قازاقستاندىقتار ەڭبەك شارتىنا سمارتفوننان قول قويا الادى

استانا. KAZINFORM - ەندى قازاقستاندىقتار جۇمىس بەرۋشىمەن ەڭبەك شارتىنا تەك قاعاز تۇرىندە عانا ەمەس، سمارتفوننان دا قول قويا الادى. جاڭا سەرۆيس eGov Mobile موبيلدى قولدانباسىندا قولجەتىمدى.

جۇمىس بەرۋشى hr.enbek.kz پورتالىندا ءوزىنىڭ جەكە كابينەتىندە ەلەكتروندىق ەڭبەك شارتىنىڭ جوباسىن جاسايدى جانە ونى جۇمىسكەرگە كەلىسۋگە جولدايدى.

«جۇمىسكەرگە شارتقا قول قويۋ ۇسىنىسىمەن eGov Mobile موبيلدى قولدانباسىندا push-حابارلاما كەلەدى. ول ءوزىنىڭ جەكە باسىن قىسقا پارولمەن، موبيلدى قوسىمشاداعى بيومەتريالىق دەرەكتەرمەن راستايدى، push حابارلاما ارقىلى وتەدى. ءارى قاراي ەڭبەك شارتىمەن تانىسادى، ەگەر شارتتارمەن كەلىسسە، قىسقا كودتى ەنگىزىپ نەمەسە بيومەتريالىق دەرەكتەرمەن تەكسەرۋدەن ءوتىپ، ءوزىنىڭ ە ت س ق كومەگىمەن قول قويادى»، - دەپ جازىلعان «ۇلتتىق اقپاراتتىق تەحنولوگيالار» ا ق حابارلاماسىندا.

جۇيە hr.enbek.kz پورتالىنداعى جۇمىس بەرۋشىنىڭ جەكە كابينەتىنە حابارلاما جىبەرەدى. جۇمىس بەرۋشى ەلەكتروندىق ەڭبەك شارتىنا ەتسق نەمەسە QR ارقىلى قول قويادى. جۇيە قول قويىلعان ەلەكتروندىق ەڭبەك شارتىن اۆتوماتتى تۇردە ەڭبەك شارتتارىن ەسەپكە الۋدىڭ ءبىرىڭعاي جۇيەسىنە تىركەۋگە جىبەرەدى، سودان كەيىن شارت جاسالعان بوپ ەسەپتەلەدى. سەرۆيس ىسكە قوسىلعان ساتتەن باستاپ، 775 ەلەكتروندى ەڭبەك شارتىنا قول قويىلعان.

ەگەر پايدالانۋشى ءموبيلدى قولدانبانى ورناتپاسا، ءبىراق موبيلدى ازاماتتار بازاسىندا تىركەلگەن بولسا، وعان قولدانبانى جۇكتەۋگە سىلتەمە، جاڭا حابارلامانىڭ كەلىپ تۇسكەنى تۋرالى اقپاراتى بار 1414 نومىرىنەن sms-حابارلاما جىبەرىلەدى. قولدانباعا ەڭ العاش كىرگەن كەزدە پايدالانۋشىعا جىبەرىلگەن بارلىق حابارلامالار شىعىپ تۇرادى.