قازاقستاندىق زەينەتكەرلەر تاريحي وتانىنا العاش رەت باردى

استانا. قازاقپارات – تاريحي وتانعا العاشقى ساپار. قازاقستاندا تۇراتىن كارىس ۇلتىنىڭ زەينەتكەرلەرى وڭتۇستىك كورەياعا ساياحاتقا شاقىرىلدى. الماتىداعى كورەي ۇلتتىق ورتالىعى ۇيىمداستىرعان ەرەكشە ساپاردىڭ باستى دەمەۋشىسى بيۋدجەتتىك اۋە كومپانياسى.

وڭتۇستىك كورەياعا شاقىرىلعان قازاقستانداعى كورەي دياسپوراسىنىڭ ەڭ قارت وكىلى جۋىردا 91 جاسقا تولدى. نيكولاي سوي تاريحي وتانىندا ەشقاشان بولماعان. ول قيىر شىعىستا دۇنيەگە كەلگەن. دەپورتاتسيا كەزىندە 3 جاستا بولعان، ءبىراق وتباسىن قازاق جەرىندە قالاي جىلى قارسى العانى ءالى كۇنگە دەيىن ەسىندە ساقتالىپ قالعان. نيكولاي ۆالەنتينوۆيچ الماتىدا پەداگوگيكالىق ينستيتۋتتى ءتامامداپ، 30 جىلدان استام ۋاقىت مۇعالىم بولىپ ەڭبەك ەتكەن.

نيكولاي سوي، جەتىسۋ وبلىسىنىڭ تۇرعىنى:

- كورەي ۇلتتىق ورتالىعىنىڭ كومەگىمەن مەن اتا-بابالارىمىزدىڭ وتانى - كورەياعا كەلدىم. قازاقستان مەن ءۇشىن جانە اتا-انام ءۇشىن ەكىنشى وتان. سەبەبى ءبىز وسىندا كەلىپ، ءومىر سۇردىك. قازىر امان جۇرگەن كورەيلەر قازاقستان ءبىزدى ەڭ جاقىن حالىق رەتىندە قابىلدايتىنىنا قۋانادى. كوپ راحمەت، قازاقستان!

64 جاستاعى يۋريي وگاي دا تاريحي وتانىنا العاش رەت تابان تىرەدى. ول قازىرگى جەتىسۋ وبلىسىنا قاراستى كوكسۋ اۋىلىندا تۋعان. سول اۋىلدا مەحانيك بولىپ جۇمىس ىستەپ، بيزنەسپەن اينالىسقان. يۋري قازاق ءتىلىن ەركىن مەڭگەرگەن جانە قازاق ۇلتتىق تاعامدارىنا ابدەن ۇيرەنگەن.

يۋري وگاي، جەتىسۋ وبلىسىنىڭ تۇرعىنى:

- اكەم اۋىلدا باس ۆەتەرينار-دارىگەر بولعان، قازاقشا سودان ۇيرەندىم عوي. جازدا تاۋعا، جايلاۋعا شىققانمىن، ول جەردە ەشكىم ورىسشا سويلەمەيدى، ءبارى قازاقشا سويلەيدى، سودان قازاقشا سويلەپ وتىرمىن.

تاريحي وتانىنا بارعىسى كەلەتىندەر كوپ بولعان، ءبىراق الماتىداعى كورەي مادەني ورتالىعى ەڭ قۇرمەتتى زەينەتكەرلەردى عانا ىرىكتەپ الىپتى. ولار الماتى، شىمكەنت، تالدىقورعان، قونايەۆ قالالارىنىڭ جانە ۇشتوبە اۋىلىنىڭ تۇرعىندارى. بۇل قايىرىمدىلىق ساپار كورەيا تاۋەلسىزدىگىنىڭ 80 جىلدىعى مەن قازاقستان حالقى اسسامبلەياسىنىڭ 30 جىلدىعىنا وراي ۇيىمداستىرىلدى.

يننا ني، الماتى كورەي ۇلتتىق ورتالىعى ءتوراعاسىنىڭ ورىنباسارى:

- ءيا، ءبىز تاريحي وتانىمىزعا ۇمتىلامىز، ءبىراق قازاقستان - ءبىزدىڭ ناعىز وتانىمىز. قازاقستان 1937 -جىلى كۇشتەپ قونىس اۋدارىلعان كورەيلەردى قۇشاق جايا قارسى الدى. باسپانامەن، تاماقپەن قامتاماسىز ەتتى. ولار - ەڭ قوناقجاي، ەڭ ادال حالىق.

وڭتۇستىك كورەيادا قازاقستاندىق دەلەگاتسيا 4 كۇن بولدى.

24.kz