قازاقستاندىق سەۋلدەگى جاعداي تۋرالى: ءبارى تۇراقتى

استانا. KAZINFORM - قازاقستاندىق دميتري لي وڭتۇستىك كورەيادا 6 جىل تۇرىپ جاتىر. سەۋلدەگى جەرلەسىمىز ەل استاناسىنداعى جاعدايدىڭ تۇراقتالعانىن جەتكىزدى.

- قازىر جاعداي تۇراقتى. اسكەريلەر جوق، ازىرگە ءبارى قالىپتى، ءبارى ءبىتتى. اسكەريلەر سول كۇنى كەتىپ قالدى، ولار ەل پرەزيدەنتى اسكەري جاعداي جاريالاعان كەزدە عانا بولدى. سول كۇنى، كەشكى ساعات 22:00 دە ءبىرقاتار كورەيلىك تانىمال ادامدار الەۋمەتتىك جەلىدە ماڭىزدى كەزدەسۋلەردەن باس تارتۋعا ءماجبۇر بولعانىن ايتىپ شاعىمداندى. سونىمەن قاتار، قازاقستان مەن وڭتۇستىك كورەيا مەملەكەتى قورعانىس مينيسترلەرىنىڭ كەزدەسۋى توقتاتىلدى. دەگەنمەن، كەلەسى كۇنى تاڭەرتەڭ بالالار مەكتەپكە، ەرەسەكتەر جۇمىسقا باردى. بارلىعى ءبىر تۇندە بولىپ، سول ءتۇنى اياقتالدى. بارلىعى ۇكىمەت دەڭگەيىندە شەشىلدى، - دەدى دميتري لي.

سونداي-اق، جەرلەسىمىز كورەي حالقىنىڭ بەيبىت جينالىسى ءالى دە جالعاسىپ جاتقانىن ايتىپ وتىر.

- بەيبىت جيىندار جىل بويى جالعاسىپ كەلەدى. بۇقارالىق اقپارات قۇرالدارى اسا نازار اۋدارعان جوق، ويتكەنى، كورەي حالقى بەيبىت جيىنعا ءجيى شىعادى. قارسىلىق ءار اپتادا سەنبى سايىن وتەدى. سوڭعى دەرەك 100 مىڭعا جەتتى، كوپتەگەن ادام پرەزيدەنتكە قارسى بولدى. ويتكەنى، ول كورەياداعى ەڭ تانىمال ەمەس پرەزيدەنتتەردىڭ ءبىرى، - دەيدى ول.

ايتا كەتسەك، 3-جەلتوقساندا وڭتۇستىك كورەيا پرەزيدەنتى يۋن سوك ەل ەلدە اسكەري جاعداي ەنگىزىلەتىنىن حابارلاعاننان كەيىن ساياسي اۋحال شيەلەنىسكەن بولاتىن.

وسىعان وراي كورەياداعى قازاقستان ەلشىلىگى قازاقستاندىقتارعا ۇندەۋ جاسادى.

ارتىنشا كورەيا پارلامەنتى ەلدە اسكەري جاعداي رەجيمىن الىپ تاستاۋدى تالاپ ەتتى. سودان سوڭ وڭتۇستىك كورەيا پرەزيدەنتى ەلدەگى اسكەري جاعدايدى الىپ تاستايتىنى بەلگىلى بولدى.

Kazinform ءتىلشىسى وڭتۇستىك كورەيا پرەزيدەنتىنىڭ نار تاۋەكەلگە بارۋ سەبەبىنە شولۋ جاساعان ەدى.

ايتا كەتسەك، بۇگىن قازاقستان مەن وڭتۇستىك كورەيا قورعانىس مينيسترلەرىنىڭ كەلىسسوزى وتپەيتىنى ايتىلدى.

سونداي-اق وڭتۇستىك كورەيا پرەزيدەنتىنە يمپيچمەنت جاريالاۋ پروتسەسى باستالدى.