قازاقستاندىق سپورتشىلار نىسانا كوزدەۋدەن الەم كۋبوگىنا قاتىسادى
استانا. KAZINFORM - برازيليانىڭ ريو- دە- جانەيرو قالاسىندا 11-20 -ءساۋىر ارالىعىندا نىسانا كوزدەۋدەن الەم كۋبوگىنىڭ ليتسەنزيالىق كەزەڭى وتەدى.
الەم كۋبوگىندا ەل نامىسىن قازاقستاندىق 10 سپورتشى قورعايدى. ولاردىڭ قاتارىندا ۆينتوۆكادان يسلام ساتپايەۆ، ەليزاۆەتا بەزرۋكوۆا، الەكساندرا لە، ارينا التۋحوۆا، نيكيتا شاحتورين، كونستانتين مالينوۆسكيي سىنعا تۇسەدى. ال تاپانشادان نىسانا كوزدەۋدە ۆالەريي راحىمجان، ەلدار يمانقۇلوۆ، يرينا يۋنۋسمەتوۆا، رۋسلان يۋنۋسمەتوۆ جارىس جولىنا شىعادى.
ۇلتتىق قۇراما سپورتشىلارى قازىر شىمكەنت قالاسىندا ارنايى وقۋ- جاتتىعۋ جيىنىن وتكىزىپ جاتىر. ليتسەنزيالىق جارىستا جۇلدەگەرلەر قاتارىنان كورىنگەن مەرگەندەر 2024 -جىلعى پاريج وليمپياداسىنا جولداما الادى. ال قالعان جولدامالار مامىردا گەرمانيانىڭ ميۋنحەن قالاسىنداعى الەم كۋبوگىنىڭ كەزەڭىنەن كەيىن وليمپيادالىق رەيتينگ قورىتىندىسى بويىنشا تاراتىلادى.
ەسكە سالساق، بۇدان بۇرىن سەمسەرلەسۋدەن قازاقستان ەرلەر قۇراماسى گرۋزيا استاناسى تبيليسيدە ءوتىپ جاتقان الەم كۋبوگىندە قولا جۇلدەگەر اتاندى.
اتالعان جارىستا ەلىمىزدىڭ ەرلەر قۇراماسى 2024 -جىلعى پاريج وليمپياداسىنا ليتسەنزيا الدى.
