قازاقستاندىقتار جەكە كۋالىكتى ونلاين اۋىستىرا الادى

استانا. KAZINFORM - ەندى قازاقستاندىقتار جەكە كۋالىكتى ونلاين فورماتتا راسىمدەي الادى.

ىشكى ىستەر مينيسترلىگى مەن سيفرلىق دامۋ، يننوۆاتسيالار جانە ايروعارىش ونەركاسىبى مينيسترلىگىنىڭ بىرلەسىپ ازىرلەگەن قۇجات جوباسى «اشىق ن ق ا» پورتالىندا جاريالاندى.

جاڭاشىلدىق قازاقستاندىقتارعا ءتولقۇجات پەن جەكە كۋالىكتى ەلەكتروندىق ۇكىمەت پورتالى مەن موبيلدى قوسىمشالار ارقىلى اۋىستىرۋعا مۇمكىندىك بەرەدى.

- جوبانىڭ ماقساتى - «قازاقستان رەسپۋبليكاسى ازاماتتارىنا ءتولقۇجاتتار مەن جەكە كۋالىكتەر بەرۋ» مەملەكەتتىك قىزمەتىن قولدانىستاعى تارتىپكە بالاما رەتىندە ونلاين فورماتقا كوشىرۋ. بۇل پيلوتتىق جوبا رەتىندە 2026 -جىلدىڭ 1- ناۋرىزىنا دەيىن جۇزەگە اسىرىلادى، - دەلىنگەن تۇسىندىرمە جازبادا.

اتالعان قۇجات جوباسى 19- ناۋرىزعا دەيىن قوعامدىق تالقىلاۋعا ۇسىنىلىپ وتىر.

ايتا كەتسەك، ەلىمىزدە بيىل 1- قاڭتاردان باستاپ ءتولقۇجات پەن جەكە كۋالىك جاساتۋ قۇنى ءوستى.

سونداي-اق جىل باسىندا حالىققا قىزمەت كورسەتۋ ورتالىقتارى پاسپورت پەن جەكە كۋالىكتى تەرمينال ارقىلى بەرە باستايتىنى تۋرالى جازعان بولاتىنبىز.

اۆتور

داۋلەت ىزتىلەۋ