قازاقستاندىق وقۋشىلار روبوتوتەحنيكادان ءۇش دۇركىن الەم چەمپيونى اتاندى
استانا. KAZINFORM - گرەكيادا روبوتوتەحنيكادان ەڭ ءىرى چەمپيونات FIRST Global Challenge ءوز مارەسىنە جەتتى. قازاقستاندىق وقۋشىلار بىرنەشە باعىت بويىنشا كوش باستاپ قانا قويماي، 190 ەلدىڭ اراسىنان باستى جۇلدەنى جەڭىپ الىپ، رەكوردتىق ناتيجەگە قول جەتكىزدى.
بۇل تۋرالى ق ر وقۋ-اعارتۋ مينيسترلىگىنىڭ باسپا ءسوز قىزمەتىنەن حابارلاندى.
باسپاءسوز قىزمەتىنىڭ حابارلاۋىنىشا، قازاقستان قۇراماسى ءۇشىنشى جىل قاتارىنان ءوزىنىڭ چەمپيون ەكەنىن دالەلدەپ كەلەدى. كوماندانىڭ قۇرامىنا الماتى قالاسىنىڭ ف م ب ن ز م-ءنىڭ وقۋشىلارى: ەرداۋلەت تۇرگەنبايەۆ، ءالفيا بايجاقىپ، نۇرجان كوكەيەۆ، دوسجان دايران جانە قادىلبەك داستان ەندى. جاتتىقتىرۋشىلارى - نۇرداۋلەت دوسماعامبەت پەن دۋلات بايتۋلەنوۆ.
Grand Challenge Award نوميناتسياسى بويىنشا التىن مەدال مەن ويىندارداعى رەكوردتىق ۇپاي سانىنان باسقا، قازاقستاندىق قۇرامانىڭ جۇلدە قورى جوعارعى تورەشىلەر نوميناتسياسىندا ەكى كۇمىس مەدالمەن تولىقتى: ا. ەينشتەين اتىنداعى FIRST Global International Excellence جانە ۇزدىك ينجەنەرلىك ازىرلەمەلەر ءۇشىن Robots Skills Challenge. بۇدان باسقا ءال-حورەزمي اتىنداعى Outstanding Supporter نومرناتسياسىندا كۇمىس مەدالمەن وتاندىق USTEM FOUNDATION جاس ينجەنەرلەرگە كورسەتكەن قولداۋى ءۇشىن ماراپاتتالدى.
«ءبىز جارىستا توپ جارىپ، ەلىمىزدىڭ جۇلدە قورجىنىن التىن مەدالمەن تولىقتىردىق جانە رەكوردقا قول جەتكىزدىك. الەمنىڭ بىردە ءبىر ەلى ەكى دۇركىن چەمپيون بولا المادى، ال ءبىزدىڭ بالالارىمىز ءۇشىنشى جىل قاتارىنان جەڭىس تۇعىرىنان كورىندى. ايتا كەتۋ كەرەك، كوماندا قۇرامى وسى جىلداردا قايتالانعان ەمەس، ەلىمىزدىڭ نامىسىن قورعاۋعا ءار جارىسقا ۇنەمى جاڭا ويىنشى اتتانىپ وتىرادى، ولار سايىستىڭ ۇلتتىق كەزەڭىندە ىرىكتەلەدى»، - دەيدى قوردىڭ نەگىزىن قالاۋشى جانە قۇرامانىڭ جاتتىقتىرۋشىسى اسىلبەك مۇرزاحمەتوۆ.
ەستەرىڭىزگە سالا كەتەيىك، قازاقستان 2022 -جىلى جەنيەۆادا، 2023 -جىلى سينگاپۋردە جەڭىسكە جەتكەن بولاتىن. ۇلتتىق قۇراما وقۋ-اعارتۋ مينيسترلىگىنىڭ، «دارىن» ر ع پ و- نىڭ، الماتى قالاسى اكىمدىگىنىڭ قولداۋىمەن وتكەن روبوتوتەحنيكادان ىرىكتەۋ كەزەڭدەرىندە قۇرىلدى.
انىقتاما ءۇشىن: FIRST Global Challenge - بۇل وليمپيادا ۇلگىسىندەگى روبوتوتەحنيكادان بۇكىل الەمدىك چەمپيونات. ول جىل سايىن ءتۇرلى ەلدە وتكىزىلىپ وتىرادى. بۇل بەدەلدى ينجەنەرلىك دوداداعى قازاقستاندىق وقۋشىلاردىڭ ءۇشىنشى جەڭىسى.
