قازاقستاندىق وقۋشىلار الەمدەگى ەڭ بەدەلدى وليمپيادادا 6 مەدال جەڭىپ الدى

استانا. KAZINFORM - قازاقستان قۇراماسى الەمدىك دەڭگەيدەگى زياتكەرلىك سايىستاردا جوعارى ناتيجەلەر كورسەتۋدى جالعاستىرىپ كەلەدى. اۋستراليادا وتكەن مەكتەپ وقۋشىلارىنا ارنالعان ەڭ بەدەلدى پاندىك وليمپيادالاردىڭ ءبىرى - ماتەماتيكادان حالىقارالىق وليمپيادادا قازاقستاندىق وقۋشىلار التى مەدال جەڭىپ الدى.

بيىل وليمپياداعا 112 ەلدەن 650 گە جۋىق ۇزدىك جاس ماتەماتيك قاتىستى. قازاقستان قۇراماسى تاعى دا ۇزدىكتەر قاتارىنان كورىنىپ، ءتورت كۇمىس جانە ەكى قولا مەدال يەلەندى.

II ورىن - ميرون يۋركيەۆيچ، الماتى قالاسىنداعى Haileybury Almaty مەكتەبىنىڭ 12-سىنىپ وقۋشىسى؛

II ورىن - اميرلان امانجولوۆ، الماتى قالاسىنداعى Haileybury Almaty مەكتەبىنىڭ 11-سىنىپ وقۋشىسى؛

II ورىن - مارعۇلان شارەل، استانا قالاسىنداعى Spectrum International School مەكتەبىنىڭ 11-سىنىپ وقۋشىسى؛

II ورىن - امير ساحيپوۆ، الماتى قالاسىنداعى ر ف م م مەكتەبىنىڭ 11-سىنىپ وقۋشىسى؛

III ورىن - ەراسىل التىنبەك، الماتى قالاسىنداعى Nurorda مەكتەبىنىڭ 10-سىنىپ وقۋشىسى؛

III ورىن - ەرقانات كەنشىلىك، اقتوبە وبلىسىنداعى «ءبىلىم-يننوۆاتسيا» ليتسەي-ينتەرناتىنىڭ 11-سىنىپ وقۋشىسى.

ۇلتتىق قۇرامانىڭ عىلىمي جەتەكشىلەرى - PhD دوكتورى اسىلبەك يساحوۆ پەن حالىقارالىق وليمپيادالاردىڭ جەڭىمپازى قانات ساتىلحانوۆ.

ايتا كەتەيىك، IMO وليمپياداسى 1959-جىلدان بەرى وتكىزىلىپ كەلەدى جانە ول الەمدەگى ەڭ بەدەلدى جەتى پاندىك وليمپيادانىڭ قاتارىنا كىرەدى (International Science Olympiads).

قازاقستان بۇل جارىسقا 1993-جىلدان بەرى قاتىسىپ كەلەدى. وسى ۋاقىت ىشىندە ۇلتتىق قۇراما 16 التىن، 55 كۇمىس، 81 قولا مەدال جانە 29 قۇرمەت گراموتاسىن جەڭىپ العان.

بۇعان دەيىن قازاقستاندىق وقۋشىلاردىڭ بارسەلوناداعى بايقاۋدا 13 مەدال ەنشىلەگەنىن حابارلاعان ەدىك.