردە جۇمىسقا ورنالاسۋعا مۇمكىندىك بەرەتىن وڭتۇستىك كورەيالىق «Employment permit system» جۇيەسىنە قوسىلۋ پروتسەسى بيىل اياقتالۋى مۇمكىن. بۇل تۋرالى ەڭبەك جانە حالىقتى الەۋمەتتىك قولداۋ مينيسترلىگى مەملەكەتتىك ەڭبەك ينسپەكسياسى كوميتەتىنىڭ ءتوراعاسى ەربولات ءابىلحاتين ايتىپ بەردى.

تىلشىلەر وڭتۇستىك كورەيالىق «ەmployment permit system» جۇيەسىنە قازاقستاننىڭ تىركەلۋ پروتسەسى قاي كەزەڭدە تۇرعانىن سۇرادى.

− وتكەن جىلى قازاقستاندا كوشى-قون ساياساتىنىڭ تۇجىرىمداماسى قابىلداندى، ونىڭ ماقساتتارىنىڭ ءبىرى - قازاقستاندىقتارعا شەتەلدە جۇمىسقا ورنالاسۋعا جانە زاڭدى ەڭبەك ەتۋىنە مۇمكىندىك بەرۋ. وسى باعىتتا ءبىرقاتار ەلدەرمەن كەلىسىم جاساسۋ جۇمىستارى جۇرگىزىلۋدە. وتكەن جىلى قاتارمەن قازاقستاندىقتاردى جۇمىسقا ورنالاستىرۋ جونىندە كەلىسىمگە قول قويىلدى. سونداي-اق، وڭتۇستىك كورەيامەن دە اۋقىمدى جۇمىس جۇرگىزىلدى، - دەدى ەربولات ءابىلحاتين ۇكىمەت ۇيىندە وتكەن بريفينگتە.

ونىڭ ايتۋىنشا، قازاقستاندىقتار، اسىرەسە ەلدىڭ وڭتۇستىك وڭىرلەرىنىڭ تۇرعىندارى بۇعان زور قىزىعۋشىلىق تانىتىپ وتىر.

− وكىنىشكە قاراي، ولار قازىر وڭتۇستىك كورەيادا زاڭسىز جۇمىس ىستەپ ءجۇر. ءبىزدىڭ ماقساتىمىز - ولاردىڭ ەڭبەگىن زاڭداستىرۋ. قازاقستان تاراپىنان سىرتقى ىستەر مينيسترلىگى ءتيىستى ۇسىنىستاردى وڭتۇستىك كورەياعا جولدادى. الايدا، بۇل ەلدە ۇكىمەت اۋىسقاننان كەيىن پروتسەسس ءسال باياۋلادى. دەگەنمەن، جاڭا ۇكىمەت پەن پرەزيدەنتتىڭ كەلۋىن ەسكەرە وتىرىپ، بىلتىر باستالعان جۇمىس بيىل اياقتالادى دەپ ويلايمىن. بۇل پروتسەسس قازاقستانعا ەمەس، تولىقتاي وڭتۇستىك كورەيا ۇكىمەتىنىڭ شەشىمىنە بايلانىستى، − دەپ ءتۇسىندىردى مينيسترلىك وكىلى.

ايتا كەتەيىك، بۇگىنگى ۇكىمەت وتىرىسىندا وندىرىستە قاۋىپسىز ەڭبەك جاعدايلارىن قامتاماسىز ەتۋ جانە ەڭبەك سالاسىن تولىق سيفرلاندىرۋ تاقىرىبى قارالدى.

ەلىمىزدە ەڭبەك قاۋىپسىزدىگى ماماندارىن دايارلايتىن وقۋ ورتالىعى اشىلادى.

اۆتور

ايجان سەرىكجان قىزى