قازاقستاندىقتار ءۇي شاتىرىندا كۇن ەنەرگياسىن ءوندىرىپ، پايدا تابا الادى
استانا. KAZINFORM - قازاقستاندىقتارعا كۇن ەنەرگياسىن ءوندىرىپ قىزىعىن كورىپ قانا قويماي، ساتۋعا دا مۇمكىندىك بەرىلىپ وتىر. بۇل تۋرالى ەنەرگەتيكا ۆيتسە-ءمينيسترى سۇڭعات ەسىمحانوۆ ءمالىم ەتتى.
- وتكەن جىلى زاڭنامانى جاڭارتتىق، قاراپايىم تىلمەن ايتقاندا، ەندى جەكە ءۇي تۇرعىنى شاتىرعا 200 كيلوۆاتتىق كۇن پانەلدەرىن ورناتىپ، ونىڭ 100 كيلوۆاتىن ءوزى تۇتىنىپ، قالعان 100 كيلوۆاتتى ساتا الادى. سول سياقتى ەنەرگيا تاراتۋشى كومپانيا ول ەنەرگيانى وڭىردەگى ورتاشا تاريفپەن ساتىپ الۋعا مىندەتتى. سوندىقتان بۇل ءتيىمدى مەحانيزم دەپ سانايمىز، - دەدى سۇڭعات ەسىمحانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ۆيتسە-ءمينيستردىڭ ايتۋىنشا، قازىر شاعىن بيزنەس بۇل مۇمكىندىكتى بەلسەندى پايدالانا باستادى.
- سوڭعى ءبىر جىلدا جالپى قۋاتتىلىق ەكى ەسەدەن ارتتى. سوندىقتان حالىقتى بەلسەندى بولۋعا شاقىرامىز. ارينە، بۇل جەردە ءتۇسىندىرۋ جۇمىستارىن كۇشەيتۋىمىز قاجەت. وسى باعىتتاعى جۇمىستى اكىمدىكتەرمەن بىرلەسىپ كەڭەيتەمىز دەپ ويلايمىن، - دەيدى ءمينيستردىڭ ورىنباسارى.
ايتا كەتسەك، ەنەرگەتيكا ءمينيسترى ەرلان اقكەنجەنوۆ قىتاي قازاقستانداعى جاڭارتىلاتىن ەنەرگەتيكا جوبالارىنا قىزىعۋشىلىق تانىتقانىن مالىمدەگەن ەدى.
