قازاقستاندىقتار ەندى جەكە كۋالىكتى ونلاين اۋىستىرا الادى

استانا. قازاقپارات - جەكە كۋالىكتى ونلاين اۋىستىرۋ تەك ونىڭ مەرزىمى ءوتىپ كەتۋ سەبەبىمەن عانا جۇزەگە اسىرىلاتىنى كورسەتىلگەن.قازاقستاندىقتار جەكە كۋالىگىن ونلاين فورماتتا اۋىستىرا الادى. ەلىمىزدە پيلوتتىق جوبا ىسكە قوسىلىپ جاتىر. ىشكى ىستەر مينيسترلىگى مەن سيفرلىق دامۋ مينيسترلىگىنىڭ بۇيرىق جوباسى اشىق ن ق ا پورتالىندا جاريالاندى.

«جوبا «مەملەكەتتىك قىزمەتتەر كورسەتۋ تۋرالى» زاڭدى ىسكە اسىرۋ شەڭبەرىندە ۇدەرىستى جەتىلدىرۋ، مەملەكەتتىك قىزمەتتەردى كورسەتۋ تيىمدىلىگىن ارتتىرۋ، سونداي-اق قازاقستان رەسپۋبليكاسىنىڭ ازاماتتارىنا ءتولقۇجاتتاردى جانە جەكە كۋالىكتەردى بەرۋ ماسەلەلەرى بويىنشا مەملەكەتتىك قىزمەت كورسەتۋ ساپاسىن ارتتىرۋ بويىنشا جۇمىستى ۇيىمداستىرۋ ماقساتىندا ازىرلەندى.

جوبانىڭ ماقساتى - 2026 -جىلدىڭ 1-ناۋرىزىنا دەيىن جارامدىلىق مەرزىمىنىڭ اياقتالۋىنا بايلانىستى جەكە كۋالىك بەرۋ بويىنشا مەملەكەتتىك قىزمەتتى كورسەتۋدى قولدانىستاعى تارتىپكە بالاما رەتىندە ونلاين فورماتقا كوشىرۋ»، - دەلىنگەن قۇجاتتىڭ تۇسىندىرمەسىندە.

جەكە كۋالىكتى ونلاين اۋىستىرۋ تەك ونىڭ مەرزىمى ءوتىپ كەتۋ سەبەبىمەن عانا جۇزەگە اسىرىلاتىنى كورسەتىلگەن. قىزمەت مىنا جاعدايلاردا عانا كورسەتىلەدى:

جەكە كۋالىك مەرزىمىنىڭ اياقتالۋىنا 30 نەمەسە ودان از كۇن قالسا؛
جەكە كۋالىكتىڭ قولدانىلۋ مەرزىمىنەن 10 كۇنتىزبەلىك كۇن عانا اسسا.
«وزگە سەبەپ بويىنشا قىزمەت «ەلەكتروندىق ۇكىمەت» پورتالى جانە موبيلدى قوسىمشالار ارقىلى كورسەتىلمەيدى جانە كورسەتىلەتىن قىزمەتتى الۋشىعا «راسىمدەۋ مۇمكىن ەمەس، حالىققا قىزمەت كورسەتۋ ورتالىعىنا جۇگىنىڭىز» دەگەن حابارلاما جىبەرىلەدى»، - دەلىنگەن قۇجاتتا.

«ەلەكتروندىق ۇكىمەتتىڭ» رەسمي سايتىندا حابارلانعانداي، قازاقستان رەسپۋبليكاسى ازاماتىنىڭ جەكە كۋالىگى ازاماتتارعا 16 جاستان باستاپ بەرىلەدى جانە رەسپۋبليكا اۋماعىندا جارامدى. ونىڭ اۋماعىندا تۇراتىن قازاقستان رەسپۋبليكاسىنىڭ بارلىق ازاماتىندا جەكە كۋالىك بولۋى مىندەتتى. جەكە كۋالىك 10 جىلعا بەرىلەدى.

ەسكە سالا كەتەيىك، بىلتىر جازدا 15-ماۋسىمنان باستاپ قازاقستاندىقتاردىڭ جەكە كۋالىكتەرى جاڭا ۇلگى بويىنشا بەرىلە باستاعانى حابارلانعان بولاتىن - قۇجاتتا بىرنەشە جاڭا ءورىس پايدا بولدى.

كەيىنىرەك جاڭا ۇلگىدەگى جەكە كۋالىكتىڭ قانداي ەكەنى كورسەتىلدى. جەكە كۋالىكتىڭ الدىڭعى جاعىندا بۇرىنعىداي جەكە دەرەكتەر كورسەتىلەدى - تەگى، اتى، اكەسىنىڭ اتى جانە تۋعان كۇنى. ازاماتتىڭ جىنىسى تۋرالى اقپارات جاڭادان قوسىلدى - ول ە نەمەسە ءا ارىپتەرىمەن تومەنگى وڭ جاق بۇرىشتا بەلگىلەنگەن.

قۇجاتتى بەرگەن ورگان تۋرالى اقپارات جارامدىلىق مەرزىمىنىڭ وڭ جاعىندا ورنالاسقان.