قازاقستاندىقتار جاڭا ادىستەرمەن ەم الماي ءجۇر - دەپۋتات
استانا. KAZINFORM - ەسكىرگەن ەمدەۋ حاتتامالارى ۇلكەن ماسەلەگە اينالدى. بۇل تۋرالى ءماجىلىسىنىڭ جالپى وتىرىسىندا دەپۋتات اسحات ايماعامبەتوۆ ءمالىم ەتتى.
- ءار ادامدى ەمدەگەندە، دارىگەرلەر ارنايى ەمدەۋ حاتتاماسىندا كورسەتىلگەن دارىلەردى پايدالانۋى ءتيىس. ال ەمدەۋ حاتتامالارى ۋاقىتىلى جاڭارتىلماي جاتىر. كلينيكالىق حاتتامالاردىڭ شامامەن 70 پايىزى 5 جىلدان 12 جىلعا دەيىن قايتا قارالماعان. قازىر 1 جىل ىشىندە جاڭا ءدارى ءتۇرى پايدا بولادى. وسىعان بايلانىستى قازاقستاندىقتار جاڭا ادىستەرمەن ەم الا الماي ءجۇر دەپ ايتۋعا بولادى، - دەدى ا. ايماعامبەتوۆ پالاتا وتىرىسىندا ءدارى-دارمەكپەن قامتاماسىز ەتۋ جۇيەسىنە جۇرگىزىلگەن مەملەكەتتىك اۋديت ناتيجەسىن تالقىلاۋ كەزىندە.
ونىڭ ايتۋىنشا، حاتتامالاردى بەكىتۋ پروتسەسىنىڭ ءوزى دە وتە كۇردەلى. كەيدە ول بىرنەشە جىلعا سوزىلىپ كەتەدى.
- تاعى ءبىر ماسەلە - ءتيىمدى پرەپاراتتى تىزىمگە ەنگىزۋ ءۇشىن ءوندىرۋشىنىڭ ءوتىنىشى كەرەك. تيىمسىزدەردى تىزىمنەن الىپ تاستاۋ ءۇشىن دە ازىرلەۋشىنىڭ ءوتىنىشى قاجەت. بىلاي قاراعاندا - پارادوكس. بۇل نورما ءتيىمسىز دارىلەردى تىزىمنەن تەز شىعارۋعا جاساندى تۇردە كەدەرگى جاساۋ ءۇشىن ەنگىزىلگەن سياقتى. مىسالى، تىركەۋ مەرزىمى وتكەن جانە تيىمدىلىگى تومەن بولعان 409 پرەپارات 4 جىل بويى فورمۋلياردان الىنباعان... مۇنداي اقىلعا سىيمايتىن جاعدايدىڭ سەبەبى - مينيسترلىكتىڭ بۇيرىقتارىنداعى قاراما-قايشىلىقتار، - دەدى دەپۋتات.
سونىمەن قاتار ءماجىلىسىنىڭ جالپى وتىرىسىندا دەپۋتات اسحات ايماعامبەتوۆ قازاقستاندا ءدارىنى تىركەۋ ءۇشىن وتە كۇردەلى بيۋروكراتيالىق راسىمدەردەن ءوتۋ كەرەك ەكەنىن ايتىپ، وسى سالانى سىنعا الدى.
اۆتور
رۋسلان عابباسوۆ
